الماتى اكىمى دارحان ساتىبالدى مەملەكەت باسشىسىنىڭ تاپسىرماسى اياسىندا جۇزەگە اسىرىلىپ جاتقان ءىرى ءعىلىمي-بىلىم بەرۋ جوبالارىنىڭ ءبىرى — الماتىداعى بالالار عىلىمي مۋزەيىنىڭ قۇرىلىس بارىسىمەن تانىستى. جوبا سينگاپۋر عىلىم ورتالىعى جانە مۋزەيلىك شەشىمدەر ازىرلەۋ سالاسىندا تاجىريبەسى مول Kingsmen Exhibit PTE LTD كومپانياسىمەن بىرلەسىپ جۇزەگە اسىرىلىپ جاتىر.
بۇل باستاما قازاقستانداعى العاشقى ينتەراكتيۆتى كەڭىستىك بولماق. ول بالالاردىڭ عىلىم، تەحنولوگيا، ينجەنەريا جانە ماتەماتيكا سالالارىنا (STEM) دەگەن قىزىعۋشىلىعىن ەرتە جاستان دامىتۋعا باعىتتالعان.
ءقازىر نىساندا بۇزۋ جۇمىستارى اياقتالىپ، تەحنيكالىق ساراپتامانىڭ قورىتىندىسىنا ساي قۇرىلىمداردى كۇشەيتۋ جۇمىستارى باستالدى. قۇرىلىس بارىسىن الماتى قالاسى اكىمدىگىنىڭ سالالىق باسقارمالارى مەن ءبىلىم بەرۋ، سونداي-اق ESG-ينتەگراسيا سالالارىنداعى حالىقارالىق ساراپشىلار بىرلەسە قاداعالاپ وتىر.
سينگاپۋر ۇلتتىق عىلىم اكادەمياسىنىڭ پرەزيدەنتى، سينگاپۋر عىلىم ورتالىعىنىڭ باس ديرەكتورى، دوكتور تيت مەنگ ليممەن وتكەن جۇمىس كەزدەسۋى بارىسىندا جوبانى جۇزەگە اسىرۋ بارىسى كەڭىنەن تالقىلاندى. اڭگىمە اياسىندا سينگاپۋرلىق مۋزەيدى باسقارۋ مودەلىن بەيىمدەۋ جانە وسى سالادا بىلىكتى ماماندار دايارلاۋ جايى قوزعالدى. دوكتور ليم جوبا كومانداسىن وقىتۋ مەن وزىق ادىستەمەلەردى ەنگىزۋ تۇرعىسىنان جان-جاقتى قولداۋ كورسەتۋگە ءازىر ەكەنىن ءبىلدىردى.
جوبادا ينكليۋزيۆتىلىك ماسەلەسىنە ايرىقشا ءمان بەرىلگەن: ەرەكشە ءبىلىم بەرۋ قاجەتتىلىگى بار بالالارعا جايلى جاعداي جاسالادى. اتاپ ايتقاندا، اۋتيزممەن اۋىراتىن بالالار ءۇشىن ارنايى بولمە جابدىقتالادى.
«ءبىز الماتىدا جاي مۋزەي ەمەس، بالالاردىڭ عىلىممەن ەركىن تىلدەسە الاتىن، تانىمدىق قىزىعۋشىلىعىن وياتىپ، زەرتتەۋشىلىك قابىلەتىن كەڭىستىك قۇرىپ جاتىرمىز. بۇل ۇلتتىڭ زياتكەرلىك بولاشاعىن قالىپتاستىرۋ جولىنداعى ماڭىزدى قادام»، - دەدى دارحان ساتىبالدى.
قالا اكىمى جوبانىڭ ساپالى ءارى مەرزىمىندە ورىندالۋىن تاپسىردى. سونىمەن قاتار بالالار عىلىمي مۋزەيىن قالانىڭ مەكتەپكە دەيىنگى جانە باستاۋىش ءبىلىم بەرۋ جۇيەسىنە ۇيلەسىمدى بىرىكتىرۋدىڭ ماڭىزىن ايتتى. مۋزەي 2026 جىلى اشىلادى.