شاحانوۆ ەرتەرەكتە كوتەرگەن ادەبي، قوعامدىق جانە ساياسي وزەكتى ماسەلەلەر ءسوز بولدى
حالىق جازۋشىسى، قازاقستاننىڭ ەڭبەك ەرى، اقىن مۇحتار شاحانوۆتىڭ 80 جىلدىق مەرەيتويىنا وراي ۇلتتىق قۇندىلىقتار اسسوسياسياسى «جىگەرلەندىرۋ» اتتى فورۋم وتكىزدى، دەپ حابارلايدى Almaty-akshamy.kz Baq.kz-كە سىلتەمە جاساپ.
جيىن بارىسىندا شاحانوۆ ەرتەرەكتە كوتەرگەن ادەبي، قوعامدىق جانە ساياسي وزەكتى ماسەلەلەر ءسوز بولدى.
«جىگەرلەندىرۋ» فورۋمى «شاحانوۆ جانە قازاق ادەبيەتى»، «ۇلتتىق يدەولوگيا» مەن «مادەنيەت» اتتى ءۇش بولىكپەن ءوتتى. تاقىرىپ بويىنشا سپيكەرلەر وزەكتى ماسەلەلەردى كوتەرىپ ونىڭ شەشىمىن ۇسىندى.
جيىن بارىسىندا اقىن دەنساۋلىعىنا بايلانىستى ەم الىپ جۇرگەنىن، جاقىن ارادا تۇركياعا باراتىنىن جەتكىزدى.
اقىن، پروفەسسور باۋىرجان جاقىپ بۇل جيىن اقىن مەرەيتويىنىڭ باستاۋى ەكەنىن ايتا كەلە، الداعى ۋاقىتتا جازۋشىلار وداعىندا اۋقىمدا شارا وتەتىنىن جەتكىزدى. سونىمەن قاتار ءسوز اراسىندا اقىن مۇحتار شاحانوۆتىڭ تۇرىك الەمىندەگى كەرەمەت بەدەلىنە كۋا بولعانىن ايتىپ بەردى.
«بۇعان دەيىن مۇحاڭ ولەڭدەرىم دۇنيەجۇزىنىڭ 68 تىلىنە اۋدارىلدى دەپ ايتاتىن، ءقازىر ودان دا كوپ بولۋى كەرەك. تۇركيادا شىڭعىس ايتماتوۆ اعامىزدىڭ شىعارماسىنا ارنالعان ۇلكەن فەستيۆال بولدى. سوندا تۇرىك جۇرتشىلىعىنىڭ مۇحتار شاحانوۆتىڭ پوەزياسىنا دەگەن ۇلكەن قىزۋشىلىعىنا كۋا بولدىم. جەر-جەردەن تۇركى حالىقتارىنىڭ وكىلدەرى جينالدى. سول جيىندا شىڭعىس پەن مۇحتار اعامىز قولتىقتاسىپ، اتا تۇرىكتىڭ ەسكەرتكىشىنە گۇل قويۋعا بارا جاتقان كەزدە تۇرىكتەر كوشەنىڭ بويىندا تۇرىپ، ءۇيىنىڭ بالكونىنا شىعىپ تۇرىپ قول سوعىپ، قۇرمەت كورسەتىپ تۇردى. ءبىرى قىرعىزدىڭ، ءبىرى قازاقتىڭ اتىن الەمگە تانىتقان ەكى الىپ»،-دەدى ب. جاقىپ.
قازاقستاننىڭ ەڭبەك سىڭىرگەن قايراتكەرى اسىلى وسمان اقىن مۇحتار شاحانوۆ ۇلتتىق قۇندىلىق پەن انا ءتىلىمىز ءۇشىن شىرىلداپ جۇرگەن جان ەكەنىن اتاپ ءوتتى.
«بۇگىنگى جيىننىڭ اتىنىڭ ءوزى ەرەكشە، «جىگەرلەندىرۋ» دەگەنىمىزدىڭ ءوزى مۇحاڭنىڭ تۇلا بويىندا تۇنىپ تۇر. ۇلتىنا دەگەن، جەرىنە دەگەن جىلىلىق، سۇيىسپەنشىلىك بار. مۇحاڭنىڭ بويىنداعىداي قايسارلىق، بىلگىرلىك، اتا-سالت، دانالىق بارلىق قازاقتا بولعاندا، وندا بۇل قازاقستان بۇگىن قازاق ەلى بولىپ ەلدى وزىنە قاراي ەرتىپ كەتكەن بولار ەدى»،-دەدى ول.