ۇلتتىق ورتالىق مۋزەيدە مادەنيەت سالاسىنىڭ ۇزدىگى، سۋرەتشى، ءمۇسىنشى، كاريكاتۋراشى قالي قورالاسبايەۆتىڭ "كيەلى مەكەن" اتتى جەكە شىعارماشىلىق كورمەسىنىڭ اشىلۋى ءوتتى.
اتالمىش كورمە 25 قازان – رەسپۋبليكا كۇنىنە، شۋ اۋدانىنىڭ 95 جىلدىعىنا جانە ونەر يەسىنىڭ 60 جاسقا تولعان مەرەيتويىنا وراي ۇيىمداستىرىلدى.
جيىندا الماتى قالاسى مادەنيەت باسقارماسى باسشىسىنىڭ ورىنباسارى ارمان حالبەكوۆ سۋرەتشىنىڭ ەتكەن ەرەن ەڭبەگىن تىلگە تيەك ەتىپ، مەرەيتويمەن قۇتتىقتادى.
سۋرەتشى قالي قورالاسبايەۆتىڭ ايتۋىنشا، "كيەلى مەكەن" كورمەسىنىڭ نەگىزگى ماقساتى – قازاقستاننىڭ بەينەلەۋ ونەرىن دامىتۋ، ۇلتتىق مادەنيەت پەن رۋحاني قۇندىلىقتاردى جاڭعىرتۋ، سونداي-اق كورەرمەنگە تۋعان جەر تاريحىنىڭ كوركەم بەينەسىن پاش ەتۋ. اۆتور ءوز شىعارمالارى ارقىلى ادامنىڭ تۋعان جەرگە دەگەن سۇيىسپەنشىلىگىن، رۋحاني تامىرىن جانە ۇلتتىق بىرەگەيلىكتى كوركەمدىك تىلمەن جەتكىزۋدى ماقسات ەتكەن.
"كيەلى مەكەن" دەپ اتاۋىما سەبەپ بولعان – اتا-بابامىزدىڭ قانى، انالارىمىزدىڭ كوز جاسى تامعان تاريحي جەرىم. ادام ءۇشىن ءوز تۋعان جەرىنىڭ ءار بۇتاسى، ءار تاسى كيەلى. كورمەگە بارلىعى 150-گە تارتا ەڭبەك قويىلعان. مايلى بوياۋ، اكۆاەرلمەن سالىنعان سۋرەتتەردەن بولەك، تاس مۇسىندەردى دە كورەرمەن نازارىنا ۇسىنۋدى ءجون كوردىم. ۇسىنىلعان ەڭبەكتىڭ كوبى 2022–2025 جىلدار ارالىعىندا جيناقتالعانىمەن، اراسىنا 1990 جىلدارداعى جۇمىستارىمدى دا قوستىم. ەندىگى ارمانىم – جۇرتىنا ادال قىزمەت ەتەتىن شاكىرتتەر تاربيەلەۋ"، – دەدى قالي قورالاسبايەۆ.
ءومىرىن ونەر مەن شاكىرت تاربيەسىنە ارناعان قالي قورالاسبايەۆ – ەل مادەنيەتىنە ەلەۋلى ۇلەس قوسىپ كەلە جاتقان تۇلعا. ول كوپ جىلدار بويى جامبىل وبلىسى شۋ اۋدانىنداعى "بالالار مەن جاسوسپىرىمدەر ورتالىعىندا" قىزمەت اتقارىپ، بولاشاق سۋرەتشىلەردىڭ دارىنىن اشىپ، ولاردىڭ شىعارماشىلىق ىزدەنىسىنە باعىت-باعدار بەرىپ كەلەدى. ونىڭ شاكىرتتەرى بۇگىنگى تاڭدا ءتۇرلى رەسپۋبليكالىق، حالىقارالىق بايقاۋلاردا جەڭىمپاز اتانىپ، ۇستاز ەڭبەگىنىڭ جەمىسىن پاش ەتۋدە.
كورمەدەگى سۋرەتتەر قاتارىنان تابيعي تاس پەن اعاشتان ويىلعان مۇسىندەر، كەسكىندەمە جانە گرافيكالىق جۇمىستاردى بىردەن اڭعارۋعا بولادى. ءار تۋىندىدا اۆتور تۋعان ەلدىڭ تاريحى مەن تابيعاتىن، حالقىمىزدىڭ ءسالت-داستۇرى مەن قازاق حالقىنىڭ رۋحاني بولمىسىن ونەر تىلىمەن شەبەر ورنەكتەگەن.
ايتا كەتەيىك، قالي قورالاسبايەۆتىڭ ەڭبەكتەرى ەلىمىزدىڭ جەتەكشى مادەني وشاقتارىنىڭ قورىندا ساقتاۋلى. تابيعي تاستان جاسالعان "ابىز" اتتى تۋىندىسى قازاقستان رەسپۋبليكاسىنىڭ ۇلتتىق مۋزەيىندە، ال "انا – جەر انا" ءمۇسىنى ءا.قاستەيەۆ اتىنداعى ۇلتتىق ونەر مۋزەيىندە، "جەلتوقسان جەلى – 86" ەڭبەگى جامبىل وبلىستىق مۋزەي قورىن تولىقتىرعان. بۇل تۋىندىلار سۋرەتشىنىڭ ەل رۋحانياتىنا قوسقان زور ۇلەسىنىڭ ايعاعى ىسپەتتى.
سۋرەتشى بۇعان دەيىن دە رەسپۋبليكا بويىنشا بىرنەشە جەكە كورمەلەرىن وتكىزگەن. اۋليەاتا جەرىندە ۇيىمداستىرىلعان "تاۋەلسىزدىك – ەل تۇعىرى"، "اق مەكەن"، "جەمقورلىق – جەگىقۇرت" اتتى شىعارماشىلىق كورمەلەرى كورەرمەننىڭ جوعارى باعاسىنا يە بولىپ، قوعامداعى وزەكتى ماسەلەلەردى ونەر تىلىمەن جەتكىزۋدىڭ ۇلگىسى بولدى.
ال "كيەلى مەكەن" كورمەسى – تەك سۋرەتشىنىڭ شىعارماشىلىق جەتىستىكتەرىنىڭ مەرەكەسى ەمەس، تۋعان جەردىڭ تاريحى مەن كيەسىن دارىپتەيتىن، ونەر مەن رۋحاني قۇندىلىقتى ۇشتاستىراتىن ۇلكەن مادەني شارا بولدى.