الماتىدا 30 ادام وڭىرلىك كادرلىق رەزەرۆكە قابىلدانادى.
الماتى اكىمدىگى مەن ق ر مەملەكەتتىك قىزمەت ىستەرى اگەنتتىگىنىڭ دەپارتامەنتى بىرلەسىپ، قالا اكىمى ەربولات دوسايەۆتىڭ توراعالىعىمەن وڭىرلىك كادرلىق كوميسسيانىڭ وتىرىسىن وتكىزدى. وتىرىستا وڭىرلىك كادرلىق رەزەرۆكە ۇمىتكەرلەردى ىرىكتەۋدىڭ سوڭعى كەزەڭى ءوتتى، دەپ حابارلايدى aqshamnews.kz.
وبلىستار مەن رەسپۋبليكالىق ماڭىزى بار قالالاردىڭ وڭىرلىك كادرلىق رەزەرۆىنە ىرىكتەۋدىڭ ءبىرىنشى كەزەڭى 1 ناۋرىزدا باستالدى. ۇمىتكەرلەر بەس كەزەڭنەن ءوتۋى ءتيىس بولدى. ىرىكتەۋگە 35 جاسقا دەيىنگى، جوعارى ءبىلىمى بار جانە كەمىندە 3 جىل جۇمىس ءوتىلى بار قازاقستان رەسپۋبليكاسىنىڭ ازاماتتارى قاتىسا الادى. الماتى قالاسى بويىنشا ءبىرىنشى كەزەڭدە 261 ۇمىتكەر قۇجات تاپسىرسا، سوڭعى كەزەڭگە 43 ۇمىتكەر جىبەرىلدى.
قالا اكىمى ەربولات دوسايەۆ فينالدىق كەزەڭگە وتكەن ۇمىتكەرلەردى قۇتتىقتاپ، ساتتىلىك تىلەدى: ولار بۇعان دەيىن زاڭنامانى ءبىلۋ، جەكە قاسيەتتەر مەن قۇزىرەتتەردى باعالاۋ بويىنشا تەستىلەۋدەن ءساتتى ءوتكەن ەدءى.
«ەل پرەزيدەنتى قاسىم-جومارت توقايەۆ دارىندى ءارى ماقسات قويا بىلەتىن جاستار ءۇشىن الەۋمەتتىك ليفتءىنءىڭ ماڭىزدىلىعىن بىرنەشە رەت ايتقان. ءبىزدىڭ وڭىرلىك كادرلىق رەزەرۆىمىز ۇمىتكەرلەرىمىز ءۇشىن وسىنداي ليفت بولاتىنىنا سەنىمدىمىن»، - دەدى الماتى اكىمى.
كەلەسى كەزەڭدە «قۇرىلىمدىق سۇحبات» بارىسىندا ۇمىتكەرلەر وزدەرىنىڭ ۇسىنىلعان يدەيالارىنىڭ، قىزىقتى جوبالارىنىڭ ءمانى مەن ماقساتىن، ولاردى جۇزەگە اسىرۋ كەزەڭدەرىن، ىقتيمال ماسەلەلەردى، كۇتىلەتىن ناتيجەلەر مەن ولاردى شەشۋ جولدارىن اشىپ كورسەتتى.
ىرىكتەۋ قورىتىندىسى بويىنشا 30 رەزەرۆيست وڭىرلىك كادرلىق رەزەرۆكە قابىلدانادى، ولار ەكى جىل ىشىندە قالاداعى جەرگىلىكتى اتقارۋشى ورگانداعى ءتۇرلى بوس لاۋازىمدارعا بايقاۋسىز تاعايىندالۋعا ۇمىتكەر بولا الادى.
وڭىرلىك كوميسسيا ءتوراعاسىنىڭ ورىنباسارى – ق ر مەملەكەتتىك قىزمەت ىستەرى اگەنتتىگى دەپارتامەنتىنىڭ باسشىسى ءالىمحان شىناراي، ال كوميسسيا قۇرامىنا قالالىق ءماسليحاتتىڭ ءتوراعاسى مەيىرجان وتىنشييەۆ، الماتى قالاسى بويىنشا تەكسەرۋ كوميسسيانىڭ ءتوراعاسى التاي بەردىقۇلوۆ جانە قالا اكىمى اپپاراتىنىڭ باسشىسى ايدار جاقىباەۆ كىردى.
كوميسسيا جۇمىسىنىڭ اشىقتىعىن قامتاماسىز ەتۋ ماقساتىندا ىرىكتەۋدىڭ سوڭعى كەزەڭىندە مەملەكەتتىك قىزمەت ىستەرى دەپارتامەنتى تاۋەلسىز سالالىق ساراپشىلاردى شاقىرعان. ساراپشىلار ۇمىتكەرلەر ءۇشىن ىرىكتەۋدىڭ اشىق جانە ءادىل ءوتۋىن قامتاماسىز ەتكەنىن اتاپ ءوتتى.
«بايقاۋعا بارلىق ازاماتتىڭ قاتىسۋعا قاقىسى بار، ساراپشىلار رەتىندە ءبىز قاتىسقان سوڭعى كەزەڭدە مەملەكەتتىك قىزمەتشىلەردەن باسقا بيزنەس وكىلدەرى، مۇعالىمدەر، دارىگەرلەر، اكادەميالىق سالا مەن كۆازيمەملەكەتتىك سەكتور وكىلدەرى دە بولدى. بارلىعىنا تەڭ قولجەتىمدىلىك قامتاماسىز ەتىلدى. اشىقتىق پەن ترانسپارەنتتىلىك قامتاماسىز ەتىلدى»، - دەدى «الماتى ازاماتتىق اليانسى» زتب ءتوراعاسى قايىرجان ءابدىحالىقوۆ.