الماتىدا اشىق اسپان استىنداعى تەاتردى، مۋزىكانى، الەۋمەتتىك باستامالار مەن ەكولوگيالىق شىعارماشىلىقتى بىرىكتىرگەن «پانفيلوۆتاعى جاڭا جىل» قالالىق جاڭا جىلدىق فەستيۆالى ءوتتى، دەپ حابارلايدى aqshamnews.kz
بىرنەشە كۇنگە سوزىلعان مەرەكە قالا تۇرعىندارى مەن قوناقتارى ءۇشىن جارقىن ەموسيا مەن ەرەكشە مادەني تاجىريبەگە تولى كەڭىستىككە اينالدى.
فەستيۆالدىڭ باستى وقيعاسى – الماتى قالاسىنىڭ ەرەكشەلىكتەرىن ەسكەرە وتىرىپ ارنايى دايىندالعان ءۇش مەترلىك قۋىرشاقتار قاتىسقان «الما مەن اتا» اتتى بىرەگەي كوشەلىك تەاترلاندىرىلعان شوۋ بولدى. الىپ قۋىرشاق-قاھارماندار اكتەرلەرمەن بىرگە مەيىرىم، جارىق پەن ادام جۇرەگىنىڭ كۇشى تۋرالى اسەرلى وقيعانى كورەرمەندەرگە ۇسىندى. يممەرسيۆتى فورماتتاعى قويىلىم بارلىق كورسەتىلىمدە كوپشىلىك قىزىعۋشىلىعىن تۋدىرىپ، انشلاگپەن ءوتتى.
«بۇل ءبىز ءومىر ءسۇرىپ جاتقان قالا، ادامدار جانە اركىم ءوز قولىمەن جاساي الاتىن جارىق تۋرالى فەستيۆال. ءبىز الماتىنىڭ شىنايى بولمىسىن – جىلى، اشىق جانە دوستىق رۋحىن قايتا سەزىنگىمىز كەلدى. قوناقتاردان كەلگەن كەرى بايلانىس بۇل ماقساتتىڭ جۇزەگە اسقانىن كورسەتتى»، – دەپ جوبا تەك جاڭا جىلدىق مەرەكەسىمەن شەكتەلمەيتىنىن ايتتى فەستيۆال پروديۋسەرى مايرا يزمايلوۆا.
مۋزىكالىق باعدارلاما فەستيۆالدىڭ جارقىن بولىگىنە اينالدى. پانفيلوۆ كوشەسى بويىندا بىرنەشە كۇن قاتارىنان DJ-مارافون ءوتىپ، قالانىڭ ۇزدىك ديدجەيلەرى 30 جەلتوقسانعا دەيىن ونەر كورسەتەدى. مۋزىكا مەن مەرەكەلىك اتموسفەرا ورتالىق كوشەنى ۇلكەن قالالىق مەيرام الاڭىنا اينالدىردى.
سونىمەن قاتار فەستيۆال اياسىندا جاس مۋزىكانتتار بايقاۋى ۇيىمداستىرىلىپ، جاڭا ەسىمدەر، جاندى ورىنداۋلار مەن كورەرمەن ەنەرگياسى فەستيۆال ساحناسىن اشىق شىعارماشىلىق كەڭىستىككە اينالدىردى. بايقاۋ ناتيجەسى 10 قاڭتار كۇنى ونلاين فورماتتا جاريالانادى.
27 جەلتوقساننان باستاپ فەستيۆال اۋماعىندا Snow Park قىسقى پاركى جۇمىسىن باستادى. بۇل تاۋ شاڭعىسى مەن سنوۋبوردتاعى فريستايل اۋەسقويلارىنا ارنالعان ارنايى ايماق. Snow Park 4 قاڭتارعا دەيىن كۇن سايىن 12:00-دەن 22:00-گە دەيىن جۇمىس ىستەيدى. قالانىڭ قاق ورتاسىندا سىرعاناپ، جاڭا جىلدىق اتموسفەرانى سەزىنۋ – الماتى ءۇشىن بىرەگەي تاجىريبە بولدى.
«ەكو-شىرشا الماتى» اللەياسى قوناقتاردىڭ ەرەكشە قىزىعۋشىلىعىن تۋدىردى. قايتا وڭدەلگەن جانە ەكىنشى رەتتىك ماتەريالداردان جاسالعان ارت-شىرشالار كورمەسىنە open-call ارقىلى 30-دان استام ءوتىنىم ءتۇسىپ، فينالعا 15 جوبا ءوتتى. ءار فيناليستكە يدەياسىن جۇزەگە اسىرۋ ءۇشىن 100000 تەڭگە كولەمىندە گرانت بەرىلدى. ەكو-شىرشالار اللەياسى 31 جەلتوقسانعا دەيىن قالا تۇرعىندارى مەن قوناقتارىنا اشىق بولادى. قازىلار القاسىنىڭ داۋىس بەرۋ ناتيجەسى بويىنشا بايقاۋ جەڭىمپازدارى 28 جەلتوقسان كۇنى انىقتالىپ، اقشالاي سىيلىقتار تابىستالدى.
فەستيۆالدىڭ الەۋمەتتىك جۇرەگىنە اينالعان جوبا «يگى ىستەرى كيىز ءۇيى» قايىرىمدىلىق اكسياسى بولدى. قوناقتار قولداۋعا مۇقتاج بالالار مەن ەرەسەكتەردىڭ ارمانى جازىلعان حاتتارىن وقىپ، تىلەكتەرىن ورىنداۋعا مۇمكىندىك الدى. بۇل باستاما مەيىرىم، جاناشىرلىق جانە ورتاق جاۋاپكەرشىلىك سىندى فەستيۆالدىڭ باستى قۇندىلىقتارىن ايقىن كورسەتتى.
«پانفيلوۆتاعى جاڭا جىل» فەستيۆالى الماتىنىڭ مادەني ومىرىندەگى ماڭىزدى وقيعاعا اينالىپ، قالاداعى مەرەكەنىڭ جاڭا فورماتىن، الەۋمەتتىك جاۋاپكەرشىلىك پەن ەكولوگيالىق سانانى بىرىكتىرگەن الاڭ رەتىندە ەستە قالدى.