كەزدەسۋگە قوعامدىق كەڭەس مۇشەلەرى، ءماسليحات دەپۋتاتتارى، ساراپشىلار قاۋىمداستىعىنىڭ وكىلدەرى قاتىستى.
الماتى قالاسى قوعامدىق كەڭەسىنىڭ باستاماسى بويىنشا قالا باسشىسى ەربولات دوسايەۆتىڭ قاتىسۋىمەن 2025 جىلعا دەيىنگى دامۋ جوسپارىنىڭ نەگىزگى باسىمدىقتارى مەن 2030 جىلعا دەيىنگى ورتا مەرزىمدى پەرسپەكتيۆالار جوباسى تالقىلاندى، دەپ حابارلايدى Almaty-akshamy.kz.
الماتى اكىمى ءوزىنىڭ سوزىندە اعىمداعى سىرتقى جانە ىشكى سىن-قاتەرلەر الداعى جىلدارعا ارنالعان جوسپارلاردى ەلەۋلى تۇزەتۋدى تالاپ ەتەتىنىن اتاپ ءوتتى. بىرلەسكەن جۇمىستىڭ ناتيجەسىندە الماتىنى دامىتۋ ورتالىعى مەن ءتۇرلى سالالارداعى 40-تان استام تاۋەلسىز ساراپشىلار ءبىزدىڭ قارجىلىق جانە وزگە دە مۇمكىندىكتەرىمىزدى ەسكەرە وتىرىپ، الماتىنىڭ الەۋمەتتىك-ەكونوميكالىق دامۋىنىڭ اسا ماڭىزدى جانە سونىمەن قاتار قول جەتكىزۋگە بولاتىن ماقساتتارىن تاڭدادى.
الماتىنىڭ 2025 جىلعا دەيىنگى دامۋ جوسپارىنىڭ نەگىزگى باسىمدىقتارى مەن 2030 جىلعا دەيىنگى ورتا مەرزىمدى پەرسپەكتيۆالار جوباسى 27 ماۋسىم مەن 1 شىلدە ارالىعىندا جالپى تالقىلاۋدا بولدى. وسى ۋاقىت ىشىندە قالا تۇرعىندارى 1280 ۇسىنىستار مەن تۇسىنىكتەمەلەر جىبەردى.
«قالا تۇرعىندارىمەن تالقىلاۋدان كەيىن ءبىز انىقتاعان ۇسىنىستار مەن تولىقتىرۋلار قالانىڭ 2025 جىلعا دەيىنگى دامۋ جوسپارىن جانە ونىڭ 2030 جىلعا دەيىنگى ورتا مەرزىمدى پەرسپەكتيۆالارىن ازىرلەۋ كەزىندە ەسكەرىلەتىن بولادى. ءبىزدىڭ باستى ماقساتىمىز – مەگاپوليستىڭ بارلىق تۇرعىندارىنىڭ ءومىر ءسۇرۋ دەڭگەيىنىڭ ساپاسىن ارتتىرۋ، جايلى، ينكليۋزيۆتى جانە ءقاۋىپسىز قالالىق ورتانى قۇرۋ. ماقساتتار مەن مىندەتتەر قالالىقتاردىڭ سۇرانىستارىنا نەگىزدەلە وتىرىپ، ناقتى جانە تۇسىنىكتى KPI تۇرىندە قالىپتاستى»، – دەپ اتاپ ءوتتى ەربولات دوسايەۆ.
كەزدەسۋ بارىسىندا الماتى اكىمى قالانىڭ نەگىزگى سىن-تەگەۋرىندەرى مەن پروبلەمالىق ماسەلەلەرىنە توقتالىپ، الداعى جىلدارعا ارنالعان نەگىزگى ماقساتتار مەن مىندەتتەردى ۇسىندى، سونداي-اق قالا تۇرعىندارىنىڭ سۇراقتارىنا جاۋاپ بەردى.
«ەندى ءبىزدىڭ الدىمىزدا وزگە ءبىر ۇلكەن مىندەت تۇر – بۇل يدەيالاردىڭ بارلىعىن جۇزەگە اسىرۋ، الماتىلىقتار الدىنداعى مىندەتتەمەلەردى جاڭا ەكونوميكالىق، الەۋمەتتىك جانە ساياسي جاعدايدا ورىنداۋ. وسى ۇسىنىستار مەن سىزدەردىڭ يدەيالارىڭىزدىڭ بارلىعىن ءتيىمدى ىسكە اسىرۋ جاڭا قازاقستاندى دامىتۋدىڭ كەپىلى بولادى دەپ ەسەپتەيمىن، ميۇنداعى باستى ماقسات ءبىزدىڭ ازاماتتارىمىزدىڭ ءومىر ءسۇرۋ ساپاسىن ءارى ولاردىڭ ءال-اۋقات دەڭگەيىن ارتتىرۋ بولىپ تابىلادى» - دەدى ەربولات دوسايەۆ.
الماتى قالاسىن دامىتۋ جوسپارى كەلەسى 2 اي ىشىندە – اعىمداعى جىلدىڭ 5 قىركۇيەگىنە دەيىن بەكىتىلەتىن بولادى.
الماتىنىڭ 2025 جىلعا دەيىنگى دامۋ جوسپارىنىڭ نەگىزگى باسىمدىقتارى مەن 2030 جىلعا دەيىنگى ورتا مەرزىمدى پەرسپەكتيۆالار جوباسى تانىسۋ ءۇشىن الماتى دامۋ ورتالىعىنىڭ سايتىندا قولجەتىمدى.