رەسپۋبليكا كۇنىنە وراي الماتىدا مەملەكەتتىك تۋدى كوتەرۋ جانە ءانۇراندى ورىنداۋ سالتاناتتى ءراسىمى ءوتتى. وتانسۇيگىشتىك رۋحتى كوتەرۋ ماقساتىندا ۇيىمداستىرىلعان بۇل شارا "مەدەۋ" بيىك تاۋلى سپورت كەشەنىندە ءوتتى.
جيىنعا الماتى قالاسىنىڭ اكىمى ەربولات دوسايەۆ، ءماسليحات دەپۋتاتتارى، مەملەكەت جانە قوعام قايراتكەرلەرى، جاستار ۇيىمدارىنىڭ وكىلدەرى مەن قالا تۇرعىندارى قاتىستى. سالتاناتتى راسىمنەن كەيىن اشىق اسپان استىندا كونسەرت ۇيىمداستىرىلدى، وندا قازاقستاندىق ەسترادا جۇلدىزدارى قالا تۇرعىندارى مەن قوناقتارى ءۇشىن ونەر كورسەتتى.
الماتى قالاسى قوعامدىق دامۋ باسقارماسىنىڭ باسشىسى ايدار ەسەنبەكوۆتىڭ ايتۋىنشا، 25 قازان – تاۋەلسىزدىككە العاشقى قادام جاسالعان تاريحي ماڭىزدى كۇن. ەگەمەندىك تۋرالى دەكلاراسيا ءدال الماتىدا قابىلدانعان، سوندىقتان رەسپۋبليكا كۇنى الماتىلىقتار ءۇشىن ەرەكشە قاستەرلى داتا بولىپ سانالادى.
"رەسپۋبليكا كۇنىن مەرەكەلەۋ اياسىندا الماتىدا بىرنەشە كۇن بويى ءتۇرلى ءىس-شارالار ۇيىمداستىرىلۋدا. بۇگىن مەدەۋ شاتقالىندا ورنالاسقان تۋ تۇعىرىنىڭ جانىندا "مەنىڭ تۋىم، مەنىڭ گيمنىم" اتتى پاتريوتتىق شارا وتكىزدىك. بۇل داستۇرگە اينالىپ كەلە جاتقان شارادا جىل سايىن وسى جەردە جينالىپ، ءانۇرانىمىزدى شىرقاپ، مەملەكەتتىك تۋىمىزدى كوككە كوتەرەمىز. جاستارعا وسى كۇننىڭ ءمانىن ءتۇسىندىرۋ، پاتريوتتىق سەزىمدى وياتۋ – ءبىزدىڭ باستى ماقساتىمىز"، – دەپ اتاپ ءوتتى ايدار ەسەنبەكوۆ.
ماڭىزدى مەرەكە
1990 جىلى قازاقستاننىڭ ەگەمەندىگى تۋرالى دەكلاراسيانىڭ قابىلدانۋى – ەلىمىزدىڭ تاريحىنداعى ماڭىزدى وقيعالاردىڭ ءبىرى. بۇل كۇن قازاقستاننىڭ تاۋەلسىزدىك جولىنداعى العاشقى قادامى رەتىندە ەسەپتەلىپ، 2022 جىلدان باستاپ قايتادان ۇلتتىق مەرەكە دەڭگەيىنە كوتەرىلدى. سوڭعى ءۇش جىلدان بەرى رەسپۋبليكا كۇنى اياسىندا ەلدىڭ تۇكپىر-تۇكپىرىندە كەڭ اۋقىمدى ءىس-شارالار ءوتىپ كەلەدى.
بولاشاق – جاستاردىڭ قولىندا
جيىننىڭ نەگىزگى ماقساتى – جاستارعا ەلىمىزدىڭ تاۋەلسىزدىگى مەن ەركىندىگى تۋرالى تۇسىنىك قالىپتاستىرىپ، پاتريوتتىق تاربيە بەرۋ. وسى ماقساتتا جىل سايىن مەملەكەتتىك تۋ استىندا ءانۇران شىرقاپ، ورتاق ماقساتتار مەن قۇندىلىقتارعا ادالدىقتى ءبىلدىرۋ داستۇرگە اينالىپ وتىر.
الماتىداعى "مەنىڭ تۋىم، مەنىڭ گيمنىم" پاتريوتتىق شاراسى – ەلىمىزدىڭ بولاشاعى جاستاردىڭ جۇرەگىنە تاۋەلسىزدىك پەن بىرلىك قۇندىلىقتارىن سىڭىرەتىن ماڭىزدى قادامداردىڭ ءبىرى. قالا تۇرعىندارى ءۇشىن بۇل مەرەكەلىك شارا تەك كوڭىل كوتەرۋ عانا ەمەس، ورتاق قۇندىلىقتارىمىزدى سەزىنىپ، ەلىمىزدىڭ مارتەبەسىن اسقاقتاتۋعا ارنالعان ەرەكشە مۇمكىندىك.