مەگاپوليس اكىمى باقىتجان ساعىنتايەۆ مەملەكەت باسشىسىنىڭ بۇقارالىق سپورتتى دامىتۋ جونىندەگى تاپسىرماسىنىڭ ورىندالۋى تۋرالى ايتتى
الماتى اكىمى ب. ساعىنتايەۆ ءوزىنىڭ Instagram-داعى پاراقشاسىندا بالالاردىڭ دەنە شىنىقتىرۋ مەن بۇقارالىق سپورتقا بەلسەندى تۇردە قاتىساتىنىن حابارلادى، دەپ حابارلايدى Almaty-akshamy.kz.
«ول ءۇشىن جالپىقالالىق سپورت ينفراقۇرىلىمىنان بولەك مەكتەپ جانىنداعى سپورت ايماعىنىڭ الەۋەتىن دامىتامىز. وتكەن 2020-2021 جج. وقۋ جىلىندا ءمجا اياسىندا مەكتەپ جانىنداعى 4 سپورت الاڭى جاڭعىرتىلدى. بيىل جىل سوڭىنا دەيىن 61 مەكتەپتىڭ جانىنداعى سپورت نىسانىن جاڭعىرتۋدى اياقتايمىز. وندا 73 فۋتبول، 63 ۆولەيبول مەن باسكەتبول الاڭى، سونداي-اق ۆوركاۋت-ايماقتار مەن جۇگىرۋ جولدارى بار»، - دەپ جازدى ب. ساعىنتايەۆ. سونىمەن قاتار ول مەملەكەت باسشىسىنىڭ بۇقارالىق سپورتتى دامىتۋ تۋرالى تاپسىرماسىن ىسكە اسىرۋ جالعاسا بەرەتىن اتاپ ءوتتى.
بۇرىن حابارلانعانىنداي، الماتىدا جاڭا وقۋ جىلىندا مەكتەپتەرگە 301 171 وقۋشى باردى. مەملەكەتتىك مەكتەپتەردە 280 458 بالالار مەن جاسوسپىرىمدەر وقۋدا، ال جەكەمەنشىك مەكتەپتەردەگى وقۋشى سانى – 20 713. مەملەكەتتىك مەكتەپتەردە ءبىرىنشى سىنىپ وقۋشىلارىنىڭ سانى 3 مىڭعا جۋىق ءوستى. ءبىرىنشى سىنىپتاردا 30 751 وقۋشى ءبىلىم الۋدا.