2023 جىلعى 13 قاڭتاردا، ساعات 11.00-دە ۇلتتىق كىتاپحانادا مەملەكەت جانە قوعام قايراتكەرى، مادەنيەتتانۋشى، قازاقستاننىڭ ەڭبەك سىڭىرگەن قايراتكەرى مۇرات مۇحتار ۇلى اۋەزوۆتىڭ 80 جىلدىق مەرەيتويىنا ارنالعان «وتكىردىڭ ءجۇزى» اتتى كەزدەسۋ كەشى وتەدى، دەپ حابارلايدى Almaty-akshamy.kz.
مۇرات اۋەزوۆ – كورنەكتى قوعام قايراتكەرى، مادەنيەتتانۋشى-عالىم، جازۋشى، قازاقستان جازۋشىلار وداعىنىڭ مۇشەسى، قازاقستان رەسپۋبليكاسىنىڭ ەڭبەك سىڭىرگەن قايراتكەرى.
ول قازاقستاننىڭ جانە حالقىمىزدىڭ رۋحاني مادەنيەتىن دامىتۋعا، ورتالىق ازيا حالىقتارىنىڭ تاريحي-مادەني قۇندىلىقتارىن زەردەلەۋ مەن ناسيحاتتاۋعا ولشەۋسىز ۇلەس قوستى. «سوروس-قازاقستان» قورىنىڭ باسشىسى رەتىندە ءبىلىم بەرۋ، مادەنيەت جانە قوعامدى دەموكراتيالاندىرۋ سالاسىنداعى ءبىرقاتار ماڭىزدى ورتالىقازيالىق جوبالارعا باستاماشى بولدى جانە جۇزەگە اسىردى، قازاق ادەبيەتى مەن قازاقستاننىڭ جاس شىعارماشىلىق كۇشتەرىنىڭ دامۋىنا ۇلەس قوستى. سونداي-اق «مادەني مۇرا» مەملەكەتتىك باعدارلاماسىن جۇزەگە اسىرۋعا، قازاق حالقىنىڭ تاريحي-مادەني مۇراسىن زەرتتەۋگە، ساقتاۋعا جانە جاڭعىرتۋعا وراسان زور ۇلەس قوستى.
قازاقستان تاريحىندا قازاقستاننىڭ جۇڭگو حالىق رەسپۋبليكاسىنداعى تۇڭعىش توتەنشە جانە وكىلەتتى ەلشىسى بولدى. قازاق مادەنيەتىن، ونەرىن، ادەبيەتىن ناسيحاتتاۋعا باعىتتالعان «جاس تۇلپار» بەيرەسمي جاستار قوزعالىسىن ۇيىمداستىرۋشىلاردىڭ ءبىرى. «جىبەك جولىنداعى سۇحباتتار» حالىقارالىق مادەني جوباسىنىڭ باستاماشىسى جانە جەتەكشىسى، «ۋاقىت ارقاۋى»، «م.م.اۋەزوۆ» تەلەەسسە تەلەباعدارلامالارىنىڭ اۆتورى جانە جۇرگىزۋشىسى بولدى.
«ۆرەمەن سۆيازۋيۋششايا نيت» (1972)، «يپپوكرەنا. حوجدەنيا ك كولودسام ۆرەمەن» (1997)، «ۋيتي، چتوبى ۆەرنۋتسيا» (2002)، «گلاۆپوچتامپت» (2018)، «ءدىلىم» (2018) ەڭبەكتەرى مەن كوركەمدىك پروسەستىڭ تەورياسى مەن تاجىريبەسى بويىنشا 200-دەن استام جاريالانىمداردىڭ اۆتورى.
ءىس-شارانىڭ ماقساتى – مۇرات اۋەزوۆتىڭ ءومىرى مەن شىعارماشىلىعىن ۇلگى ەتە وتىرىپ جانە ۇرپاقتار ساباقتاستىعىن ساقتاي وتىرىپ، جاستار اراسىندا رۋحاني-مادەني جانە جالپىادامزاتتىق قۇندىلىقتاردى ناسيحاتتاۋ.
كەزدەسۋ اياسىندا ق ر ۇلتتىق كىتاپحاناسى قورىنان مۇرات اۋەزوۆتىڭ قىزمەتى مەن شىعارماشىلىعىنا ارنالعان «وتكىردىڭ ءجۇزى» اتتى كىتاپ كورمەسى ۇيىمداستىرىلادى.