الماتى قالاسى اكىمىنىڭ بۇيرىعىمەن ساۋلەتشى – قالالىق جوسپارلاۋ جانە ۋربانيستيكا باسقارماسى باسشىسىنىڭ م.ا. لاۋازىمىنا نۇرلان بورانبايەۆ تاعايىندالدى، دەپ حابارلايدى almaty-akshamy.kz
بورانبايەۆ نۇرلان اقاباي ۇلى 1963 جىلى 22 جەلتوقساندا اقتوبە قالاسىندا تۋعان. الماتى ساۋلەت-قۇرىلىس ينستيتۋتىن 1988 جىلى بىتىرگەن. ەڭبەك جولىن اقتوبەدەگى «اقتوبەازاماتجوبا» جوبالىق ۇيىمىندا ساۋلەتشى بولىپ باستاعان. جەكە كومپانيالاردا جانە مەملەكەتتىك قىزمەتتە جۇمىس ىستەگەن. «قالانىبەزەندىرۋ»، اقتوبە قالاسىنداعى «اقتوبەگەودەزيا» كمك-دا باسشىلىق قىزمەتتەر اتقارعان، سونداي-اق اكىمنىڭ كەڭەسشىسى، اقتوبە قالاسى ساۋلەت جانە قالا قۇرىلىسى ءبولىمىنىڭ باسشىسى بولعان. كەيىن «اقتوبە وبلىسىنىڭ ساۋلەت جانە قالا قۇرىلىسى باسقارماسى» ءمم-نىڭ باستىعى، «اكتيۋبگرپجدپنپروەكتتىڭ» باس ساۋلەتشىسى بولىپ جۇمىس ىستەگەن.
اعىمداعى لاۋازىمعا تاعايىندالعانعا دەيىن ول «الماتىباسجوسپار عزي» جشس-دە دەرەكتەرمەن جۇمىس جونىندەگى ديرەكتور قىزمەتىن اتقارعان.