ەلدە كوسمەتولوگيا، سونىڭ ىشىندە ەستەتيكالىق حيرۋرگيا نارىعى جىل ساناپ دامىپ بارادى.
پلاستيكالىق وتانىڭ الۋان ءتۇرى بار. سۇلۋ بولامىن دەپ، ءقاۋىپتى قادامعا، وتا جاساتۋعا باراتىندار دا از ەمەس.
جىل باسىنان بەرى قازاقستاندىقتار تاراپىنان مەديسينالىق قىزمەت ساپاسىنا قاتىستى 6 مىڭنان استام شاعىم تۇسكەن. سونىڭ 34ء-ى كوسمەتولوگيالىق قىزمەتكە قاتىستى، دەپ حابارلايدى akshamnews.kz.
24.kz ارناسى تاراتقان مالىمەتكە ساي، وسىدان بىرنەشە كۇن بۇرىن الماتىدات ارتىق سالماقتان ارىلامىن دەپ وتا جاساتقان 47 جاستاعى ايەل كوز جۇمدى. اياقاستى ومىردەن وزعان مارقۇمنىڭ ءسىڭلىسى ونىڭ ومىرگە قۇشتار جان بولعانىن ايتادى. سوزىنشە، اپكەسىنىڭ دەنساۋلىعىندا ەشقانداي كىنارات بولماعان.
دينارا باتىرحانوۆا، مارقۇمنىڭ ءسىڭلىسى:
كەشە ءبىز Instagram، جاڭاعى جەلىلەردەن وقىپ جاتىرمىز، سپورتپەن اينالىسسا، تاماعىن تىيدىرسا، اناۋ-مىناۋ بولار ەدى عوي دەپ. ءبىراق ول كىسى – سپورتپەن دە اينالىسقان، بەلسەندى ءومىر، سالاۋاتتى ءومىر سالتىن ۇستانعان كىسى. قانشا جەردەن ديەتا دا ۇستادى. ءبىراق ارتىق سالماقتان ايىرىلماعاننان كەيىن وسىنداي جاعدايعا كەلدى. ارتىق سالماق بولعاننان كەيىن اياعى ءىسىنىپ كەتكەن. ول ءبىر سۇلۋلىق، كەرەمەت ءبىر نارسە، سۇلۋلىق قۋىپ، پيار جاسايىن دەپ جۇرگەن ادام ەمەس.
مارقۇمنىڭ تۋىستارى وتا جاساعان دارىگەرلەردىڭ جۇمىستارىنا سالعىرت قاراعانىنا سەنىمدى. «ءتىپتى كەلىسىمشارتتا پاسيەنتتىڭ ومىرىنە ءقاۋىپ ءتونۋى مۇمكىن ەكەنى دە ەسكەرتىلمەگەن نە كورسەتىلمەگەن»، – دەيدى.
قۇرالايعا وتا جاساعان حيرۋرگ بولعان جاعدايعا قاتىستى قانداي دا ءبىر پىكىر بىلدىرۋدەن باس تارتتى. الايدا كلينيكانىڭ الەۋمەتتىك جەلىدەگى پاراقشاسىندا ول ءوز اتىنان جازبا جاريالاپتى. ول جەردە حيرۋرگ تەرگەۋ ءجۇرىپ جاتقاندىقتان، وقيعاعا قاتىستى ەشتەڭە ايتا المايتىندىعىن مالىمدەگەن. الدىن الا بولجام بويىنشا ءولىم سەبەبى – ميوكارد ينفاركتىسى. الايدا مارقۇمنىڭ تۋىستارى بۇل بولجاممەن كەلىسپەي، پوليسياعا شاعىم ءتۇسىردى.
سالتانات ازىربەك، الماتى قالاسى پد رەسمي وكىلى:
اتالمىش دەرەك بويىنشا قىلمىستىق ءىس قوزعالدى. ادام ءولىمىنىڭ سەبەبىن انىقتاۋ ماقساتىندا سوت-مەديسينالىق ساراپتاما تاعايىندالدى. ساراپتامالىق زەرتتەۋلەر مەن تەرگەۋ ارەكەتتەرى ناتيجەسىندە قىلمىستىق ءىس اياسىندا پروسەسسۋالدىق شەشىم قابىلداناتىن بولادى.
كەيىنگى كەزدە كوسمەتولوگيالىق قىزمەتتەردىڭ ساپاسىنا قاتىستى ەلدە شاعىم كوبەيگەن. جىل باسىنان بەرى قۇزىرلى ورگاندارعا 34 ارىز ءتۇسىپتى.
رايقۇل سپانديار، ق ر دسم مەديسينالىق جانە فارماسيەۆتيكالىق كوميتەتى باسقارماسى باسشىسىنىڭ مىندەتىن اتقارۋشى:
بۇل جەردە جابىرلەنۋشى تاراپ بىردەن پوليسياعا ارىز جازىپ وتىر. ءوز كەزەگىندە پوليسيا تەرگەۋ شارالارى نەمەسە سوت ساراپتاماسى اياسىندا ءبىزدىڭ مامانداردى سول مەكەمەنى تەكسەرۋگە تارتا الادى. ءبىزدىڭ بازادا تىركەلۋى ءۇشىن جابىرلەنۋشىلەر كوميتەتكە نەمەسە اۋماقتىق دەپارتامەنتكە شاعىم ءتۇسىرۋى كەرەك. سودان كەيىن 20 جۇمىس كۇنى ىشىندە تەكسەرۋ جۇمىستارىن جۇرگىزە الامىز.
مەديسينالىق، كوسمەتولوگيالىق قىزمەت كورسەتەتىن مەكەمەلەردىڭ ارنايى ليسەنزيا الاتىنى بەلگىلى. دەگەنمەن مامانداردىڭ ايتۋىنشا، ەشبىر قۇجات ادام دەنساۋلىعىنا تولىق كەپىلدىك بەرە المايدى. «سوندىقتان مەملەكەتتىك ورگاندار تاراپىنان باقىلاۋدى كۇشەيتۋ كەرەك»، – دەيدى ولار.
ارمان يسەنوۆ، زاڭگەر: - كوبىنەسە كليەنتتەر مەن ولاردىڭ قۇقىعىن قورعايتىن زاڭگەرلەر ساپاسىز قىزمەت كورسەتكەن ۇيىمعا تەكسەرۋ جۇرگىزۋگە شاعىم تۇسىرگەندە ءتيىستى ءىس-شارالاردىڭ بىردەن قولعا الىنبايتىنىن ايتىپ جاتادى. وسى ورايدا جەكەمەنشىك ۇيىمداردى تەكسەرۋ ءتارتىبىن وزگەرتۋ كەرەك دەپ ويلايمىن. مۇمكىن جوسپارلى تەكسەرىس جۇمىستارىن دا ءجيى وتكىزۋ كەرەك بولار.
قۇرالايدىڭ ارتىندا جان جارى، 3 بالاسى قالدى. تۋىستارى سوت-مەديسينالىق ساراپتاما قورىتىندىسىن كۇتىپ وتىر.