الماتىدا پاتەر ۇرىلارى ۇستالدى

الماتى قالاسىندا پاتەر توناۋمەن اينالىسقان قىلمىستىق توپ قۇرىقتالدى. بۇل تۋرالى Polisia.kz سايتىنا سىلتەمە جاساپ، Aqshamnews.kz حابارلايدى.

الماتى كريمينالدىق پوليسياسى ارنايى جاساقتىڭ كومەگىمەن بايزاقوۆ پەن بۇقار جىراۋ كوشەلەرىنىڭ قيىلىسىندا 38 بەن 45 جاس ارالىعىنداعى ءتورت ەر ادامدى ۇستادى. ولار – الماتى جانە جامبىل وبلىستارىنان كەلگەن.

كۇدىكتىلەر وتكەن دەمالىس كۇندەرى شاشكين كوشەسىندەگى ۇيلەردىڭ بىرىنە تەرەزەنى كۇشتەپ اشىپ، تەمىر تورلاردى كەسۋ ارقىلى كىرگەن. ولار پاتەردەن التىن بۇيىمدار مەن اقشالاي قاراجاتتى ۇرلاعان. ۇستاۋ بارىسىندا ايعاقتى زاتتار تاركىلەنىپ، قىلمىستىق ىسكە قوسىلدى.

الماتى قالالىق پد كريمينالدىق پوليسيا باسقارماسىنىڭ باستىعى تالانت يسايەۆتىڭ مالىمدەۋىنشە، كۇدىكتىلەر قاماۋعا الىنىپ، ولاردىڭ باسقا ۇقساس قىلمىستارعا قاتىسى بار-جوعى تەكسەرىلۋدە. قىلمىستىق ءىس بوستاندىق اۋداندىق پوليسيا باسقارماسى تاراپىنان تەرگەلۋدە.

ق ر قىلمىستىق كودەكسىنىڭ 201-بابىنا سايكەس، تەرگەۋ مۇددەسىنە بايلانىستى قوسىمشا مالىمەتتەر جاريالانبايدى. سونىمەن قاتار، قازاقستان رەسپۋبليكاسىنىڭ كونستيتۋسياسىنا سايكەس، سوتتىڭ زاڭدى شەشىمى شىققانعا دەيىن كۇدىكتىلەر كىناسىز دەپ سانالادى.