الماتىدا پوليسەيلەر بەس ەر ادامنان 8،5 كەلى ەسىرتكى تاركىلەدى
الماتى قالاسىنىڭ ءتارتىپ ساقشىلارى ماريحۋانا ساتۋمەن اينالىسقان توپتى ۇستادى، دەپ حابارلايدى Almaty-akshamy.kz
قىلمىستىق توپ 35 پەن 52 جاس ارالىعىنداعى بەس ادامنان قۇرالعان. ءبارى الماتى وبلىسىنىڭ تۇرعىنى. نەگىزگى تۇلعا – 1983 جىلى تۋعان د.ەسىمدى ازامات.
«جەدەل جانە ارنايى ءىس-شارالار ناتيجەسىندە كۇدىكتىلەردىڭ قىلمىستىق ارەكەتى دالەلدەندى. انىقتالعانداي، ەسىرتكى زاتتارى – ماريحۋانا جانە اسا ءىرى مولشەردەگى گاشيشتى د.ەسىمدى ازامات جامبىل وبلىسىنان جەتكىزەدى. كۇدىكتى مىنگەن «مەرسەدەس» كولىگىن ارنايى جاساق ءبولىمىنىڭ قىزمەتكەرلەرى «دارابوز» ىقشاماۋدانىندا توقتاتتى. كولىكتى جانە كۇدىكتىلەردىڭ تۇرعىلىقتى جەرىن ءتىنتۋ بارىسىندا 8،5 كەلىدەن استام ەسىرتكى تابىلدى جانە تاركىلەندى. اتاپ ايتقاندا، «گاشيش» – 4 كگ 216،13 گ جانە «ماريحۋانا» – 4 كگ 361،01 گ»، - دەدى الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ.
سونىمەن قاتار سپيكەر قىلمىستىق كاسىپتى ۇيىمداستىرۋشىعا تيەسىلى ۇيدە ءۇش قارۋ تابىلعانىن ءمالىم ەتتى.
«قارۋدىڭ ەكەۋى جامبىل وبلىسىندا ۇرلانعانى بەلگىلى بولدى. تاعى ءبىر قارۋدىڭ كىمگە تيەسىلى ەكەندىگى تەرگەۋ تاعايىنداعان سوت-بالليستيكا ساراپتاماسى انىقتايدى. سوتقا دەيىنگى تەرگەۋدىڭ ءبىرىڭعاي تىزىلىمىنە ەسىرتكىنى زاڭسىز ساتۋ جانە اتىس قارۋىن زاڭسىز ساقتاۋ فاكتىسى بويىنشا بىردەن ەكى قىلمىستىق ءىس تىركەلدى»، - دەدى پوليسيا وكىلى.
كۇدىكتىلەر پد ۋاقىتشا ۇستاۋ يزولياتورىنا قامالدى.