الماتى قالاسىندا پوليسيا قىزمەتكەرلەرى ءوز بەتىنشە ارەكەت ەتۋگە بايلانىستى زاڭسىز ىس-ارەكەتتەر جاسادى دەگەن كۇدىكپەن ءبىر توپ ازاماتتى ۇستادى، - دەپ حابارلايدى aqshamnews.kz.
Polisia.kz حابارلاۋىنشا، تەرگەۋ ماتەريالدارىنا سايكەس، بىرنەشە ادام تۇرعىن ءۇي-جايعا زاڭسىز كىرىپ، يەلەرىنە كۇش قولدانىپ، ءوز تالاپتارىن ورىنداتۋعا تىرىسقان. قۇقىققا قايشى ارەكەتتەر بارىسىندا كۇدىكتىلەر سىرتقى بەينەسى اتىس قارۋىنا ۇقساس زاتتى پايدالانعان. بۇل جايت ازاماتتاردىڭ ءومىرى مەن دەنساۋلىعىنا ناقتى ءقاۋىپ توندىرگەن. جەدەل-تەرگەۋ ءىس-شارالارىنىڭ ناتيجەسىندە اتالعان قىلمىسقا قاتىسى بار بارلىق تۇلعالار انىقتالىپ، ۇستالدى. ءقاۋىپ توندىرەتىن زاتتار زاڭسىز اينالىمنان الىنىپ، تاركىلەندى. اتالعان دەرەك بويىنشا قىلمىستىق ءىس قوزعالىپ، قازىرگى ۋاقىتتا كۇدىكتىلەرگە قاتىستى سوتقا دەيىنگى تەرگەپ-تەكسەرۋ امالدارى جۇرگىزىلىپ جاتىر.
الماتى قالاسى پوليسيا دەپارتامەنتىنىڭ ۇيىمداسقان قىلمىسقا قارسى ءىس-قيمىل باسقارماسىنىڭ باستىعى جانات نۇرعالييەۆ بۇل تۋرالى بىلاي دەدى:
- ءبىز كۇش قولدانۋ مەن قورقىتۋ ارقىلى بوتەن مۇلىككە قول سۇعۋعا تىرىسقان توپتىڭ زاڭسىز ارەكەتىنە توسقاۋىل قويدىق. مۇنداي ءوز بەتىنشە ارەكەت ەتۋگە جول بەرىلمەيدى. پوليسيا ءاربىر تۇرعىننىڭ قاۋىپسىزدىگىن قامتاماسىز ەتۋ ءۇشىن جۇيەلى تۇردە جۇمىس جۇرگىزەدى. زاڭ تالاپتارىن بۇزعان ءاربىر ازامات زاڭ اياسىندا جاۋاپكەرشىلىككە تارتىلادى. سونىمەن قاتار ازاماتتاردىڭ ۋاقتىلى حابارلامالارى جەدەل ءارى ءتيىمدى شارالار قابىلداۋعا مۇمكىندىك بەرەتىنىن ەرەكشە اتاپ وتكىم كەلەدى، – دەپ تۇيىندەدى ول.