الماتىدا مەكتەپ ءمۇعالىمى وقۋشىلاردىڭ كوزىنشە تەڭىز شوشقاسىن سويعان

اتالعان جاعدايدان سوڭ بيولوگيا ءپانىنىڭ ءمۇعالىمى ءوز ەركىمەن جۇمىستان كەتتى

الماتى پوليسياسى ساباق ۇستىندە تەڭىز شوشقاسىن ۇرىپ ءولتىرىپ، ونى وقۋشىلارعا سويىپ كورسەتۋ دەرەگى بويىنشا قىلمىستىق ءىس قوزعادى. بۇل تۋرالى قالالىق پوليسيا دەپارتامەنتى ءمالىم ەتتى، دەپ حابارلايدى Almaty-akshamy.kz.

حابار 24 ارناسىنىڭ حابارلاۋىنشا، اتالعان جاعداي الماتىداعى «125 ALMATY» جەكە مەكتەبىندە بولعان. بيولوگيا ءپانى ءمۇعالىمىنىڭ تاجىريبەلىك ماقساتتا تەڭىز شوشقاسىن ۇرىپ، ونى سويىپ جاتقان بەينەجازباسى الەۋمەتتىك جەلىدە تارادى. ءبىلىم سالاسىندا ساپانى قامتاماسىز ەتۋ دەپارتامەنتى مەن قالالىق ءبىلىم باسقارماسىنىڭ ماماندارى اتالعان ءبىلىم مەكەمەسىنە بارىپ، ءمان-جايدى انىقتاعان.

"ءمۇعالىمنىڭ ايتۋىنشا، ول وقۋشىلاردىڭ ءوتىنىشى بويىنشا اناتوميا مەن فيزيولوگيا ءبولىمىن ءتۇسىندىرۋ ءۇشىن تەڭىز شوشقاسىن مۇشەلەپ كورسەتكەن"، - دەيدى ءبىلىم باسقارماسىنىڭ وكىلى.

 «مەكتەپ ۇجىمىنا الداعى ۋاقىتتا مۇنداي جاعدايدى بولدىرماۋ تۋرالى ءتۇسىندىرۋ جۇمىستارى جۇرگىزىلدى. سونداي-اق مەكتەپ ىشىندە باقىلاۋدى كۇشەيتۋ بويىنشا ۇسىنىستار بەرىلدى. قورشاعان ورتانى ساقتاۋ مەن جانۋارلارعا قاتىگەزدىك كورسەتۋدىڭ الدىن الۋ تۋرالى تاربيەلىك جۇمىستار جۇرگىزۋ قاجەتتىگى ايتىلدى. اتالعان جاعدايدان سوڭ بيولوگيا ءپانىنىڭ ءمۇعالىمى ءوز ەركىمەن جۇمىستان كەتتى»، - دەدى قالالىق ءبىلىم باسقارماسىنىڭ جالپى ورتا ءبىلىم بەرۋ ءبولىمىنىڭ باسشىسى اقمارال ايتۋاروۆا.