الماتىدا "جاياۋ جۇرگىنشى" جەدەل-پروفيلاكتيكالىق ءىس-شاراسى جالعاسۋدا.
وسى ورايدا قالالىق پوليسيا دەپارتامەنتىنىڭ قىزمەتكەرلەرى №28 جالپى ءبىلىم بەرەتىن مەكتەپكە ارنايى بارىپ، "جاس ساقشى" پوليسيا سىنىبىنىڭ وقۋشىلارىنا جول قوزعالىسى ەرەجەلەرىنە ارنالعان اشىق ساباق وتكىزدى.
ساباق بارىسىندا ءتارتىپ ساقشىلارى بالالارعا جولدا ءجۇرۋ مادەنيەتى مەن قوزعالىس ەرەجەلەرىنىڭ ماڭىزدىلىعىن قاراپايىم ءارى قىزىقتى تۇردە ءتۇسىندىرىپ، جاياۋ جۇرگىنشىلەردىڭ – سونىڭ ىشىندە بالالاردىڭ – قاۋىپسىزدىگىن قامتاماسىز ەتەتىن نەگىزگى قاعيدالارعا توقتالدى.
شارادا وقۋشىلار بەلسەندىلىك تانىتىپ، سۇراق-جاۋاپقا قاتىسىپ، العان بىلىمدەرىن بەكىتىپ، جولداعى ءتۇرلى وقىس جاعدايلاردى دۇرىس تالداۋدى ۇيرەندى.
– ساباق بارىسىندا بالالارعا كۇندەلىكتى ومىردە كەزدەسەتىن جول قاۋىپتەرى تۋرالى كەڭىنەن ايتىلدى. جاياۋ جۇرگىنشىلەر مەن جۇرگىزۋشىلەردىڭ ءجيى جىبەرەتىن قاتەلىكتەرى دە نازاردان تىس قالمادى. پوليسەيلەر جولدى قالاي دۇرىس كەسىپ ءوتۋ كەرەك ەكەنىن، قوعامدىق كولىك كۇتىپ تۇرعاندا ءقاۋىپسىز ورىن تاڭداۋدىڭ ماڭىزدىلىعىن جانە جاياۋ جۇرگىنشىلەر وتكەلىندە دە ساقتىق شارالارىن قاپەردە ۇستاۋ قاجەتتىگىن جان-جاقتى ءتۇسىندىردى، – دەدى مەدەۋ اۋداندىق پوليسيا باسقارماسى اكىمشىلىك پوليسيا ءبولىمىنىڭ باستىعى ارمان ۋسايەۆ.
"جاس ساقشى" سىنىبى – بالالاردىڭ قۇقىقتىق ساۋاتتىلىعىن ارتتىرىپ، قازاقستاندىق پوليسيا قىزمەتىنىڭ ەرەكشەلىكتەرىن تانىستىراتىن بىرەگەي جوبا. وسىنداي ساباقتار جاسوسپىرىمدەرگە قۇقىقتىق ءبىلىم بەرىپ قانا قويماي، ولاردى جولدا ءقاۋىپسىز ءجۇرىس-تۇرىس مادەنيەتىنە باۋليدى.
الماتى پوليسياسى بالالاردىڭ قاتىسۋىمەن بولاتىن جول-كولىك وقيعالارىنىڭ الدىن الۋ ماقساتىندا پروفيلاكتيكالىق جۇمىستاردى جۇيەلى تۇردە جۇرگىزۋدە. سونداي-اق ءتارتىپ ساقشىلارى اتا-انالاردى دا بالالارعا جولدا ءوزىن ءقاۋىپسىز ۇستاۋدىڭ قاراپايىم ءارى ماڭىزدى قاعيدالارىن ۇيرەتۋگە شاقىرادى.