الماتىدا پاتەر توناعان ەكى ۇرى ۇستالدى

الماتى پوليسياسى پاتەر ۇرىلارىن قولعا ءتۇسىردى.

الماتىدا ۇستالعان قىلمىستىق توپتىڭ كەم دەگەندە ءۇش پاتەر توناعاندىعى دالەلدەندى، دەپ حابارلايدى Almaty-akshamy.kz Polisia.kz-كە سىلتەمە جاساپ.

 «ەكى قاسكوي دە 31 جاستا. ولاردى پوليسيانىڭ ارنايى جاساعىنىڭ كومەگىمەن ءبىزدىڭ بولىمشەنىڭ قىزمەتكەرلەرى جەدەل-ىزدەستىرۋ ءىس-شارالارىن جۇرگىزۋ بارىسىندا ۇستادى. ورىنداۋشى – ب.ەسىمدى ازامات. ونىڭ جۇرگىزۋشىسى – ت.ەسىمدى ازامات. ۇنەمى قىراعى بولدى: ول كولىكتە وتىردى جانە كىشكەنە ءقاۋىپ تونە قالسا، ەسكەرتۋى كەرەك بولدى. قىلمىس جاساۋ تىزبەگى ستاندارتتى: كۇدىكتىلەر اۋلالاردى ارالاپ، كوپقاباتتى ۇيلەردىڭ تەرەزەلەرى مەن كىرەبەرىستەرىن قاراپ جۇرگەن. ولار كىرەبەرىسكە كىرىپ، كىلتتى تاڭداۋ ارقىلى پاتەرگە كىرەتىن ەسىكتى اشتى جانە قۇندى نارسەلەردىڭ ءبارىن الىپ شىقتى. سوڭعى دەرەك قابدولوۆ كوشەسىندەگى ۇيلەردىڭ بىرىندە تىركەلدى»، – دەدى الماتى قالالىق پد كريمينالدىق پوليسيا باسقارماسىنىڭ باستىعى قۋاتبەك ناۋاتوۆ.

ۇستالعانداردىڭ ەكەۋى دە بۇرىن ۇرلىق جاساعانى ءۇشىن جازاسىن وتەگەن. قازىرگى ۋاقىتتا كۇدىكتىلەردىڭ جالپى الماتى قالاسى بويىنشا ءۇش پاتەر توناۋ دەرەگىنە قاتىسى بار ەكەندىگى انىقتالدى. قاسكويلەر ۋاقىتشا ۇستاۋ يزولياتورىنا قامالدى.

ق ر قك-نىڭ 188-بابى 3-بولىگى بويىنشا سوتقا دەيىنگى تەرگەۋ امالدارى جۇرگىزىلۋدە.