ول مۋزەيدە 20 جىلعا جۋىق ەڭبەك ەتكەن.
قاڭتار وقيعاسىندا ورتالىق مۋزەي جادىگەرلەرىن ساقتاپ قالعان مامان جارتى جىلدان بەرى جۇمىسسىز ءجۇر، دەپ حابارلايدى Almaty-akshamy.kz Halyq Uni سايتىنا سىلتەمە جاساپ.
بيبىگۇل داندىعارايەۆانىڭ ايتۋىنشا، ول الماتىداعى مەملەكەتتىك ورتالىق مۋزەي ديرەكتورىنىڭ ورىنباسارى قىزمەتىنەن كەتۋگە ءماجبۇر بولعان.
«وسى مۋزەيدە قاراپايىم عىلىمي قىزمەتكەردەن باستاپ ديرەكتوردىڭ ورىنباسارى بولعانعا دەيىنگى ارالىقتا 20 جىلعا جۋىق جۇمىس ىستەدىم. مۋزەيگە جاڭا باسشى كەلگەن سوڭ، كەمشىلىكتەردىڭ بارلىعىن ماعان جاۋىپ، قىزمەتتەستەرىمنىڭ الدىندا ەشقانداي ابىرويىم دا قالمادى. شىداماي، شىعىپ كەتتىم. ءقازىر 5 ايدان بەرى جۇمىسسىز وتىرمىن. مادەنيەتتى اداممىن، ونىمەن ۇرسىسىپ جاتپايمىن عوي. ماماندىعى گەولوگ بولعان جاڭا باسشى اتىراۋداعى ولكەتانۋ مۋزەيىنەن كەلىپ وتىر. بۇل – مەگاپوليس، قازاقستانداعى ەڭ كونە مۋزەي»، - دەپ ءتۇسىندىردى ول.
ونىڭ ايتۋىنشا، مۋزەيگە جاڭا باسشى كەلگەن سوڭ، مۋزەيدىڭ بۇرىنعى قىزمەتكەرلەرى جۇمىستان كەتۋگە ءماجبۇر بولعان.
«ديرەكتور كەلگەن سوڭ، باسپا ءسوز قىزمەتى دە، باس ەسەپشى، ەكى ورىنباسار دا جۇمىستان كەتتى. قاڭتار وقيعاسىندا ءوزىم جۇگىرىپ جالعىز شىققانىم راس. ءبارىمىز قورقىپ كەتتىك ول كەزدە. قاڭتار وقيعاسىندا قورىقپاي شىعىپ، ءومىرىمدى قيا جازدادىم. مۋزەيگە جيىرما جىل ءومىرىمدى بەردىم. مۋزەيدە ساقتالىپ تۇرعان ءاربىر قۇندىلىق ماعان وتە قىمبات. مەنىڭ ەلىمنىڭ تاريحى - ءوزىمنىڭ تاريحىم. قىمبات قۇندىلىقتاردى قولىممەن ۇستاپ، كوزىممەن كورگەنىم ۇلكەن ەستەلىك بولىپ قالدى»، - دەيدى بيبىگۇل داندىعارايەۆا.
ايتۋىنشا، وسى وقيعادان سوڭ كۇيزەلىسكە ءتۇسىپ، وز-وزىنە كەلە الماعان. تىپتەن ءجۇرىپ-تۇرۋعا قارجىسى دا قالماعانىن ايتادى.
«وسى وقيعادان سوڭ، ەكى اي سترەسس الىپ، دەپرەسسياعا ءتۇستىم. باسىمدى كوتەرگەنىم ەندى، مىنەكەي. ءقازىر قىزدارىم قارايدى. ەسىمدى جيىپ، جۇمىس ىزدەپ جاتىرمىن. ەشقايدا شىقپايمىن. جۇرۋگە دە قاراجاتىم جوق. جاسىم 54-كە كەلدى. ماعان اۋىر بولىپ تۇر. وسىنشاما جىل جۇمىس ىستەپ، ەڭبەك تاجىريبەمدى ەسكەرمەگەنى ءۇشىن وكپەلىمىن»، - دەيدى تاجىريبەلى مامان.
قاڭتاردىڭ 5ء-ى كۇنى الماتىدا جاعداي شيەلەنىسە باستاعاندا، بەلگىسىز بىرەۋلەر مۋزەيدىڭ ورتالىق ەسىگىن بۇزىپ كىرگەن. سول كەزدەگى مۋزەي قىزمەتكەرى بيبىگۇل داندىعارايەۆا ولارمەن كەلىسسوز جۇرگىزىپ، مۋزەي ەكسپوناتتارىن امان الىپ قالعان بولاتىن.
«دالادا ءورت بولىپ جاتتى. ايدالادان وق اتىلىپ، مۋزەيدىڭ تەرەزەلەرى سىندى. جان-جاعىنا قاراساڭىز، وسى ماڭداعى عيماراتتاردىڭ ءبارى ورتەنگەن، قيراعان، سول قيراندىلار اراسىندا مۋزەي عانا بۇلىنبەگەن قالىپتا تۇر. بۇلىكشىلەر نەگە توقتادى؟ مۇمكىن مەن ايەل بولعاندىعىم ءۇشىن شىعار، ەر ادام شىعىپ سويلەسە، جاعداي باسقاشا بولۋى مۇمكىن ەدى. انانى قۇرمەتتەيتىن حالىقپىز، وسى جاعداي دا اسەر ەتكەن شىعار»، - دەپ ەسكە الدى بيبىگۇل داندىعارايەۆا.
وسى جاعدايدان سوڭ پرەزيدەنت قاسىم-جومارت توقايەۆ بيبىگۇل داندىعارايەۆانى «پاراسات» وردەنىمەن ماراپاتتاعان بولاتىن.
«ونىڭ ەرلىگى مەن وتانسۇيگىشتىگى ارقاسىندا قاڭتارداعى تارتىپسىزدىكتەر كەزىندەگى مۋزەيدىڭ قۇندى ەكسپوناتتارى ساقتالىپ قالدى. بۇل – ناعىز ەرلىك»، - دەگەن بولاتىن مەملەكەت باسشىسى.