رەكوردتىق كورسەتكىش.
الماتىدا جۇگىرۋدەن جارتىلاي مارافون ءوتتى. تۇڭعىش پرەزيدەنت ساياباعىنان باستالعان جارىسقا 5 500 ادام قاتىسىپ، رەكوردتىق كورسەتكىش ورناتتى، دەپ حابارلايدى Almaty-akshamy.kz Almaty.tv سىلتەمە جاساپ.
جەلاياقتار قالا كوشەلەرىمەن جۇگىرىپ ءوتىپ، ورتالىق ستاديونعا دەيىن جەتتى. داستۇرگە اينالعان سپورتتىق شارانىڭ اشىلۋ سالتاناتىنا قالا اكىمىنىڭ ورىنباسارى ارمان قىرىقبايەۆ قاتىسىپ، مۇنداي يگى باستامالاردىڭ قاشاندا قولداۋعا يە بولاتىنىن جەتكىزدى.
جۇگىرۋ الاڭىنان جەتكىنشەكتەر مەن جاسى 80 جاستاعى ەگدە كىسىلەردى دە بايقاۋعا بولادى. ءبارى دە - سپورت پەن سالاۋاتتى ءومىر سالتىن جانىنا سەرىك ەتكەندەر. ولاردىڭ قاتارىندا جۇگىرۋدەن ءتۇرلى دارەجەدەگى سپورت شەبەرلەرى، جەڭىل اتلەتتەر جانە جۇگىرۋمەن اۋەسقوي تۇردە اينالىساتىندار بار.
ءال-فارابي داڭعىلى بويىنان باستالعان مارافون اباي داڭعىلىنداعى ورتالىق ستاديونعا دەيىن جالعاستى. وسى ارالىقتاعى جولدار جابىلىپ، قوعامدىق كولىكتەر ۋاقىتشا توقتاتىلدى. اينالاسى ءبىر ساعاتتىڭ ىشىندە العاشقى 10 شاقىرىمدى جۇگىرىپ وتكەندەر مارە سىزىعىنا كەلىپ تە ۇلگەردى.
سوڭعى كەزدەرى الماتى مارافونىنا الىس-جاقىن شەت ەلدەن ارنايى كەلەتىندەردىڭ دە قاتارى ارتقان. ۇيىمداستىرۋشىلار كوپشىلىكتى قىزىقتىرعان سپورتتىق شارا شامامەن 5 جىلدىڭ ىشىندە اۋقىمىن كەڭەيتتى دەيدى.
«رەسەي، قىرعىزستان، وزبەكستاننان وزگە دە ءتۇرلى ەلدەن كەلىپ جاتىر. بۇگىن جارىسقا 5 500 ادام قاتىسىپ وتىر. ونىڭ ىشىندە تەڭ جارتىسى 10 شاقىرىمعا، قالعانى 21 شاقىرىمعا جۇگىردى. سكانديناۆيالىق ءجۇرىس بار جانە دەنساۋلىق ەرەكشەلىگىنە بايلانىستى اربامەن قاتىساتىن سپورتشىلاردا بار. جارىس وتە قىزىقتى ءوتىپ جاتىر، قۋانىشتىمىز»، – دەدى ۇيىمداستىرۋشى يسا قالقا.
10 شاقىرىم جولدى بارىنەن باسىپ وزىپ، ءبىرىنشى كەلگەن دەنيس ستەپانەنكو جەڭىمپاز اتاندى. ال ايەلدەر اراسىندا ەكاتەرينا گريساي العاشقى بولىپ كەلدى. 21 شاقىرىم جۇگىرىپ وتكەندەر 350-450 مىڭ اقشالاي سىيلىقپەن ماراپاتتالدى. شارا سوڭى كونسەرتتىك باعدارلاماعا ۇلاستى.