كيمەپ ۋنيۆەرسيتەتىندە ق ر قورعانىس مينيسترلىگىنىڭ 23 اسكەري قىزمەتشىسىنىڭ "Mini-MBA" باعدارلاماسى بويىنشا وقۋدى ءساتتى اياقتاعانى تۋرالى سەرتيفيكاتتار تابىس ەتىلۋىنە وراي سالتاناتتى ءىس-شارا ءوتتى.
وعان قورعانىس ءمينيسترىنىڭ ورىنباسارى اسكەر بەيسەنوۆ پەن قورعانىس ءمينيسترىنىڭ كەڭەسشىسى ايگۇل تولەمبايەۆا قۇرمەتتى قوناق رەتىندە قاتىستى، دەپ حابارلايدى Almaty-akshamy.kz قورعانىس مينيسترلىگىنە سىلتەمە جاساپ.
ايتا كەتۋ كەرەك، بۇل ءوزارا ارەكەتتەستىكتىڭ العاشقى مىسالى ەمەس. قورعانىس مينيسترلىگى كيمەپ ۋنيۆەرسيتەتىمەن 2015 جىلدان بەرى تىعىز قارىم-قاتىناس جاساپ كەلەدى. 2016 جىلى كيمەپ-تىڭ باسشى كادرلارعا ارنالعان ىسكەرلىك اكىمشىلەندىرۋ ماگيستراتۋراسىنىڭ باعدارلاماسىن 10 وفيسەر ءساتتى بىتىرگەن بولاتىن. بۇگىنگى تاڭدا ولار قورعانىس ۆەدومستۆوسىنىڭ ورتالىق اپپاراتىندا باسشىلىق قىزمەتتەر اتقارىپ ءجۇر.
وفيسەرلەردىڭ ايتۋىنشا، ساباقتار ناقتى كەيستەردى جانە الەمدىك نارىقتىڭ ۇزدىك ساراپشىلارى مەن بىلگىرلەرىنىڭ باي تاجىريبەسىن پايدالانا وتىرىپ، وتە ناتيجەلى وتكەن. كۋرس 2023 جىلعى 23 ماۋسىمداعى قورعانىس مينيسترلىگى مەن "كيمەپ ۋنيۆەرسيتەتى" كەاق اراسىنداعى ازاماتتاردى اسكەري-پاتريوتتىق تاربيەلەۋ جانە اسكەري ءبىلىم بەرۋ سالاسىنداعى ىنتىماقتاستىق تۋرالى كەلىسىمگە سايكەس ۇيىمداستىرىلدى. وقىتۋ ۇلتتىق قورعانىس ۋنيۆەرسيتەتى بازاسىندا "كيمەپ ۋنيۆەرسيتەتى" كەاق پروفەسسورلىق-وقىتۋشىلار قۇرامىنىڭ باسشىلىعىمەن 2023 جىلدىڭ قىركۇيەگىنەن 2024 جىلدىڭ اقپانىنا دەيىن وتەۋسىز نەگىزدە جۇرگىزىلدى.
"Mini-MBA" باعدارلاماسى قازاقستاندا 7 جىلعا ارنالعان Foundation for International Business Administration Accreditation (بونن، گەرمانيا) حالىقارالىق اككرەديتاسياسىن ەكى رەت العان جالعىز باعدارلاما. باعدارلاما 2012 جىلى مەنەدجمەنت، كاسىبي داعدىلار جانە بيزنەس قۇزىرەتتىلىگى بويىنشا نەگىزگى ءبىلىم الۋ ماقساتىندا ىسكە قوسىلدى.