جەتىسۋ اۋدانىنداعى №2 جالپى ءبىلىم بەرەتىن مەكتەپ وقۋشىلارى ءار اپتانىڭ دۇيسەنبى، سارسەنبى جانە جۇماسىندا ۇلتتىق كيىم كيۋدى داستۇرگە اينالدىرعان.
بىلتىر اپتانىڭ ەكى كۇنىندە عانا كيەتىن. بيىلدان باستاپ وقۋشىلار ساباقتا ءۇش كۇن ۇلتتىق كيىممەن، ال ەكى كۇن مەكتەپ فورماسىمەن وتىرادى. كورگەن ادامنىڭ كوزى توياتىن ۇلتتىق ناقىشتاعى كيىمدەردى كيۋ باستاماسىن مەكتەپ ديرەكتورى ساۋلە التىبايەۆا بىلتىر ەلىمىزدە ۇلتتىق كيىم كۇنى 18 ناۋرىز دەپ جاريالانعان كۇننەن باستاپ كوتەرگەن ەكەن. مۇعالىمدەر دە سولاي، اپتانىڭ ءۇش كۇنىندە قازاقى ويۋ-ورنەكپەن كومكەرىلگەن، زاماناۋي ۇلگىدە تىگىلگەن قامزول، كاجەكەيلەرىن كيىپ ساباق بەرەدى. تاقتا الدىندا تۇرعان ۇستاز مەن ءار سىنىپتاعى وتىزشاقتى بالا وسىلاي ۇلتتىق كيىممەن ۇندەستىك قۇرىپ تۇراتىنى قانداي عاجاپ!
ۇلتتىق ناقىشتاعى كيىمدەردى كوپكە دارىپتەپ جۇرگەن №2 جالپى ءبىلىم بەرەتىن مەكتەپتە 468 بالا بار، ولاردىڭ 152ء-سى باستاۋىش سىنىپتاردىڭ وقۋشىسى.
– بىلتىر مەكتەپ ديرەكتورى ساۋلە مەلدەش قىزى وسى ۇلتتىق فورمانى رەتتەۋ ءۇشىن سىنىپتار اراسىندا «ۇزدىك سىنىپ» بايقاۋىن جاريالاپ، فورما ساقتاعان، ساباقتان قالماعان سىنىپقا ءوز قالتاسىنان اقشالاي سىي بەرگەنى بار. سودان بەرى ۇلتتىق كيىم كيىپ كەلۋ ءبىر ىزگە ءتۇستى. «تاربيە مەن ءبىلىم – ەگىز» دەمەكشى، ارينە، بىزگە اتا-انالار ۇلكەن قولداۋ كورسەتتى. كيىمدەردى تىكتىرۋ، ويۋلى كيىمدەردى تاڭداۋ كەزىندە اتا-انالاردىڭ دا تالعامىن ەسكەردىك. ءبىز وتانىن سۇيەتىن، ۇلتىن، ونىڭ ءسالت-داستۇرىن قادىرلەيتىن، ادەپتى، تاربيەلى شاكىرت تاربيەلەپ جاتقانىمىزدى ماقتان ەتەمىز، – دەيدى قازاق ءتىلى مەن ادەبيەتى ءپانىنىڭ ءمۇعالىمى جانات ۇمبەتوۆا.
شاكىرت لەبىزى
دينارا ايبەك، 5-سىنىپ وقۋشىسى:
– ماعان ۇلتتىق كيىم كيىپ جۇرگەن ۇنايدى. سىنىپتا ءبارىمىز بىردەي كيىنەمىز. قولايلى. ءبىزدى وزگەلەردەن ەرەكشەلەندىرىپ تۇراتىن دا وسى ءوزىمىزدىڭ ۇلتتىق كيىمىمىز.
اسلان ابدۋللا، 7-سىنىپ وقۋشىسى:
– ناۋرىز مەيرامىن تويلاتۋعا كەڭەس وكىمەتى تىيىم سالىنعانىن ەستىپ قاتتى تاڭقالعانىم بار. ناۋرىز – ۇلكەن-كىشىنى بىر-بىرىنە جاقىنداستىراتىن، بىر-بىرىنە جاقسى تىلەگىن جەتكىزۋگە دانەكەر بولا الاتىن ۇلىق مەرەكە دەپ بىلەمىن. بۇل كۇنى ادامدار بىر-بىرىمەن رەنجىسپەۋگە، ۇيلەرىنە قوناققا شاقىرىپ، بارلىق ءدامدىسىن مەيمانىنىڭ الدىنا قويۋعا تىرىسادى دەپ ويلايمىن.
شۇعىلا قادىر، 10-سىنىپ وقۋشىسى:
– بۇل مەيرامدا اتالار باتاسىن بەرىپ، جاستار قولىن جايىپ، قۇرمەت بىلدىرەدى. ناۋرىزدا ادامگەرشىلىك پەن قايىرىمدىلىق باستى ورىن الادى. مۇقتاج جاندارعا كومەك كورسەتىلىپ، جەتىم-جەسىرلەرگە قامقورلىق جاسالادى. دەمەك ناۋرىز – تەك تابيعاتتىڭ عانا ەمەس، رۋحاني قۇندىلىقتاردىڭ دا جاڭعىرۋ مەرەكەسى.