الماتىدا 18-24 قازان ارالىعىندا رەسپۋبليكالىق «تازا قازاقستان» باعدارلاماسى مەن قالالىق «جارقىن كۇز» ناۋقانى اياسىندا پلاستيك ىدىستاردى جيناۋ بويىنشا «Plastic Reboot» اكسياسى ءوتتى. ءبىر اپتا ىشىندە قالا تۇرعىندارى ەكولوگيالىق جاعدايدى جاقسارتۋعا دەگەن قىزىعۋشىلىقتارىن ءبىلدىرىپ، 26 950 دانا پلاستيك تاپسىردى. اسىرەسە، جەتىسۋ جانە المالى اۋداندارىنىڭ تۇرعىندارى بەلسەندىلىك تانىتتى.
«Plastic Reboot» اكسياسى قايتا وڭدەۋ يدەياسىن ناسيحاتتاۋعا جانە قوقىستى بولەك جيناۋ مادەنيەتىن قالىپتاستىرۋعا باعىتتالعان. ناۋقان بارىسىندا جينالعان پلاستيك قايتا وڭدەۋگە جىبەرىلىپ، تابيعاتقا كەرى اسەرىن تيگىزەتىن پلاستيك قالدىقتارىنىڭ كولەمىن ازايتۋعا مۇمكىندىك بەرەدى.
سونداي-اق، قالادا پلاستيك بوتەلكەلەردىڭ قاقپاعىن جيناۋ بويىنشا «مەيىرىمدى قاقپاق» اكسياسى جالعاسۋدا، ول قالاداعى وقۋ ورىندارىندا وتۋدە. اكسيا وسى جىلدىڭ جەلتوقسانىنا دەيىن جالعاسادى، وعان بالاباقشا تاربيەلەنۋشىلەرى، وقۋشىلار مەن ستۋدەنتتەر بەلسەندى تۇردە قاتىسىپ وتىر. ۇيىمداستىرۋشىلار بالالاردىڭ ەكو-جوبادا ماڭىزدى ءرول اتقاراتىنىن ايتادى، سەبەبى ولاردىڭ قاتىسۋى ارقىلى تابيعاتقا دەگەن وڭ كوزقاراس جاس كەزىنەن قالىپتاسادى.
قاقپاقتاردى جيناۋ ناتيجەسىندە قايتا وڭدەلگەن پلاستيكتەن جاسالعان ەرەكشە جاڭاجىلدىق شىرشا قۇرۋ جوسپارلانىپ وتىر. بۇل سيمۆوليكالىق ارت-نىسان جاڭا جىل مەرەكەلەرىندە قالا الاڭدارىنىڭ بىرىنە ورناتىلىپ، تۇرعىنداردىڭ نازارىن قايتا وڭدەۋدىڭ جانە ەكولوگيالىق ءومىر سالتىنىڭ ماڭىزدىلىعىنا اۋدارۋعا باعىتتالادى.