رەسپۋبليكا بويىنشا ۇمىتكەرلەر سانى - 281.
قازاقستاندا 1 قىركۇيەكتە پرەزيدەنت جانىنداعى جاستار كادرلىق رەزەرۆىنە ەكىنشى ىرىكتەۋ باستالدى. ەلدىڭ مەملەكەتتىك سەكتور رەزەرۆى قاتارىنا 50 ادام قابىلدانادى دەپ جوسپارلانۋدا. وڭىرلىك كوممۋنيكاسيالار قىزمەتىنىڭ بريفينگىندە الماتى قالاسى بويىنشا مەملەكەتتىك قىزمەت ىستەرى باسقارماسى باسشىسىنىڭ ورىنباسارى شىناراي ءالىمحان كانديداتتاردىڭ قانداي تالاپتارعا ساي بولۋى كەرەك ەكەنىن ايتتى، دەپ حابارلايدى Almaty-akshamy.kz.
شىناراي ءالىمحان پرەزيدەنتتىك كادرلىق رەزەرۆكە ۇمىتكەرلەر قازاقستان رەسپۋبليكاسىنىڭ ازاماتى بولۋى كەرەك ەكەنىن ايتتى.
«بايقاۋعا جاسى 35-تەن اسپاعان، جوعارى ءبىلىمدى مەن جۇمىس ءوتىلى 5 جىلدان كەم ەمەس ازاماتتار جىبەرىلەدى. قازىرگى ىرىكتەۋدىڭ جاڭاشىلدىعى – ۇمىتكەرلەر مەملەكەتتىك ءتىلدى مەڭگەرۋ دەڭگەيىن راستاۋى قاجەت. ول ۇلتتىق ستاندارتتارعا سايكەس ورتاشا دەڭگەيدەن (ۆ1) تومەن بولماۋى ءتيىس»، - دەدى دەپارتامەنت وكىلى.
شىناراي ءالىمحان كانديداتتاردىڭ مەملەكەتتىك تىلدە ءماتىن قۇرۋى، ءوز پىكىرىن دالەلدى تۇردە جەتكىزۋى جانە قاراپايىم ديالوگ جۇرگىزە الۋى كەرەكتىگىن ءتۇسىندىردى.
الدىڭعى ىرىكتەۋدەن ايىرماشىلىعى - كادرلاردى ىرىكتەۋ پروسەسى تەك قاجەتتى ءبىلىمدى، داعدى مەن قابىلەتتى عانا ەمەس، سونىمەن قاتار ۇمىتكەرلەردىڭ شىنايى موتيۆتەرى مەن ولاردىڭ نيەتتەرىن باعالايتىن بولادى.
«مەملەكەتتىك سەكتور ءۇشىن ەڭ الدىمەن قوعامدىق مۇددەلەردى باسشىلىققا الاتىن جاس تالانتتاردى تابۋ ماڭىزدى. سوندىقتان بارلىق ۇمىتكەرلەر ىرىكتەۋ كەزىندە سيتۋاسيالىق تاپسىرمالار مەن مىنەز-قۇلىق بويىنشا سۇحبات بەرەدى»، - دەپ جالعاستىردى شىناراي ءالىمحان.
قازاقستان رەسپۋبليكاسىنىڭ پرەزيدەنتى تاعايىنداعان ادامدار، ساياسي قىزمەتشىلەر، «ا» كورپۋسىنىڭ مەملەكەتتىك اكىمشىلىك قىزمەتشىلەرى، پرەزيدەنتتىك جاستار كادرلىق رەزەرۆىندە تۇرعان ادامدار ىرىكتەۋگە قاتىسا المايدى.
ىرىكتەۋدەن وتكەندەر «ا» كورپۋسىنىڭ ساياسي اكىمشىلىك لاۋازىمدارىنا جانە جەتەكشى - «ب» كورپۋسىنا تاعايىندالادى. رەزەرۆتە بولۋ مەرزىمى – 3 جىل.
بۇل رەتتە مەملەكەتتىك قىزمەت ىستەرى دەپارتامەنتىنىڭ وكىلى پرەزيدەنتتىك رەزەرۆكە تىركەلۋ رەزەرۆتە بولۋ كەزەڭىندە لاۋازىمدارعا مىندەتتى تۇردە تاعايىندالۋدىڭ شارتى بولىپ تابىلمايتىنىن اتاپ ءوتتى. تاعايىنداۋ رەزەرۆتەگى ادامداردىڭ جانە قولدانىستاعى زاڭناماعا سايكەس باسقا ادامداردىڭ اراسىنان دا جۇرگىزىلۋى مۇمكىن.
الماتى قالاسى بويىنشا مەملەكەتتىك قىزمەت ىستەرى باسقارماسى باستىعىنىڭ ورىنباسارى ش. ءالىمحان ىقتيمال رەزەرۆشىلەرگە دايىندالعان ىرىكتەۋ كەزەڭدەرى تۋرالى ايتىپ بەردى.
«العاشقى كەزەڭدە قۇجاتتار مامانداندىرىلعان ونلاين-پلاتفورمادا ءبىر اي ىشىندە قابىلدانادى. ەكىنشى كەزەڭدە ماتىندىك جانە ساندىق اقپاراتپەن جۇمىس ىستەۋ قابىلەتى باعالانادى. ال ءۇشىنشى كەزەڭدە سيتۋاسيالىق تاپسىرمالار بەرىلەدى»، - دەدى سپيكەر.
بولاشاقتاعى، ءتورتىنشى كەزەڭدە قۇزىرەتتىلىك ەكى بلوكتان باعالانادى: باعالاۋ ورتالىعى جانە قۇزىرەتتىلىك بويىنشا سۇحبات. بەسىنشى كەزەڭدە ۇمىتكەرلەر ساراپتامالىق كوميسسيادان سۇحباتتان وتەدى. پرەزيدەنت اكىمشىلىگىنىڭ جانىنان قۇرىلعان كوميسسيا الدىڭعى ىرىكتەۋ كەزەڭدەرىنەن ءساتتى وتكەن ءاربىر ۇمىتكەرمەن جەكە سۇحبات جۇرگىزەدى.
«سۇحباتتاسۋ ناتيجەلەرى بويىنشا ساراپتامالىق كوميسسيا رەزەرۆكە جازىلۋعا ۇسىنىلعان كانديداتتاردىڭ ءتىزىمىن جاسايدى، ول ۇلتتىق كوميسسيانىڭ قاراۋىنا جىبەرىلەدى. ىرىكتەۋدىڭ سوڭعى كەزەڭىندە ۇمىتكەرلەردى كادرلىق رەزەرۆ جونىندەگى ۇلتتىق كوميسسيا قارايدى»، - دەدى شىناراي ءالىمحان.
پرەزيدەنتتىك رەزەرۆكە ىرىكتەۋ تۋرالى تولىق اقپاراتتى pkrezerv.gov.kz سايتىنان بىلۋگە بولادى.
ايتا كەتەرلىگى، ىرىكتەۋدىڭ باستالعانىنا 9 كۇن ءوتتى، ال بۇگىنگى كۇنگى مالىمەتكە سايكەس، 7 قىركۇيەكتە الماتى قالاسى بويىنشا 45 ۇمىتكەر تىركەلدى، ال رەسپۋبليكا بويىنشا ۇمىتكەرلەر سانى - 281.