الماتىدا پد «استانا – چەلسي» ماچى كەزىندە قاۋىپسىزدىكتى قامتاماسىز ەتۋ شارالارى تۋرالى ايتتى

قالالىق پوليسيا قىزمەتتەرى مەن بولىمشەلەرىنىڭ جەكە قۇرامى كۇشەيتىلگەن كەزەكشىلىك رەجيمىنە كوشتى.

الماتىنىڭ ورتالىق ستاديونىندا 12 جەلتوقسان كۇنى وتەتىن «استانا – چەلسي» فۋتبول ماچى قارساڭىندا پوليسيا دەپارتامەنتى قاۋىپسىزدىكتى قامتاماسىز ەتۋگە باعىتتالعان كەشەندى شارالار قابىلدادى، دەپ حابارلايدى aqsamnews.kz Polisia.kz-كە سىلتەمە جاساپ. 

– الماتى پوليسيا دەپارتامەنتى ماچ كەزىندە ورتالىق ستاديوننىڭ اۋماعىندا جانە وعان جاقىن جەرلەردە ءتارتىپ پەن جول قاۋىپسىزدىگىن قاداعالايدى. قالا تۇرعىندارى مەن قوناقتاردىڭ نازارىنا 12 جەلتوقسان كۇنى ساعات 18:30-دان 00:00-گە دەيىن اباي داڭعىلىنىڭ (بايتۇرسىنوۆ كوشەسىنەن مۇقانوۆ كوشەسىنە دەيىن) كولىك قوزعالىسى شەكتەلەتىنى، ال ساتبايەۆ كوشەسىنىڭ (بايتۇرسىنوۆ كوشەسىنەن بايزاقوۆ كوشەسىنە دەيىن) تولىعىمەن جابىلاتىنى تۋرالى ەسكەرتەمىز. جولداعى ءتارتىپتى ساقتاۋ ماقساتىندا جاقىن ماڭداعى كوشەلەردە پاترۋلدىك پوليسيا بەكەتتەرى قويىلادى، – دەدى الماتى قالالىق پد جەرگىلىكتى پوليسيا قىزمەتى باسقارماسىنىڭ باستىعى سەرىك شۋمايەۆ.

سونىمەن قاتار جانكۇيەرلەرگە ستاديونعا ەرتەرەك كەلىپ، كەپتەلىستەردى بولدىرماۋ ءۇشىن قوعامدىق كولىكتى پايدالانۋعا كەڭەس بەرىلەدى. فۋتبول ويىنىنا ارنالعان ورتالىق ستاديوننىڭ ەسىگى جانكۇيەرلەر ءۇشىن ساعات 18:00-دە اشىلادى.