تۋريستىك كومپانياعا قاتىستى تەرگەۋ باستالدى.
الماتىدا ءبىر توپ ازامات «كاۋسار تريەۆەل» تۋرفيرماسىنا الداندىق دەپ ارىز جازعان، دەپ حابارلايدى Almaty-akshamy.kz كتك ارناسىنا سىلتەمە جاساپ.
تەلەارنانىڭ مالىمەتىنە سايكەس، قاجىلىق پەن ۋمراعا اپاراتىن تۋريستىك كومپانياعا 300-دەن اسا ادام الدانعان. باسىم بولىگىنىڭ مەككە مەن ءماديناعا ۇشۋ مەرزىمى الدەقاشان ءوتىپ كەتكەن. ەندى وزگەلەرى تۋرفيرمانىڭ بىلىعى كوپ ەكەنىن ءبىلىپ، قوماقتى قاراجاتىن قايتارىپ بەرۋدى تالاپ ەتىپ وتىر. الدانعان ادامداردىڭ ءارقايسى جولدامانى 500-600 مىڭ تەڭگەنىڭ توڭىرەگىندە ساتىپ الىپتى. بارىنە بىردەي وسىنداي تولەندى دەگەن ءبىر جاپىراق قاعاز عانا ۇستاتقان.
«كاۋسار تريەۆەلدىڭ» الەۋمەتتىك جەلىدە تۇرعان ءنومىرى ءوشىرۋلى. سويتسە، كومپانيا ەشبىر جەردە تىركەلمەگەن، نە ليسەنزياسى جوق.
«ۋمرا مەن قاجىلىققا اپاراتىن كومپانيالار دا «تۋريستىك قامقور» قورىنىڭ تىزىمىندە تۇرادى. وسىعان نازار اۋدارۋ كەرەك. ال «كاۋسار تريەۆەل» كومپانياسى تىزىمدە جوق. تىركەلمەگەن. تۇرعىندار قىزمەت كورسەتۋدەگى زاڭ بۇزۋشىلىققا تاپ بولعان سياقتى. بۇل كومپانياعا جۇگىنەر الدىندا تۋريستىك كودتى تالاپ ەتۋىڭىز كەرەك ەدى»، - دەيدى «تۋريستىك قامقور» قورىنىڭ ءتوراعاسى يننا رەي.
الدانعانىن كەش تۇسىنگەن جۇرت پوليسەيلەرگە جاپپاي ارىز جازدى. ءتارتىپ ساقشىلارى وسى كومپانياعا قاتىستى تەرگەۋدى باستادى.
«الماتى پد، مەدەۋ اۋدانى پب-نا ءبىر كۇن بۇرىن ەكى ادام ارىزدانسا، بۇگىن تاعى سەگىز جابىرلەنۋشى ارىز جازعان. ءمان-جايى جان-جاقتى زەردەلەنىپ، ق ر زاڭناماسىنا سايكەس، ودان ءارى شارا قولدانىلا وتىرىپ، قۇقىقتىق باعا بەرىلەتىن بولادى»، - دەيدى الماتى قالاسى پوليسيا دەپارتامەنتىنىڭ رەسمي وكىلى سالتانات ازىربەك.