بۇگىندە ەكپە العان الماتىلىقتاردىڭ سانى 1 ميلليونعا جۋىقتاپ قالدى.
كوروناۆيرۋس مۇگەدەكتىگى بار ادامدار ءۇشىن اسا ءقاۋىپتى. سوندىقتان اۋرۋدىڭ الدىن الىپ ەكپە سالعىزۋ كەرەك، دەپ حابارلايدى Almaty-akshamy.kz Almaty.tv سىلتەمە جاساپ.
ۇلان ىڭكاربايەۆ الماتىداعى مۇمكىندىگى شەكتەۋلى جاندار اراسىندا العاشقىلاردىڭ ءبىرى بولىپ ەكپە سالعىزعان. تۋعانىنان سەرەبرالدى سال اۋرۋىمەن اۋىراتىن، بوستاندىق اۋدانى مۇگەدەكتەر قوعامىنىڭ باسشىسى وسىلايشا ۆاكسينانىڭ ەش ءقاۋپى جوق ەكەنىن كورسەتكىسى كەلەدى.
«ەكپەنى الۋ كەرەك. ويتكەنى ول ادامدار ونى تەگىن الىپ جاتىر، ەش كەزەك جوق، مۇمكىندىك بار. ەندى نەگە الماسقا؟ كەرىسىنشە، اۋرۋعا تەز شالدىعاتىن ادامدار ءبىرىنشى كەزەكتە الۋى كەرەك»، - دەيدى قالا تۇرعىنى ۇلان ىڭكاربايەۆ.
الەمدە ساعاتىنا كوروناۆيرۋستان 236 ادام، تاۋلىگىنە شامامەن 6 مىڭ ادام كوز جۇمادى ەكەن. ۆاكسينا قايعىلى ستاتيستيكانىڭ ءبىر بولىگى بولۋدان ساقتايدى. ال دارىگەرلەردىڭ ايتۋىنشا، مۇگەدەكتىك نەمەسە سوزىلمالى اۋرۋلاردىڭ بولۋى ەكپە سالعىزۋعا قاتاڭ شەكتەۋ بولا المايدى. ماماندار ءار جاعدايعا ءجىتى تالداۋ جاساپ، تولىق تەكسەرگەننەن كەيىن عانا ەگۋ پۋنكتىنە جىبەرەدى.
«ۇزىلدى-كەسىلدى ەكپە الۋعا بولمايدى دەگەن نارسە جوق. بۇيرەك اۋرۋلارى، قۇرىسۋ سيندرومى بار اۋرۋمەن اۋىراتىندارعا، جاقىندا عانا ينسۋلت، ينفاركت العاندارعا ازىرشە ەكپە الماي قويا تۇرۋ كەرەك. الايدا دەنساۋلىعى جاقسارىپ،وڭالتۋ كەزەڭىنەن وتكەننەن كەيىن دارىگەر قابىلداۋىنا بارعان ءجون. ابدەن تەكسەرگەننەن كەيىن، ەش الاڭسىز ەكپە سالعىزۋعا بولادى»، - دەيدى № 12 قالالىق ەمحانانىڭ پەدياتر-دارىگەرى سۆەتلانا پوستنوۆا.
بۇگىندە ەكپە العان الماتىلىقتاردىڭ سانى 1 ميلليونعا جۋىقتاپ قالدى. 930 مىڭنان استام ادام ۆاكسينانىڭ ءبىرىنشى كومپونەنتىن السا، 823 مىڭنان استام ادام ەكىنشى دوزاسىن سالعىزعان. مەگوپوليستە 160 ۆاكسيناسيا پۋنكتى جۇمىس ىستەيدى. 237 ۆاكسيناسيا بريگاداسىندا 1 028 مەديسينا قىزمەتكەرى جۇمىلدىرىلعان.