2023 جىلى الماتى قالاسىندا مۇگەدەكتىگى بار ادامداردىڭ زاڭدى قۇقىقتارىن قامتاماسىز ەتۋ جانە ولار ءۇشىن قولجەتىمدى ورتانى قالىپتاستىرۋ ماقساتىندا 684 الەۋمەتتىك ينفراقۇرىلىم نىسانى تولىق بەيىمدەلدى.
قازىرگى ۋاقىتتا ەلىمىزدە 2025 جىلعا دەيىن قازاقستان رەسپۋبليكاسىندا مۇگەدەكتىگى بار ادامداردىڭ قۇقىقتارىن قامتاماسىز ەتۋ جانە ءومىر ءسۇرۋ ساپاسىن جاقسارتۋ جونىندەگى ۇلتتىق جوسپار، «امانات» پارتياسىنىڭ 2023 – 2027 جىلدارداعى جول كارتاسى جانە مەملەكەت باسشىسىنىڭ تاپسىرماسى بويىنشا ازىرلەنگەن «حالىقپەن بىرگە» جوباسى ىسكە اسىرىلۋدا، دەپ حابارلايدى Almaty-akshamy.kz ق ر ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
جوبادا قولجەتىمدىلىكتىڭ ينتەراكتيۆتى كارتاسى سايتىنا ەنگىزىلگەن ەل بويىنشا بەيىمدەلۋگە ءتيىس 35 مىڭنان استام باسىم وبەكتىلەر ايقىندالدى. 2021 – 2022 جىلدارى 8 مىڭنان استام نىسان بەيىمدەلدى. 2023 – 2027 جىلدار كەزەڭىندە جىل سايىن كەمىندە 5 مىڭ وبەكت (5 جىلدا 27 مىڭ) بەيىمدەلۋى ءتيىس. 2021 – 2022 جىلداردى قوسا العاندا، 2023 جىلدىڭ قورىتىندىسى بويىنشا 13 857 وبەكت وسى تالاپقا سايكەستەندىرىلدى.
الماتى قالاسىندا 2023 جىلى بەيىمدەلۋگە جوسپارلانعان 721 وبەكتىنىڭ ىشىنەن جەرگىلىكتى اتقارۋشى ورگاندار 684 نىساندى مۇگەدەكتىگى بار ادامداردىڭ بارلىق ساناتتارى ءۇشىن قول جەتىمدى ەتۋ جۇمىستارىن جۇرگىزدى:
- ءبىلىم بەرۋ – 301 (مەكتەپتەر، بالاباقشالار)؛
- دەنساۋلىق ساقتاۋ – 233 (اۋداندىق/قالالىق اۋرۋحانالار، فەلدشەرلىك-اكۋشەرلىك پۋنكتتەر، امبۋلاتوريالار)؛
- مەملەكەتتىك مەكەمەلەر – 59 (قالالىق، اۋداندىق، اۋىلدىق اكىمدىكتەر مەن بولىمدەر)؛
- مادەنيەت وبەكتىلەرى – 16 (مادەنيەت ۇيلەرى، تەاترلار جانە ت. ب.)؛
- سپورت نىساندارى – 4 (سپورت زالدارى، سپورت سارايلارى جانە ت. ب.)؛
- الەۋمەتتىك قورعاۋ وبەكتىلەرى – 10؛
– قىزمەت كورسەتۋ سالاسىندا – 61.
«جالپى قالا بويىنشا مۇگەدەكتىگى بار ادامدار ءۇشىن جاعداي جاقسارىپ، قاجەتتى جاعدايلار جاسالۋدا. مەنشىك يەلەرى وبەكتىلەردى قۇرىلىس نورمالارىنا سايكەس كەلتىرۋگە تىرىسادى. كوپتەگەن كاسىپكەرلەر جانە مەملەكەتتىك مەكەمەلەر شاعىمدار مەن ۇسىنىستاردى ەسكەرە وتىرىپ، كىرە بەرىستەردى جەتىلدىرۋدە. مىسالى، گاگارين كوشەسى، 206 مەكەنجايىنداعى №17 ەمحاناعا بارعان كەزدە دەنساۋلىق ساقتاۋ مەكەمەسىنىڭ قولجەتىمدىلىگى كوڭىل قۋانتادى، ەسىك جاقتاۋلارى ولشەمدەرگە سايكەس كەلەدى، ىڭعايلى ليفت تە قاراستىرىلعان. سونداي-اق جاقىندا كاسپيي بانكىنىڭ بولىمشەسىنە باردىم، وندا كىرۋ توبى قايتا جاڭارتىلعان: كىرۋ الاڭى كەڭەيتىلىپ، كىرەبەرىس ەسىكتەرى اۋىستىرىلعان، كرەسلو-ارباداعى مۇگەدەكتىگى بار ادامدارعا ارنالعان ارنايى كاسسا، تاكتيلدى پليتكالار مەن كورسەتكىشتەر ورناتىلعان ەكەن. بۇل قالا تۇرعىندارىنىڭ، ونىڭ ىشىندە ءبىزدىڭ دە ەڭ كوپ باراتىن ورىندارىمىز»، – دەدى ءبىرىنشى توپ مۇگەدەكتىگى بار ۇلان ىڭكاربەكوۆ دەگەن ازامات.
بۇدان باسقا 2023 جىلى مەملەكەتتىك باقىلاۋ شەڭبەرىندە ق ر ەحاقم ەڭبەك جانە الەۋمەتتىك قورعاۋ كوميتەتىنىڭ الماتى قالاسى بويىنشا اۋماقتىق دەپارتامەنتى مەملەكەتتىك باسقارۋ، دەنساۋلىق ساقتاۋ، الەۋمەتتىك قورعاۋ، مادەنيەت جانە ت. ب. سالالارداعى الەۋمەتتىك ينفراقۇرىلىم وبەكتىلەرىنە 112 تەكسەرۋ جۇرگىزدى، ونىڭ ىشىندە: 43 – جوسپاردان تىس، 58 – پروفيلاكتيكالىق باقىلاۋ شەڭبەرىندە جانە پروكۋراتۋرانىڭ تالابى بويىنشا 11 تەكسەرۋ بولدى. تەكسەرۋ قورىتىندىسى بويىنشا انىقتالعان بۇزۋشىلىقتاردى جويۋ تۋرالى 97 ۇيعارىم بەرىلدى، 10 ملن تەڭگەدەن استام سوماعا 17 اكىمشىلىك ايىپپۇل سالىندى.
وبەكتىلەردىڭ مەنشىك يەلەرىنە پروفيلاكتيكالىق باقىلاۋ جۇرگىزۋ كەزىندە بۇزۋشىلىقتار العاش رەت انىقتالعان كەزدە ولاردى اكىمشىلىك جاۋاپكەرشىلىككە تارتپاي جويۋ تۋرالى نۇسقامالار عانا بەرىلەتىنىن اتاپ ءوتۋ قاجەت. نۇسقاما بەلگىلەنگەن مەرزىمدە ورىندالماعان جاعدايدا عانا ايىپپۇل سالىنادى.