الماتىدا قالالىق باسقارۋدىڭ جاڭارتىلعان قۇرىلىمى بەكىتىلدى

سەسسيا اياسىندا دەپۋتاتتار ءبىرقاتار ماڭىزدى شەشىمدى قاراپ، قولدادى. سونىڭ ىشىندە قالانى باسقارۋدىڭ جاڭارتىلعان سحەماسى بەكىتىلدى. وزگەرىستەر اكىمشىلىك قۇرىلىمنىڭ تيىمدىلىگىن ارتتىرۋعا جانە ۇكىمەت بەكىتكەن بازالىق قۇرىلىمعا سايكەستەندىرۋگە باعىتتالعان. اتاپ ايتقاندا:

- ەكونوميكا باسقارماسى مەن قارجى باسقارماسى بىرىكتىرىلىپ، ەكونوميكا جانە قارجى باسقارماسى بولىپ قۇرىلدى؛

- قوعامدىق دامۋ باسقارماسى ىشكى ساياسات باسقارماسى بولىپ قايتا اتالدى؛

- قالالىق جوسپارلاۋ جانە ۋربانيستيكا باسقارماسى ساۋلەت جانە قالا قۇرىلىسى باسقارماسى بولىپ وزگەرتىلدى؛

- سەيسميكالىق قاۋىپسىزدىك جانە موبيليزاسيالىق دايىندىق باسقارماسى موبيليزاسيالىق دايىندىق، اۋماقتىق جانە ازاماتتىق قورعانىس باسقارماسى بولىپ قايتا قۇرىلدى؛

- كوممۋنالدىق ينفراقۇرىلىمدى دامىتۋ باسقارماسى كوممۋنالدىق ينفراقۇرىلىم جانە تۇرعىن ءۇي ينسپەكسياسى باسقارماسى بولىپ اتالدى.

جول-كولىك سالاسىن قايتا ۇيىمداستىرۋعا ەرەكشە نازار اۋدارىلدى. قالالىق موبيلدىلىك باسقارماسى ەكى دەربەس ورگانعا بولىنەدى. ولار:

- جول قوزعالىسىن ۇيىمداستىرۋ جانە جولاۋشىلار كولىگى باسقارماسى – قوعامدىق كولىكتى، پاركينگ كەڭىستىگىن، باعدارشام نىساندارىن، جول تاڭبالارى مەن بەلگىلەرىن رەتتەۋ فۋنكسيالارىن ورىندايدى؛

- جول ينفراقۇرىلىمىن دامىتۋ باسقارماسى – جول جەلىسىن، كولىك تورابى نىساندارىن (تپۋ)، مەترو، LRT، BRT جانە ايالداما كەشەندەرىن سالۋ مەن دامىتۋعا جاۋاپتى.

بارلىق وزگەرىس ۇكىمەت بەكىتكەن قالا اكىمدىگى اپپاراتىنىڭ شتات سانىن ساقتاۋ اياسىندا، ىشكى قايتا بولۋلەر ارقىلى بيۋدجەتتەن قوسىمشا شىعىنسىز جۇزەگە اسىرىلادى.

سونىمەن قاتار دەپۋتاتتار قازاقستان رەسپۋبليكاسىنىڭ جاڭارتىلعان سۋ كودەكسىنە سايكەس ازىرلەنگەن الماتى قالاسىندا جالپى سۋ پايدالانۋ قاعيدالارىن بەكىتتى. قۇجات تۇرعىنداردىڭ سۋ ايدىندارىنا ەركىن قول جەتكىزۋىن، قورشاعان ورتانى قورعاۋدى جانە سانيتارلىق تالاپتاردىڭ ورىندالۋىن قامتاماسىز ەتۋگە باعىتتالعان. جەرگىلىكتى دەڭگەيدە العاش رەت ورتاق سۋ ايدىندارىندا ازاماتتاردىڭ دەمالىس، بالىق اۋلاۋ جانە تۋريزممەن اينالىسۋ قۇقىعىن كەپىلدەندىرەتىن جاريا سۋ سەرۆيتۋتى قاعيداتى بەكىتىلدى.

باسقا دا شەشىمدەردىڭ قاتارىندا دەپۋتاتتار الماتى قالاسىندا ادام ساۋداسىنا قارسى ءىس-قيمىل جونىندەگى كوميسسيا تۋرالى ەرەجەنى كەلىسىپ، سونداي-اق قالا اكىمدىگى جانىنداعى تەرروريزمگە قارسى كوميسسيانىڭ كونسۋلتاتيۆتىك-كەڭەسشى ورگانىنىڭ قۇرامىنا وزگەرىستەر ەنگىزدى.

سەسسيا سوڭىندا دەپۋتاتتار التاي بەردىقۇلوۆتى الماتى قالاسى بويىنشا ريەۆيزيالىق كوميسسيا ءتوراعاسى لاۋازىمىنان بوساتۋ تۋرالى شەشىم قابىلدادى. ۋاقىتشا مىندەتتى كوميسسيا مۇشەسى دانيار توركەشوۆ اتقاراتىن بولدى.