الماتىداعى كارانتيندىك باقىلاۋ توبى ايگىلى رەسەيلىك بلوگەر گۋسەين گاسانوۆتىڭ قاتىسۋىمەن وتكەن ءىس-شارانى قالانىڭ ويىن-ساۋىق ورىندارىنىڭ بىرىندە توقتاتتى. بۇل تۋرالى سىبايلاس جەمقورلىققا قارسى قىزمەت جانىنداعى ارنايى مونيتورينگ توبى ءتوراعاسىنىڭ ورىنباسارى رافاەل حاسانوۆ مالىمدەدى، دەپ حابارلايدى Almaty-akshamy.kz.
«كەشە قالادا كۇشەيتىلگەن باقىلاۋ جۇرگىزىلدى. بۇل كۇن سايىن جۇزەگە اسىرىلادى. كەشكە رەميزوۆكا باعىتىندا ءبىز كەلگەن مەكەمەلەردىڭ بىرىندە گۋسەين گاسانوۆ جاستار اراسىندا بولدى. ءبىز ولاردىڭ دۋمانىنىڭ شىرقىن بۇزدىق، - دەدى حاسانوۆ.
سونىمەن قاتار ول جاستاردىڭ جەدەل تۇردە مەكەمەدەن كەتىپ قالعانىن قوستى. سوعان قاراماستان، ارنايى مونيتورينگ توبى ءتوراعاسىنىڭ ورىنباسارى ۋاكىلەتتى ورگانداردى كەشتىڭ ۇيىمداستىرۋشىلارى مەن قوناقتارىن جاۋاپكەرشىلىككە تارتۋعا شاقىردى.
«مەن رەسەيلىك بلوگەرگە قالادا شەكتەۋ شارالارى كۇشىندە ەكەنىن ەسكە سالعىم كەلدى. ال ونىڭ كەشەگى ارەكەتى ماعان قولايسىز بولىپ كورىندى. مەن مۇنداي كارانتين ءتارتىبىن بۇزۋعا قازاقستان رەسپۋبليكاسىنىڭ اۋماعىندا جول بەرىلمەيدى دەپ سانايمىن. ەلگە كەلگەن كەز كەلگەن قوناق قولدانىستاعى زاڭداردى ساقتاۋى كەرەك. ونىڭ قانشا جازىلۋشىسى بولسا دا، ەشكىمگە مۇنداي ارەكەتكە بارۋىنا جول بەرىلمەيدى»، - دەدى حاسانوۆ.