كوممۋنالدىق قىزمەتتەر كۇشەيتىلگەن رەجيمگە اۋىستىرىلدى
«قازگيدرومەت» رمك مالىمەتىنشە، 17-نەن 18 مامىرعا قاراعان ءتۇنى الماتىدا اۋىسپالى بۇلتتى اۋا رايى كۇتىلەدى، جاۋىن-شاشىنسىز. اۋا تەمپەراتۋراسى تۇندە +23…+25°س شاماسىندا بولادى. 18 مامىر كۇنى ساعات 13:00-دەن باستاپ تاۋلىك سوڭىنا دەيىن نايزاعايمەن جانە بۇرشاقپەن بىرگە قاتتى نوسەر جاڭبىر جاۋادى دەپ بولجانۋدا. جاۋىن-شاشىن مولشەرى 20 مم-گە دەيىن جەتۋى مۇمكىن. جەل باتىستان، سولتۇستىك-باتىستان 3–8 م/س، نايزاعاي كەزىندە ەكپىنى 18–23 م/س دەيىن جەتەدى، دەپ حابارلايدى aqshamnews.kz الماتى قالاسى كوممۋنالدىق ينفراقۇرىلىمدى دامىتۋ باسقارماسىنا سىلتەمە جاساپ.
19 مامىردا دا اۋىسپالى بۇلتتى اۋا رايى ساقتالادى. تۇندە ساعات 05:00-گە دەيىن جاڭبىر جاۋۋى مۇمكىن، كۇندىز جاۋىن-شاشىنسىز. اۋا تەمپەراتۋراسى تۇندە +13…+15°س، كۇندىز +20…+22°س. جەل وڭتۇستىك-باتىستان 3–8 م/س.
قالانىڭ كوممۋنالدىق قىزمەتتەرى كۇشەيتىلگەن رەجيمگە اۋىستىرىلدى. تۇنگى ۋاقىتتا 366 ارنايى تەحنيكا بىرلىگى مەن 355 جول جۇمىسشىسى جۇمىلدىرىلعان. ال 18 مامىر كۇندىزگى كەزەڭدە ىقتيمال سۋ باسۋلاردىڭ الدىن الۋ جانە جويۋ ماقساتىندا 515 تەحنيكا بىرلىگى، 27 موتوپومپا جانە 755 جۇمىسشى قالا كوشەلەرىنە شىعادى.
سونىمەن قاتار، موتوپومپالارمەن جانە كۇرەك-سىنالارمەن جابدىقتالعان 42 جەدەل بريگادا دايىندىق رەجيمىندە جۇمىس ىستەيدى.
ارىق جەلىلەرى مەن جاۋىن سۋىن قابىلدايتىن تۇزاقتاردى تازالاۋ جانە باقىلاۋ جۇمىستارىنا ەرەكشە كوڭىل بولىنۋدە. قالاداعى پروبلەمالىق ۋچاسكەلەردە تاۋلىك بويى تازالاۋ جۇمىستارى جۇرگىزىلۋدە.
الماتى قالاسى قۇتقارۋ قىزمەتى (شجق «الماتى قالاسىنىڭ قۇتقارۋ قىزمەتى» مكك) تاراپىنان 15 تەحنيكا بىرلىگى مەن 50 قىزمەتكەر، ال تجد تاراپىنان 55 تەحنيكا بىرلىگى مەن 245 مامان كەزەكشىلىككە شىقتى.