وقۋشىلار سارايىندا №64 جالپى ءبىلىم بەرەتىن مەكتەپتىڭ ۇيىمداستىرۋىمەن جانە الماتى قالاسى ءبىلىم باسقارماسىنىڭ قولداۋىمەن «Zhas Maman 2025» ماماندىقتار جارمەڭكەسى ءوتتى.
ءىس-شارانىڭ باستى ماقساتى – جوعارى سىنىپ وقۋشىلارىنا بولاشاق ماماندىعىن دۇرىس تاڭداۋعا كومەكتەسۋ، ەڭبەك نارىعىنداعى سۇرانىسقا يە كاسىپتەرمەن تانىستىرۋ جانە ءتيىستى ءبىلىم ورنىن انىقتاۋعا جاردەمدەسۋ. جارمەڭكە بارىسىندا وقۋشىلار ءتۇرلى كوللەدج وكىلدەرىمەن كەزدەسىپ، ولاردان ماماندىقتار تۋرالى كوپتەگەن اقپارات الدى. سونىمەن قاتار، كاسىبي باعدار بەرۋشىلەردىڭ قاتىسۋىمەن وتكەن شەبەرلىك سىنىپتارىندا ءوز مۇمكىندىكتەرىن باعامداپ، بولاشاققا ناقتى جوسپار قۇرۋعا مۇمكىندىك الدى.
شارانىڭ اشىلۋىندا №64 مەكتەپتىڭ ديرەكتورى، مودەراتور سۇلتان ايتبايەۆ ءسوز سويلەپ، ماماندىق تاڭداۋدىڭ ماڭىزدىلىعىنا توقتالدى.
– بيىلعى جارمەڭكە ماڭىزدى كەزەڭمەن – جۇمىسشى ماماندىقتار جىلىمەن تۇسپا-تۇس كەلىپ وتىر. بۇل شارا – قوعامداعى ەڭبەكتىڭ باعا جەتپەس قۇندىلىعىن مويىنداۋدىڭ بەلگىسى. قوعامدى العا جىلجىتاتىن، دامىتاتىن جۇمىسشى ماماندىقتاردىڭ ءرولى ەرەكشە. ءبىز وسى كاسىپتەردى تاڭداعان جانداردىڭ ەڭبەگىن قۇرمەتتەۋىمىز كەرەك. ويتكەنى ولاردىڭ ارقاسىندا ەكونوميكا دامىپ، جاڭا مۇمكىندىكتەر اشىلادى. بۇگىن ءبىز ادامزاتتىڭ بارلىق جەتىستىكتەرىنىڭ نەگىزىندە تۇرعان كاسىپتەرمەن تانىسۋعا مۇمكىندىك الدىق. قۇرىلىسشىلار، ماشينيستەر، ەلەكتريكتەر مەن سلەسارلار – بۇل تەك ماماندىق قانا ەمەس، ءوز ىسىنە ادالدىقتى، جاۋاپكەرشىلىكتى، ادالدىق پەن ەڭبەكقورلىقتى تالاپ ەتەتىن ومىرلىك تاڭداۋ. جۇمىسشى ماماندىقتار – تەك ەكونوميكانىڭ تىرەگى عانا ەمەس، سونىمەن قاتار ءار ادام ءۇشىن تۇراقتى بولاشاققا اپاراتىن جول. بۇل سالالاردا مانساپتىق وسۋگە، شىعارماشىلىق الەۋەتتى ىسكە اسىرۋعا جانە ەلدىڭ دامۋىنا ۇلەس قوسۋعا مۇمكىندىك مول»، – دەدى ول.
جارمەڭكەگە قاتىسۋشىلاردىڭ ءبىرى، پرينتمەديا تەحنولوگيالار كوللەدجىنىڭ ستۋدەنتى ەڭلىك باپان دا ءوز پىكىرىمەن ءبولىستى.
– مەن ماماندىق تاڭداۋدا ۇزاق ويلاندىم. وسىنداي جارمەڭكەلەردىڭ ارقاسىندا وزىمە لايىقتى جولدى تابا الدىم. ءوزىم وقيتىن كوللەدجىمنىڭ دە ءبىلىم ساپاسى قاتتى ۇنايدى. بۇگىنگى ءىس-شارا مەن سياقتى بولاشاق ماماندىعىن ىزدەپ جۇرگەن وقۋشىلار ءۇشىن وتە پايدالى بولدى. جۇمىسشى ماماندىقتار تەك قوعامعا قاجەتتى عانا ەمەس، سونىمەن بىرگە تۇراقتى تابىس پەن ءوز ىسىڭە دەگەن سۇيىسپەنشىلىك سىيلايتىن كاسىپتەر. سوندىقتان، ەڭ باستىسى – جۇرەك قالاۋىمەن تاڭداۋ جاساۋ، – دەدى ول.
جارمەڭكەگە قاتىسۋشىلار بۇل شارانىڭ وزدەرىنە ۇلكەن پايدا اكەلگەنىن ايتىپ، ۇيىمداستىرۋشىلارعا العىستارىن ءبىلدىردى. كوپتەگەن وقۋشى وزىنە لايىقتى ماماندىق پەن وقۋ ورنىن تاڭداۋ بويىنشا ماڭىزدى اقپارات الدى.
№64 مەكتەپ پەن الماتى قالاسى ءبىلىم باسقارماسى الداعى ۋاقىتتا دا وسىنداي پايدالى ءىس-شارالاردى ۇيىمداستىرىپ، وقۋشىلاردىڭ كاسىبي باعدارىن ايقىنداۋعا قولداۋ كورسەتەتىنىن جەتكىزدى.