الماتىدا مەترونىڭ جاڭا بەكەتتەرى اشىلدى

مەترونىڭ «سارىارقا» جانە «باۋىرجان مومىش ۇلى» بەكەتتەرى ىسكە قوسىلدى.

بەكەتتەردى  ىسكە قوسۋدىڭ سالتاناتتى راسىمىندە قالا اكىمى ەربولات دوسايەۆ مەتروپوليتەن قۇرىلىسشىلارى مەن قىزمەتكەرلەرىنە ەرەن ەڭبەكتەرى مەن قالانىڭ قوعامدىق كولىگىن دامىتۋعا قوسقان ۇلەستەرى ءۇشىن العىس ايتتى، دەپ حابارلايدى Almaty-akshamy.kz

«بارشاڭىزدى وسى مەرەكەمەن قۇتتىقتايمىن! بۇل - ءبىزدىڭ مەگاپوليس ءۇشىن كوپتەن كۇتكەن قۋانىشتى وقيعا. سىزدەر جەرگىلىكتى جەردىڭ كۇردەلى تاۋ-گەولوگيالىق جانە سەيسميكالىق جاعدايلارىن ەسكەرە وتىرىپ، وتە كۇردەلى ءارى كولەمدى جۇمىستى اتقارىپ شىقتىڭىزدار. سىزدەردىڭ ەڭبەكتەرىڭىز بەن جوعارى كاسىبيلىكتەرىڭىزدىڭ ارقاسىندا الماتىدا تاعى جاڭا ەكى مەترو ستانسياسى پايدا بولدى.

مەن بۇنى ءبىزدىڭ قالامىز بەن  تۇرعىندارىمىز ءۇشىن وتە ماڭىزدى وقيعا دەپ سانايمىن. ماسەلە 50 مىڭنان 85 مىڭعا دەيىن ۇلعاياتىن جولاۋشىلار لەگىندە  عانا ەمەس، قالانىڭ الدەقايدا جايلى بولاتىندىعىندا، ءبارىمىزدى الاڭداتىپ وتىرعان ترافيكتىڭ دۇرىس شەشىم تاباتىندىعىندا.

قالادا مەترو جەلىسىن كەڭەيتۋ بويىنشا اۋقىمدى جۇمىستار جالعاسادى. 2025 جىلى «قالقامان» ستانسياسىنىڭ قۇرىلىسىن اياقتاۋ جوسپارلانۋدا، مەترو جەلىسىن دامىتۋ باتىس باعىتتا «بارلىق» بازارىنا دەيىن ۇلعايادى. بۇل اتالعان اۋدانداردىڭ تۇرعىندارى ءۇشىن ىڭعايلى جولاۋشىلار تاسىمالىن ۇيىمداستىرۋعا مۇمكىندىك بەرەدى.

وتكەن جىلى الماتى مەتروپوليتەنى ءوزىنىڭ العاشقى ۇلكەن جانە ماڭىزدى مەرەيتويىن – ون جىلدىعىن اتاپ ءوتتى. وسى ۋاقىت ىشىندە بىلىكتى ەڭبەك ۇجىمى قۇرىلىپ، جاس ماماندار وقىتىلىپ، دايىندالدى. ەكى ستانسيانىڭ ىسكە قوسىلۋىمەن قوسىمشا 200 جۇمىس ورنى قۇرىلدى. الماتى مەتروپوليتەنى ءبىزدىڭ قالامىزدىڭ ماڭىزدى جانە اجىراماس بولىگىنە، ىڭعايلى جانە جايلى قوعامدىق كولىك تۇرىنە اينالدى.

بۇگىنگىدەي ەرەكشە كۇنى جەكە ءوزىمنىڭ جانە قالامىزدىڭ تۇرعىندارى اتىنان سىزدەرگە مەگاپوليستىڭ جولاۋشىلار كولىگىن دامىتۋعا قوسقان ۇلەستەرىڭىز ءۇشىن العىس بىلدىرەمىن جانە جۇمىستا تابىس، زور دەنساۋلىق ءارى بىرلىك پەن بەرەكە  تىلەيمىن!» - دەدى قالا اكىمى.

ەسكە سالا كەتەيىك، بۇعان دەيىن قالا اكىمى ەربولات دوسايەۆ «سارىارقا» جانە «باۋىرجان مومىش ۇلى» ستانسيالارىنىڭ ىسكە قوسىلۋى وسى جىلدىڭ مامىر ايىندا ورىندالاتىنىن حابارلاعان بولاتىن. وسىلايشا، ستانسيالار ۋاقىتىلى قوسىلدى.

قازاقتىڭ باتىر ۇلىنىڭ ەسىمىن يەلەنگەن جاڭا مەترو ستانسياسىنىڭ اشىلۋ سالتاناتىندا باۋىرجان مومىش ۇلىنىڭ كەلىنى زەينەپ احمەتوۆا ءسوز سويلەدى.

«اتام مارقۇم ءبىر كەزدە "مەن و دۇنيەلىك بولسام دا، بۇل دۇنيەدە وتسەم دە، تىرىلەردىڭ اراسىندا جۇرەمىن" دەيتىن. سول كەزدە ول ءسوز ءبىرتۇرلى بولىپ ەستىلگەن. ءقازىر قاراپ تۇرساڭىزدار، اۋليەنىڭ ءسوزى سياقتى. ەندى قاراڭىزدار، بۇگىن قانشا ادامداردىڭ كوڭىلىندە، ءتىل ۇشىندا اتانىڭ اتى ايتىلىپ جاتىر. اتامىز ومىردەن كەتكەنىنە 40 جىل بولدى، ءبىراق ءالى كۇنگە دەيىن حالىق ءالى ارداقتاپ، قۇرمەتتەپ، اسپانداتىپ، كوشەلەردىڭ اتىن، مەكتەپتەردىڭ اتىن بەرىپ جاتىر. بۇگىنگى شارا دا - اتامىز ءالى تىرىلەردىڭ اراسىندا جۇرگەنىنىڭ ءبىر بەلگىسى. مەن ءبىر نارسەگە تاڭعالىپ تۇرمىن. الماتىدا مەترو اشىلعالى بەرى ءبىر دە ءبىر رەت قادام باسپاعان ەكەنمىن. اتامنىڭ اتىنا بەرگەندە عانا كەلدىم»، - دەدى زەينەپ احمەتوۆا.

پاسپورت

 «سارى-ارقا» مەترو ستانسياسى

پاسپورت

 «باۋىرجان مومىش ۇلى» مەترو ستانسياسى