وڭىرلىك كوممۋنيكاسيالار قىزمەتىنىڭ الاڭىندا رمك «قازاۆياورمانقورعاۋ» الماتى اۆياسيالىق بولىمشەسىنىڭ ماماندارى 2025 جىلعى ءورت ءقاۋپى جوعارى ماۋسىمنىڭ قورىتىندىسىن ۇسىنىپ، تاۋلى-ورماندى جەرلەردە الدىن-الۋ جۇمىسىن كۇشەيتۋ ءۇشىن قولعا الىنعان ءىس-شارالار تۋرالى حابارلادى. بولىمشە جەتەكشىسى بەكزات بايشالوۆتىڭ ايتۋىنشا، بيىلعى ماۋسىمدا جاۋىن-شاشىن از بولىپ، تابيعي ءورتتىڭ پايدا بولۋ مەن جىلدام تارالۋ ءقاۋپىن ەداۋىر ارتتىرىپ جىبەرگەن. بولىمشە قاراۋىنداعى ورمان قورى 672 مىڭ گەكتارداي بولادى، ونىڭ قۇرامىنا جەتى مەملەكەتتىك كوممۋنالدىق مەكەمە، ءۇش ۇلتتىق تابيعي پارك پەن ءبىر مەملەكەتتىك قورىق كىرەدى.
ماۋسىم قورىتىندىسى بويىنشا اۋماقتا 28 ورمان ءورتى تىركەلىپ، ونىڭ 22ء-سى تاۋلى ايماقتا بولىپتى. جالپى ءورت شالعان اۋدان 79 گەكتاردى قۇراپ، ونىڭ 46 گەكتارى ورماندى، 33 گەكتارى ورمانسىز اۋماق بولدى. ەڭ كوپ سالماق تۇسكەن اۋماق - ىلە-الاتاۋ مۇتپ. مۇندا 26 گەكتارداي جەردە 21 ءورت شىققان.
«قاۋىپسىزدىكتى قامتاماسىز ەتۋدە ەرتە انىقتاۋ جاعى ماڭىزدى ءرول اتقاردى. 28 وقيعانىىڭ 7ء-ى اۆياسيا ارقىلى انىقتالىپ، بۇل جالپى كورسەتكىشتىڭ 41%-ىن قۇرادى. بۇل كورسەتكىش بۇدان دا جوعارى بولۋى مۇمكىن ەدى، الايدا اۆياساقشىلارعا بولىنگەن ساعاتتىڭ ازدىعىنا بايلانىستى اۋەدەن تولىقتاي باقىلاۋعا مۇمكىنشىلىك بولمادى»، – دەيدى بەكزات بايشالوۆ.
اۆياسيا ءورت ءسوندىرۋ قىزمەتى ءورتتى ءسوندىرۋ مەن جويۋ جۇمىستارىنا بەلسەندى قاتىسقان. 2025 جىلى ولار 75% جاعدايعا ارالاسىپ، 21 ءورت سولاردىڭ قولىمەن ءسوندىرىلدى. جۇمىستار كۇندىز دە، تۇندە دە جۇرگىزىلدى.
اۋەدەن باقىلاۋ مەن جەدەل ارەكەت ەتۋ ءۇشىن بيىل مىنا رەسۋرستار ءبولىندى:
* ۇشاق – 372 ساعات ۇشۋ ۋاقىتى،
* 2–3 كلاستى تىكۇشاقتار – 285 ساعات،
* 1 كلاستى تىكۇشاق – 85 ساعات.
ماۋسىم بارىسىندا ورمان يەلەنۋشىلەردىڭ، تابيعاتتى قورعاۋ پوليسياسىنىڭ، بالىق ينسپەكسياسىنىڭ جانە سالالىق مەكەمە ماماندارىنىڭ قاتىسۋىمەن تۇراقتى اۆيارەيدتەر دە جۇرگىزىلدى. ناتيجەسىندە تابيعات قورعاۋ زاڭناماسىن بۇزۋعا قاتىستى ءتورت اكىمشىلىك قۇقىقبۇزۋشىلىق انىقتالدى.