الماتى ونكولوگيالىق ورتالىعى مەدبيكەلەردى حالىقارالىق ستاندارت بويىنشا مامانداندىرۋ باعدارلاماسىن ءساتتى اياقتادى، دەپ حابارلايدى almaty-akshamy.kz
اتالعان ونكولوگيالىق مەدبيكە ءىسىنىڭ نەگىزىنە جانە ونكولوگيالىق بولىمشەلەردەگى مەدبيكەلەردىڭ رولىنە نەگىزدەلگەن باعدارلاما مەدبيكە ءبىلىمىن، داعدىلارىن، مۇمكىندىگىن ارتتىرۋعا جانە ولاردىڭ دارىگەرلەرمەن سەرىكتەستىگىن نىعايتۋعا ارنالعان.
يزرايلدەن كەلگەن تاجىريبەلى وقىتۋشىلار ەللا مۋللەر مەن زوار اۆيۆ جۇرگىزگەن مەدبيكەلەرگە ارنالعان باعدارلاما 10 جۇمىس كۇنىنە سوزىلدى.
وقىتۋ بارىسىندا قاتىسۋشىلار فرونتالدى لەكسيا، توپتىق جۇمىس، ديسكۋسسيا مەن سيمۋلياسيانى مەڭگەردى. سونىمەن قاتار، ونكولوگيالىق ورتالىققا بارۋ جانە وقىتۋشىلاردان شەبەرلىك ساباقتار ۇيىمداستىرىلدى.
باعدارلاماعا قاتىسقان ءاربىر تىڭداۋشى ونكولوگيالىق ناۋقاستارعا كومەك كورسەتۋ ساپاسىن جاقسارتۋ جانە مەدبيكەلەردىڭ مارتەبەسىن جاقسارتۋ ءۇشىن جۇمىس ورنىندا وزگەرىستەر ەنگىزۋ جوسپارىن جاسادى.
باعدارلاما زاماناۋي دەنساۋلىق ساقتاۋ جۇيەسى مەن مەدبيكە ىسىندەگى جاھاندىق ترەندتەردەن باستاپ، ونكولوگياداعى ەتيكا جانە تاعامتانۋ عىلىمىنىڭ اسپەكتىلەرىن، سونداي-اق دارىگەرلەرمەن ءتيىمدى سەرىكتەستىككە ارنالعان ترەنينگكە دەيىنگى كەڭ اۋقىمدى تاقىرىپتاردى قامتىدى.
«بۇل باعدارلاما ونكولوگيا سالاسىنداعى مەدبيكە ءىسىن دامىتۋداعى ماڭىزدى قادام»، - دەپ اتاپ ءوتتى الماتى ونكولوگيالىق ورتالىعىنىڭ ديرەكتورى. - قاتىسۋشىلار العان ءبىلىم مەن داعدىلار پاسيەنتتەرىمىزگە ودان دا جاقسىراق كومەك كورسەتۋگە كومەكتەسەتىنىنە سەنىمدىمىز».
باعدارلاما قاتىسۋشىلارعا ونكولوگيالىق ناۋقاستاردى كۇتۋ تاجىريبەسىن جاقسارتۋ ءۇشىن جاڭا ءبىلىم مەن قۇرالداردى بەرىپ، باعالاۋمەن اياقتالدى.
"سپيكەرلەردىڭ باياندامالارى وتە قىزىقتى جانە تانىمدىق بولدى. ال ولار پايدالانعان كورنەكى زاتتار ونكولوگيالىق ناۋقاستارعا مەدبيكەلىك كومەك كورسەتۋ كەزىندە قولدانۋعا بولاتىن ءاربىر ءادىستى اشىپ، ناقتى كورسەتتى. بارلىق اقپارات وتە پايدالى بولدى، بۇنىڭ ءبارى جۇمىس ءۇشىن وتە قاجەت. پراكتيكالىق جاتتىعۋلاردىڭ بولعانى دا جاقسى. ومىردەن الىنعان مىسالدار كوپ بولدى. بارلىعى وتە قولجەتىمدى، قاراپايىم ءارى تۇسىنىكتى»، - دەپ ءبولىستى اوو باس مەدبيكەسى گۇلميرا تۇرسىنوۆا.