جىلدام ءارى ساپالى قىزمەت كورسەتۋ.
جۇيەلى رەفورما جانە پوليسيا جۇمىسىنىڭ سەرۆيستىك مودەلىن ەنگىزۋ اياسىندا مەملەكەت باسشىسى الماتى قالاسىنىڭ بارلىق اۋداندارىندا سەرۆيستىك ورتالىقتاردى اشۋدى تاپسىردى. ىشكى ىستەر ءمينيسترى مارات احمەتجانوۆ پەن قالا اكىمى ەربولات دوسايەۆ پوليسيا دەپارتامەنتىندە قوعام بەلسەندىلەرىمەن سەرۆيستىك ورتالىقتاردى اشۋ بويىنشا جوبانى تالقىلادى، دەپ حابارلايدى Almaty-akshamy.kz ءىىم باسپا ءسوز قىزمەتىنە سىلتەمە جاساپ.
«مەملەكەت باسشىسى جۇكتەگەن مىندەت – ءححى عاسىرداعى ادامعا باعدارلانعان پوليسيا. ونىڭ ولشەمى – حالىقتىڭ سەنىمى. حالىق سەنگەن كەزدە تىعىز بايلانىستا بولادى، سوندا ول پوليسيا جۇمىسىنىڭ تيىمدىلىگىن كورە الادى. جالپى، جوبانى ءبىز «سەرۆيستىك مودەل» دەپ اتايمىز. بۇگىنگى مىندەت – جىلدام ءارى ساپالى قىزمەت كورسەتۋ»، - دەدى مارات احمەتجانوۆ.
سونداي-اق ۆەدومستۆو باسشىسى «سەرۆيستىك ورتالىقتاردىڭ ماقساتتى اۋديتورياسى كىم بولادى؟» دەگەن سۇراققا جاۋاپ بەرىپ، ءوزارا ارەكەتتەسۋدىڭ ناقتى قۇرىلىمىن قۇرۋ جانە فۋنكسيالاردىڭ قايتالانۋىنا جول بەرمەۋ قاجەتتىگىن اتاپ ءوتتى.
ستاسيونارلىق پوليسيا عيماراتتارىندا بارلىق نەگىزگى قىزمەتتەر شوعىرلانعانى ايتىلدى. سونىمەن بىرگە بۇل عيماراتتاردىڭ رەجيمدىك تۇردە بولاتىنى ۇمىت قالمادى. ولارعا قولجەتىمدىلىك شەكتەۋلى. بۇرىن فرونت-كەڭسەلەر اشىلعان ەدى، ءبىراق ولار پوليسيانىڭ قابىلداۋ بولىمدەرى مەن انىقتامالىق بيۋرولارعا اينالدى، وندا ادامداردىڭ ناقتى پروبلەمالارى شەشىلمەۋى مۇمكىن.
سوندىقتان ءارتۇرلى اۋديتورياعا پوليسيا قىزمەتىن كورسەتۋدىڭ ءۇش دەڭگەيلى مودەلىن قۇرۋ ۇسىنىلادى. ءبىرىنشىسى – جولاۋشىلار نەمەسە وتكىنشى ادامدار. ولار ءۇشىن قوعامدىق ورىندارىنداعى مودۋلدىك بەكەتتەر جۇمىس ىستەيدى. ەكىنشىسى – ۋچاسكەلىك پوليسيا پۋنكتتەرىنە جۇگىنەتىن اۋدان (اۋماق) تۇرعىندارى. ءۇشىنشىسى – اكىمشىلىك جانە قىلمىستىق ىستەر بويىنشا شەشىمدەرمەن كەلىسپەگەن ادامدار، قۇقىق بۇزۋشىلار، قىزمەت الۋشىلار.
ازاماتتاردىڭ وتىنىشتەرىن قاراستىرۋ عانا ماڭىزدى ەمەس. ولار قۇقىقتىق ءتارتىپ ماسەلەلەرىن جان-جاقتى تالداۋدىڭ نەگىزدەرىنىڭ ءبىرى بولۋى كەرەك. بۇل سالاداعى پروفيلاكتيكا تەك پوليسيا قىزمەتىمەن شەكتەلمەيدى. ول ءۇشىن پوليسيانىڭ سەرۆيستىك ورتالىقتارى جانىنان ءارتۇرلى ۆەدومستۆولاردىڭ قۇقىق قورعاۋشىلارىنان، اكىمدىكتەر قىزمەتكەرلەرىنەن جانە قوعام بەلسەندىلەرىنەن تۇراتىن قاۋىپسىزدىكتى قامتاماسىز ەتۋدىڭ ۆەدومستۆوارالىق توپتارى قۇرىلادى.
قاۋىپسىزدىك ماسەلەلەرىن شەشۋ مينيسترلىكتەر كابينەتتەرىندە ەمەس، جەرگىلىكتى جەرلەردە جۇزەگە اسىرىلادى. بۇعان جۇرتشىلىق تىكەلەي قاتىسادى. بۇل «پروبلەماعا باعىتتالعان ءتاسىل» دەپ اتالادى.
سونىمەن قاتار كەزدەسۋدە قالادا بەينەباقىلاۋ جۇيەلەرىن دامىتۋ جانە جەكە جۇيەلەردى ءبىرىڭعاي ديسپەچەرلىك پۋنكتكە ينتەگراسيالاۋ تالقىلاندى.