مەملەكەت باسشىسىنىڭ قازاقستان حالقىنا جولداۋىندا 2025 جىلدى «جۇمىسشى ماماندىقتار جىلى» دەپ جاريالاعاننان كەيىن، بۇل سالاعا ەرەكشە نازار اۋدارىلىپ، جاستاردىڭ كاسىبي ءبىلىم الىپ، جان-جاقتى دامۋىنا باسىمدىق بەرىلە باستادى. بۇگىندە الماتى قالاسىنىڭ وزىندە جۇزدەن استام تەحنيكالىق جانە كاسىپتىك ءبىلىم بەرۋ (تجكبب) ۇيىمى بار. ولار مەملەكەتتىڭ تاپسىرىسى بويىنشا مامان دايارلاپ، ەل ەكونوميكاسىنىڭ دامۋىنا ۇلەس قوسۋدا.
الەمدە 16 قازان كۇنى حالىقارالىق نان كۇنى اتاپ وتىلەدى. وسىعان وراي، الماتى مەملەكەتتىك بيزنەس كوللەدجىندە «ناۋبايشى شەبەرلىگى» قۇزىرەتتىلىگى بويىنشا «نان-FEST» قالالىق كاسىبي شەبەرلىك بايقاۋى ەكىنشى رەت ۇيىمداستىرىلدى. وعان الماتى قالاسىنداعى 6 كوللەدجدىڭ 10 ستۋدەنتى، جۇمىس بەرۋشىلەر، «اتامەكەن» كاسىپكەرلەر پالاتاسى مەن ءبىلىم باسقارماسىنىڭ وكىلدەرى قاتىستى.
بايقاۋدى الماتى مەملەكەتتىك بيزنەس كوللەدجىنىڭ باسشىسى اينۇر قۋانىش قىزى اشىپ، ناننىڭ ماڭىزدىلىعى تۋرالى ايتتى:
– حالقىمىزدا «نان – استىڭ اتاسى»، «نان بولسا، ءان دە بولادى» دەگەن تامسىلدەر بار. بۇل بايقاۋ ارقىلى جاستارعا نانعا دەگەن قۇرمەتتى ارتتىرىپ، ەڭبەكتىڭ ءقادىرىن ۇيرەتكىمىز كەلەدى. جۇمىسشى ماماندىعىنىڭ بەدەلىن كوتەرۋ – باستى ماقساتىمىز، – دەدى اينۇر قۋانىش قىزى.
الماتى مەملەكەتتىك بيزنەس كوللەدجى «جاس مامان» جوباسى اياسىندا يتاليالىق قۇرىلعىلاردى الىپ، ناۋبايشى ماماندارىنا ارنالعان جابدىقتارمەن جۇمىس ىستەۋدى جەڭىلدەتتى. بايقاۋ ءۇش كەزەڭ بويىنشا ءوتتى، ءادىلقازىلار القاسى مەن ءوندىرىس وزاتتارى قاتىسۋشىلاردىڭ شەبەرلىكتەرىن باعالادى.
«نان-FEST»ء-تىڭ باس جۇلدەسىن «الماتى تەحنولوگيالىق-ەكونوميكالىق كوللەدجىنىڭ» ستۋدەنتى الىشەر شايماردانوۆ جەڭىپ الدى. ءبىرىنشى ورىندى «الماتى تەحنولوگيالىق كوللەدجىنىڭ» ستۋدەنتى ايقىن ىلەسباي، ەكىنشى ورىندى «الماتى ەكونوميكالىق كوللەدجىنىڭ» ستۋدەنتى الينا التايەۆا مەن الماتى مەملەكەتتىك بيزنەس كوللەدجىنىڭ ستۋدەنتى يلياس سراباي يەلەندى. ءۇشىنشى ورىندى «الماتى ەكونوميكالىق كوللەدجىنىڭ» ستۋدەنتى ارۋنا امانگەلدى مەن «تۋريزم جانە قوناقجايلىلىق يندۋسترياسى» كوللەدجىنىڭ ستۋدەنتى كاميلا گۋروۆا الدى.
بايقاۋدىڭ ماقساتى – ناننىڭ قوعام مەن ادام ومىرىندەگى ماڭىزدىلىعىن كورسەتۋ جانە جۇمىسشى ماماندىعىنىڭ بەدەلىن ارتتىرۋ. بايقاۋ جەڭىمپازدارىنىڭ جەتىستىكتەرى مەن وزىق ىس-تاجىريبەسى باسقا وقۋ ورىندارىندا دا ناسيحاتتالادى. ۇيىمداستىرۋشىلار «نان-FEST» بايقاۋىن رەسپۋبليكالىق دەڭگەيدە وتكىزۋدى جوسپارلاپ وتىر.
