كورمەگە قازاقستان، تۇرىكمەنستان، وزبەكستان جانە گرۋزيا ەلدەرىنەن كەلگەن قولونەر شەبەرلەرى قاتىسادى
2021 جىلدىڭ 3 – 5 جەلتوقسان كۇندەرى قازاقستان رەسپۋبليكاسى مەملەكەتتىك ورتالىق مۋزەيىندە «ارت-شىعىس بازارى» اتتى ورتالىق-ازيالىق ءداستۇرلى قولونەر كورمە-جارمەڭكەسى وتەدى.
جاڭا جىلدىق مەرەكە قارساڭىندا كەلۋشىلەردىڭ نازارىنا سىيلىق جانە كادەسىي ونىمدەرىنىڭ ەكسكليۋزيۆتى اۆتورلىق جۇمىستارىنىڭ كەڭ سپەكترى ۇسىنىلادى: ۇلتتىق جانە برەندى كيىم، كۇمىستەن جاسالعان زەرگەرلىك بۇيىمدار، مەلحيور، التىن جالاتىلعان جانە ەمال، مۋزىكالىق اسپاپتار، شىعىس مينياتيۋراسى، تابيعي ماتەريالداردان جاسالعان كادەسىيلار، يانتار، بيسەردەن جاسالعان اشەكەيلەر، كەراميكالىق، كيىز جانە جىبەك بۇيىمدارى، كەنەپتە، بەرەستەگى سۋرەتتەر، قاقتالعان ساندىك بۇيىمدار، قولمەن جاسالعان سابىن، جاڭا جىلدىق ويىنشىقتار جانە كوپتەگەن جۇمىستار.
كورمەدە ماتەريالدىڭ، ءتۇستىڭ، ويۋ-ورنەكتىڭ، بۇيىمداردى جاساۋ تەحنيكاسىنىڭ ارتۇرلىلىگىمەن تاڭ قالدىراتىن قازاقستان مەن ورتالىق ازيا قولونەر شەبەرلەرىنىڭ اۆتورلىق ەكسكليۋزيۆتى تۋىندىلارىن كورۋگە بولادى.
كورمە-جارمەڭكە اياسىندا مۋزەيگە كەلۋشىلەر ءۇشىن تانىمال قازاقستاندىق سۋرەتشى-قىش شەبەرى ءالياسقار مۇسايەۆ قىش قولونەرى بويىنشا شەبەرلىك ساباعىن كورسەتەدى.
كورمە قولونەر جانە ساندىك-قولدانبالى ونەر داستۇرلەرىن ساقتاۋعا ىقپال ەتۋمەن قاتار بارلىق قالاۋشىلار ءۇشىن حالىق شىعارماشىلىعىنىڭ عاجايىپ الەمىنە قول جەتكىزۋگە، سونىمەن قاتار كورمە قاتىسۋشىلارىنان ءتۇرلى ۇلگىلەر مەن جانرلىق باعىتتار بويىنشا شەبەرلىكتى ۇيرەنۋگە مۇمكىندىك بەرەدى.