قالانىڭ كوممۋنالدىق تۇرعىن ءۇي قورىنان تۇرعىن ءۇي كەزەگىندە تۇرعان كوپبالالى وتباسىلارعا 227 ءۇش بولمەلى پاتەر ءبولىندى.
الماتى قالاسىنىڭ اكىمى باقىتجان ساعىنتايەۆ ناۋرىزباي اۋدانىنىڭ «الما سيتي-5» تۇرعىن ءۇي كەشەنىنەن ءۇش بولمەلى پاتەرلەردى العان جاڭا قونىستانۋشىلاردى قۇتتىقتادى. ۇيلەر «نۇرلى جەر» مەملەكەتتىك باعدارلاماسى اياسىندا سالىنعان، دەپ حابارلايدى Almaty-akshamy.kz.
جاڭا قونىستانۋشىلاردى قۇتتىقتاي وتىرىپ، مەگاپوليس اكىمى ب. ساعىنتايەۆ قالا تۇرعىندارىنا الەۋمەتتىك قامقورلىق اكىمدىك جۇمىسىنىڭ باستى باعىتى ەكەنىن ايتتى. جىل باسىنان بەرى 2 340 مۇقتاج وتباسىعا جەڭىلدىكپەن نەسيە بەرۋ اياسىندا تۇرعىن ءۇي بەرىلدى. سونىڭ ىشىندە كوممۋنالدىق تۇرعىن ءۇي قورىنان - 41؛ «باقىتتى وتباسى» رەسپۋبليكالىق باعدارلاماسى اياسىندا كوپ بالالى، تولىق ەمەس وتباسىلار مەن مۇگەدەك بالالاردى تاربيەلەپ وتىرعان وتباسىلارعا 181 نەسيەلىك زاەم بەرىلدى.
بۇل رەتتە الماتى قالاسىنىڭ اكىمى ب. ساعىنتايەۆتىڭ باستاماسىمەن كوپ بالالى وتباسىلارعا بەرىلەتىن نەسيە سانىن كوبەيتۋ ماقساتىندا جەرگىلىكتى بيۋدجەتتەن كەزەكتە تۇرعاندارعا جەڭىلدەتىلگەن نەسيەلەردى قوسىمشا قارجىلاندىرۋعا 3،3 ملرد تەڭگە ءبولىندى. بۇل شارا تاعى 223 نەسيە بەرۋگە مۇمكىندىك بەرەدى. بارلىعى «باقىتتى وتباسى» باعدارلاماسى اياسىندا 1 013 وتباسىن باسپانامەن قامتاماسىز ەتۋ جوسپارلانۋدا.
«شاڭىراق» رەسپۋبليكالىق باعدارلاماسى (5-10-20) اياسىندا 2021 جىلى 1 310 نەسيەلىك زاەم بەرىلدى. جۇمىس ىستەيتىن جاستارعا 1050 جالعا بەرىلەتىن پاتەر ءبولىندى. بۇگىندە «الماتى جاستارى» قالالىق جەڭىلدەتىلگەن نەسيەلەندىرۋ باعدارلاماسى بويىنشا 772 نەسيەلىك زاەم بەرىلدى. جىل سوڭىنا دەيىن قامتۋ كەمىندە 1 000 نەسيەلىك زاەمدى قۇرايتىن بولادى.
سونىمەن قاتار، الماتى قالاسىنىڭ اكىمى ب. ساعىنتايەۆتىڭ تاپسىرماسى بويىنشا، العاشقى تولەمنىڭ ءبىر بولىگىن قامتاماسىز ەتۋگە جاردەمدەسۋ ءۇشىن 1 ميلليون تەڭگە سوماسىنداعى تۇرعىن ءۇي سەرتيفيكاتتارى الەۋمەتتىك كومەك تۇرىندە وتەۋسىز جانە قايتارىمسىز نەگىزدە بەرىلەدى. بۇل ءۇشىن جەرگىلىكتى بيۋدجەتتەن 2 ملرد تەڭگە ءبولىندى. قالانىڭ كەزەكتە تۇرعان تۇرعىن ءۇي سەرتيفيكاتىن الۋشىلار - 1 جانە 2 توپتاعى مۇگەدەكتەر؛ مۇگەدەك بالالارى بار نەمەسە تاربيەلەپ وتىرعان وتباسىلار؛ جەتىم بالالار مەن اتا-اناسىنىڭ قامقورلىعىنسىز قالعان بالالار؛ كوپبالالى وتباسىلار.
