«دوپ بەر» مەكتەپ باسكەتبول ليگاسى 2018 جىلدان بەرى وتكىزىلىپ كەلەدى.
الماتىدا 7-17 جاس ارالىعىنداعى 1200 وقۋشىدان قۇرالعان 44 كوماندا باسكەتبول چەمپيوناتىنىڭ ىرىكتەۋ تۋرىندا سىنعا ءتۇستى. تارتىستى ويىن مەگاپوليستەگى ش.ءۋاليحانوۆ اتىنداعى ءبىلىم وشاعىندا باسكەتبولدان مەكتەپ ليگاسى اياسىندا ءوتتى، دەپ حابارلايدى Almaty aqshamy گازەتىنىڭ ءتىلشىسى.
ورەندەر جارىسى الماتى مەن استانا كوماندالارىنىڭ اراسىندا ءوتتى. ەكى قالانىڭ دا باسكەتبول ليگاسى جەرگىلىكتى جەردەگى بىرنەشە جەكەمەنشىك مەكتەپتەرمەن ارىپتەستىك قارىم-قاتىناس ورناتقان.
– «دوپ بەر» («داي مياچ») مەكتەپ باسكەتبول ليگاسى 2018 جىلدان بەرى وتكىزىلىپ كەلەدى. ءبىز ماۋسىمدى جىلدا ەكىنشى توقساننان باستايمىز جانە ويىنداردى مامىر ايىنىڭ ورتاسىنا دەيىن جالعاستىرامىز»، – دەيدى مەكتەپ باسكەتبول ليگاسىنىڭ جەتەكشىسى دميتريي چميل.
شوقان ءۋاليحانوۆ مەكتەبىنىڭ سپورتتىق قۇرال-جابدىقتارمەن تولىقتاي جابدىقتالعانى سونشالىق، ونى سپورت مەكتەبىنىڭ دەڭگەيىندەگى نىسان دەسەك قاتەلەسپەيمىز. ىرىكتەۋ كەزەڭىنە وسى مەكتەپتىڭ ءتورت كومانداسى قاتىستى. ولاردىڭ اراسىندا كوزىندە وتى بار 1-سىنىپتىڭ بالاقايلارىنان باستاپ، جەڭىسكە قۇشتار جوعارى سىنىپ وقۋشىلارى دا بار. ءار كوماندادا شامامەن 20 ويىنشىدان بولدى.
– «ءبىز بالالار اراسىندا باسكەتبولدى كەڭىرەك ناسيحاتتاۋعا تىرىسامىز. سپورتتىڭ وسى تۇرىنە بەيىم ورەندەردى كاسىبي تۇرعىدا جاتتىقتىراتىن مىقتى مامانداردى تارتامىز. ماسەلەن، شوقان ءۋاليحانوۆ اتىنداعى مەكتەپتە بالالارمەن وتە تانىمال، تاجىريبەلى جاتتىقتىرۋشى الەكساندر زولوتۋحين اينالىسادى»، – دەيدى دميتريي چميل.
الداعى ۋاقىتتا ولار الماتى قالالىق سپورت باسقارماسىنىڭ قولداۋىمەن، دالىرەك ايتساق، كەلەر جاڭا وقۋ جىلىنان باستاپ مەملەكەتتىك جالپى ءبىلىم بەرەتىن مەكتەپتەر اراسىنداعى باسكەتبول ليگاسىن ىسكە قوسۋدى كوزدەپ وتىر. ازىرگە جەكە مەكتەپتەرمەن جۇمىس ىستەۋدە.
الماتى تورىندە وتكەن ىرىكتەۋ كەزەڭىنىڭ جەڭىمپازدارى كۋبوكتار، مەدالدار مەن گراموتالار يەلەندى. ال الدىمىزداعى 13 مامىردا بالۋان شولاق اتىنداعى سپورت سارايىندا ءۇشىنشى، ءتورتىنشى جانە بەسىنشى جاس ساناتتارىندا چەمپيونات فينالى وتەدى.