وتكەن دەمالىس كۇندەرى الماتى قالاسىندا جول قوزعالىسى ەرەجەلەرىن ورەسكەل بۇزۋ فاكتىلەرىن انىقتاۋعا باعىتتالعان كەڭ اۋقىمدى رەيد ۇيىمداستىرىلدى.
جەرگىلىكتى پوليسيا قىزمەتىنىڭ مالىمەتىنشە، الدىن الۋ شاراسى بارىسىندا ماس كۇيىندە كولىك باسقارعان 27 جۇرگىزۋشى ۇستالدى، دەپ حابارلايدى aqshamnews.kz.
سوت ولاردىڭ ءارقايسىسىنا قاتىستى اكىمشىلىك جازا تاعايىنداپ، كەمىندە 15 تاۋلىككە قاماۋعا الۋ جانە 7 جىلعا كولىك باسقارۋ قۇقىعىنان ايىرۋ تۋرالى شەشىم شىعاردى.
الماتى قالالىق پوليسيا دەپارتامەنتىنىڭ جەرگىلىكتى پوليسيا قىزمەتى باسقارماسىنىڭ باسشىسى سەرىك شۋمايەۆتىڭ ايتۋىنشا، كولىكتى ماس كۇيىندە تىزگىندەۋ اۋىر زارداپتارعا اكەلەتىن قۇقىق بۇزۋشىلىقتاردىڭ ءبىرى.
- تاجىريبە كورسەتكەندەي، ەسىرتكى نەمەسە الكوگول قولدانعان جۇرگىزۋشىلەر ءالى دە كەزدەسەدى. مۇنداي جاعدايلاردا ءجيى كەزدەسەتىن سەناريي: ءبىر توپ ادام بىرگە ىشىمدىك ىشەدى، سودان كەيىن جۇرگىزۋشى كولىكپەن ۇيىنە قايتۋعا شەشىم قابىلدايدى. ول وزىنە تىم سەنىمدى بولىپ، ەش قيىندىقسىز جەتە الاتىنىنا سەنەدى. الايدا وكىنىشكە قاراي، مۇنداي جاعدايلار كوبىنەسە اۋىر جول-كولىك وقيعالارىمەن اياقتالىپ جاتادى. ماس جۇرگىزۋشىلەر توقتاتىلعان كەزدە، ولار ءتۇرلى سىلتاۋ ايتىپ، جاۋاپكەرشىلىكتەن قۇتىلۋعا تىرىسادى. ءبىرى ءدارى ىشكەنىن العا تارتسا، ەندى ءبىرى تەك از عانا جول جۇرگەنىن ايتادى. ءبىراق بۇل جەردە ەشقانداي اقتالۋ بولماۋى كەرەك. ەگەر ادام ماس بولسا، ول رولگە وتىرماۋى ءتيىس. ايتپەسە، قايعىلى جاعداي ورىن الۋى مۇمكىن. بۇل – ءومىردىڭ اششى شىندىعى: ماس جۇرگىزۋشى – قىلمىسكەر"، – دەپ اتاپ ءوتتى ول.
دەمالىس كۇندەرى الدىڭعى شەپتەگى پوليسيا بولىمشەلەرى 112 جول قوزعالىسى ەرەجەسىن بۇزۋ دەرەگىن انىقتادى. ونىڭ ىشىندە: 27 – كولىك قۇرالىن ماس كۇيىندە باسقارۋ، 1 – جۇرگىزۋ قۇقىعى جوق ادامنىڭ كولىك جۇرگىزۋى، 16 – قاراما-قارسى قوزعالىس جولاعىنا شىعۋ، 20 – مانيەۆر جاساۋ ەرەجەسىن بۇزۋ، 10 – اپاتتىق جاعداي تۋىنداتۋ، 20 – كولىكتى تۇراققا قويۋ ەرەجەسىن بۇزۋ، 2 – مەملەكەتتىك تىركەۋ ءنومىرى جوق كولىك قۇرالىن باسقارۋ. الماتى قالالىق پوليسيا دەپارتامەنتى كولىك جۇرگىزۋشىلەرىن جول قوزعالىسى ەرەجەلەرىن قاتاڭ ساقتاۋعا شاقىرادى. ماس كۇيىندە رولگە وتىرۋ – ءوز ومىرىڭە دە، وزگەنىڭ ومىرىنە دە ءقاۋىپ توندىرەتىن اۋىر قۇقىق بۇزۋشىلىق.