2025 جىلدىڭ قىركۇيەك ايىندا ۇزىندىعى 37،2 كم بولاتىن «قايرات» شاعىن اۋدانىنداعى سۋمەن قامتۋ جانە سۋ بۇرۋ جۇيەلەرىنىڭ ەكىنشى كەزەڭىنىڭ قۇرىلىسى اياقتالادى، دەپ حابارلايدى aqshamnews.kz.
بۇل بۇرىن سۋمەن جانە كارىز جۇيەسىمەن قامتاماسىز ەتىلمەگەن ۋچاسكەلەردى تولىق قامتۋعا مۇمكىندىك بەرەدى. بۇل تۋرالى الماتىنىڭ تۇركسىب اۋدانى اكىمدىگى حابارلادى.
ايتا كەتەيىك، وتكەن جىلى اۋدان تۇرعىندارىن ساپالى اۋىز سۋمەن قامتاماسىز ەتۋ ماقساتىندا «المەرەك» شاعىن اۋدانىندا 20 كم سۋ قۇبىرى جانە كارىز جەلىلەرىنىڭ قۇرىلىسى اياقتالدى. جاڭا جەلىلەرگە شاعىن اۋداننىڭ 400 ءۇيى قوسىلدى.
سونداي-اق، «جاس قانات» شاعىن اۋدانىندا 8 كم سۋمەن جابدىقتاۋ جانە 8،6 كم كارىز جەلىسى سالىندى، بۇل جەردە بۇعان دەيىن تۇرعىندار اۋىز سۋدى ۇڭعىمالار ارقىلى الۋعا ءماجبۇر بولعان.
بۇعان قوسا، زاكارپاتسكايا كوشەسىندە 4،8 كم سۋمەن جابدىقتاۋ جانە 1،6 كم كارىز جەلىسىنىڭ قۇرىلىسى اياقتالدى. ال «تومەنگى بەسجىلدىق» شاعىن اۋدانىندا 115 كم سۋ قۇبىرى جانە 32 كم كارىز جۇيەسى سالىندى. 2024 جىلى «شۋاقتى» شاعىن اۋدانىندا كارىز سورعى ستانسياسى (كسس) سالىندى، بۇل ۆولوچايەۆسكايا كوشەسىندەگى 70 ءۇيدىڭ كارىز ماسەلەسىن شەشۋگە مۇمكىندىك بەردى.
تۇرعىنداردى كۇزگى-قىسقى ماۋسىمدا جىلۋمەن تۇراقتى قامتاماسىز ەتۋ ماقساتىندا 2024 جىلى سپاسسك-بەكماحانوۆ جانە بەكماحانوۆ-سۇيىنباي كوشەلەرىندەگى جالپى ۇزىندىعى 2،1 كم بولاتىن جىلۋ جەلىلەرىن جاڭارتۋ جۇمىستارى اياقتالدى. بۇل جەلىلەر 30 جىلدان استام ۋاقىت بۇرىن سالىنعان بولاتىن.
بۇل جوبالار تۇركسىب اۋدانىنىڭ 21 مىڭنان استام تۇرعىنىن ساپالى اۋىز سۋمەن جانە كارىز جۇيەسىمەن قامتاماسىز ەتۋگە مۇمكىندىك بەردى.