جول كارتاسى قالالىقتاردىڭ ءومىر ءسۇرۋ ساپاسىن جاقسارتۋعا باعىتتالعان 32 ماقساتتى ينديكاتورلاردى قاراستىرعان.
الماتى قالاسى اكىمىنىڭ ورىنباسارى ەرجان باباقۇماروۆ پەن Nur Otan پارتياسى الماتى قالالىق فيليالىنىڭ ءبىرىنشى ورىنباسارى مەيىرجان وتىنشييەۆ Nur Otan پارتياسى سايلاۋالدى باعدارلاماسىنىڭ جول كارتاسىن الماتىدا جۇزەگە اسىرۋ ماسەلەلەرى بويىنشا ونلاين-كەڭەس وتكىزدى، دەپ حابارلايدى Almaty-akshamy.kz.
جيىنعا قالا اكىمىنىڭ ورىنباسارى ءى. وسەروۆ پەن قالالىق باسقارمالاردىڭ باسشىلارى دا قاتىستى.
كەڭەستە پارتيانىڭ سايلاۋ الدىنداعى ۋادەلەرى اياسىندا ىسكە اسىرىلۋى جوسپارلانعان الەۋمەتتىك جانە ينفراقۇرىلىمدىق جوبالار تالقىلاندى. اتاپ ايتقاندا، ءبىلىم بەرۋ جانە دەنساۋلىق ساقتاۋ سالاسىنداعى جوبالار. قالانىڭ جايلى قالالىق ورتا، ءبىلىم، قوعامدىق دەنساۋلىق باسقارمالارى باسشىلارىنىڭ، سونىمەن قاتار ءبىرقاتار اۋدان اكىمدەرىنىڭ اقپاراتتارى تىڭدالدى.
جالپى، 2025 جىلعا دەيىنگى مەگاپوليستەگى جول كارتاسى اياسىندا ءبىلىم بەرۋ جانە دەنساۋلىق ساقتاۋ سالاسىندا 400-دەن استام جوبانى جۇزەگە اسىرۋ جوسپارلانعان. ونىڭ ىشىندە – جاڭا نىسانداردىڭ قۇرىلىسى، بار عيماراتتاردى جوندەۋ جانە سەيسميكالىق كۇشەيتۋ.
بۇگىندە 240 بالاعا ارنالعان ەكى مەملەكەتتىك بالاباقشانىڭ قۇرىلىسى اياقتالدى، 30 جەكەمەنشىك مەكتەپكە دەيىنگى مەكەمە اشىلدى، مەكتەپ پەن مەديسينالىق مەكەمە كۇردەلى جوندەۋدەن ءوتتى. 100-دەن استام ءبىلىم بەرۋ جانە دەنساۋلىق ساقتاۋ نىساندارىندا جوبالاۋ جانە قۇرىلىس جۇمىستارى باستالدى. سونىمەن قاتار، پاندەميامەن جۇرگىزىلىپ جاتقان كۇرەستى ەسكەرە وتىرىپ، ءبىرقاتار جوبالاردى ىسكە اسىرۋ مەرزىمدەرى قايتا قارالدى. اتاپ ايتقاندا، وقكا جانساقتاۋ پاۆيلوندارى مەن قابىلداۋ بولمەسىن جوندەۋ ەپيدەميولوگيالىق احۋال جاقسارعانعا دەيىن كەيىنگە قالدىرىلدى.
اكىمنىڭ ورىنباسارى ەرجان باباقۇماروۆ حالىقتىڭ سۇرانىستارىن ەسكەرە وتىرىپ، جوسپارلانعان الەۋمەتتىك جوبالاردى ىسكە اسىرۋدىڭ ماڭىزدى ەكەنىن ايتتى. اتاپ ايتقاندا، مەديسينالىق مەكەمەلەر جوق شاعىن اۋدانداردا وتباسىلىق-دارىگەرلىك امبۋلاتوريالار سالىنادى. بۇل قالا تۇرعىندارىن قادامدىق قاشىقتىقتا مەديسينالىق قىزمەتتەرمەن قامتۋعا مۇمكىندىك بەرەدى.
كەڭەستىڭ قورىتىندىسى بويىنشا جاۋاپتى باسقارمالارعا پارتيانىڭ قالالىق فيليالىمەن بىرگە جول كارتاسى تارماقتارىنىڭ ورىندالۋىن باقىلاۋدى كۇشەيتۋ تاپسىرىلدى.
ەسكە سالساق، پارتيانىڭ الماتى قالاسى بويىنشا جول كارتاسى وسى جىلدىڭ اقپان ايىندا ۇسىنىلىپ، بەكىتىلگەن بولاتىن. جالپى، جول كارتاسى قالالىقتاردىڭ ءومىر ءسۇرۋ ساپاسىن جاقسارتۋعا باعىتتالعان 32 ماقساتتى ينديكاتورلاردى قاراستىرعان.