بيىل اقساي، ۇلكەن جانە كىشى الماتى وزەندەرىنىڭ باسسەيندەرىندەگى 7 كولدى بوساتۋ جۇمىستارى جۇرگىزىلەدى.
بۇل تۋرالى قالالىق توتەنشە جاعدايلار دەپارتامەنتىنىڭ باسپا ءسوز قىزمەتى ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«الماتى ماڭىندا 45 مورەنالىق جانە مۇزدىق كول ورنالاسقان، ولاردىڭ ىشىندە اسا ءقاۋىپتىسى – 12. الماتى قالاسىنىڭ اۋماعىندا سەلمەن كۇرەسۋدىڭ ەڭ ءتيىمدى ءادىسى - مورەنالىق كولدەردى بوساتۋ بويىنشا الدىن الۋ جۇمىستارىن جۇرگىزۋ. بيىل اقساي، ۇلكەن جانە كىشى الماتى وزەندەرىنىڭ باسسەيندەرىندەگى 7 كولدى بوساتۋ جۇمىستارى اۋا رايىنىڭ قولايسىزدىعىنا جانە تاۋلى ايماقتىڭ تومەن تەمپەراتۋرالىق جاعدايىنا بايلانىستى ءبىر اي كەشىرەك باستالدى»،-دەپ حابارلادى ۆەدومستۆودان.
الدىن الۋ جۇمىستارىنا بارلىعى 40 ادام كىرىسىپ، بۋلدوزەرلەر ىسكە قوسىلدى، ەۆاكۋاسيالىق كانالداردى تازارتۋ جانە تەرەڭدەتۋ جۇمىستارىن جۇرگىزۋ جوسپاردا بار.
«سۋدى قوسىمشا ايداۋ ءۇشىن ارنايى پونتونداردا 10 بىرلىك ونىمدىلىگى جوعارى سۋ سورۋ قوندىرعىلارى دايىندالدى. سونداي-اق، سۋ اعىزۋ بەلگىلەنگەن سيفوندى قۇبىرلار جەلىلەرى بويىنشا جۇزەگە اسىرىلادى. №6 جانە 13 بيس كولدەرىندەگى ەكى سيفون جەلىسى اۆتوماتتى تۇردە قوسىلدى. ۇلكەن الماتى وزەنى باسسەينىندەگى №8 جانە 13 بيس ءقاۋىپى بار كولدەردە قوسىمشا 2 جەلىنى قوسۋ جوسپارلانۋدا، ول ءۇشىن 2900 مەتر پوليەتيلەن قۇبىرلارى دايىندالدى»،- دەپ اتاپ ءوتتى قالالىق تجد باسپا ءسوز قىزمەتىنەن.
مورەنالىق كولدەردىڭ جاي-كۇيىنە باقىلاۋ جۇرگىزۋ ءۇشىن تۇراقتى نەگىزدە جۇمىس ىستەيتىن 9 بەكەتكە قوسىمشا 10 بيىك تاۋلى ماۋسىمدىق بەكەتتەر قويىلعان. سەل ءقاۋپى بار كەزەڭدە بارلىعى 19 بەكەت جۇمىس ىستەيتىن بولادى. سونداي-اق توتەنشە جاعدايلار دەپارتامەنتى سەل ءقاۋپىن اۆتوماتتاندىرىلعان مونيتورينگ ارقىلى باقىلايدى.