الماتىدا قالا اكىمى دارحان ساتىبالدىنىڭ تاپسىرماسىنا سايكەس 1 قىركۇيەككە دەيىن ماگيسترالدىق كوشەلەردىڭ ورتاشا جوندەۋ جۇمىستارى تولىق اياقتالدى.
قالالىق موبيلدىلىك باسقارماسىنىڭ مالىمەتىنشە، ۇزىندىعى 40 شاقىرىم بولاتىن 15 ماگيسترالدىق كوشە جوندەلدى. ولاردىڭ قاتارىندا قابانباي باتىر، قاجىمۇقان، جۇبانوۆ، ۇلىقبەك، مايلين، بۇقتىرما، موڭكە بي، بەكماحانوۆ، دۋلاتي، سەركەبايەۆ، جاروكوۆ، تولە بي، بوگەنباي باتىر، تىلەندييەۆ كوشەلەرى جانە نازاربايەۆ داڭعىلى بار.
سونداي-اق، ۇزىندىعى 117 شاقىرىم بولاتىن اۋداندىق ماڭىزى بار 123 كوشەدە جوندەۋ جۇمىستارى اياقتالدى. اۋداندىق جانە جەرگىلىكتى ماڭىزى بار ۇزىندىعى 120 شاقىرىم بولاتىن 188 كوشەدە جوندەۋ جۇمىستارى جالعاسۋدا، ولاردىڭ 60% - دان استامى قىركۇيەك ايىندا، قالعانى قازان ايىنىڭ 20-سىندا اياقتالادى.
«وسىلايشا بيىل جالپى ۇزىندىعى 277 شاقىرىم بولاتىن 326 كوشە ورتاشا جوندەۋمەن قامتىلادى. بۇل بۇرىنعى جوسپاردان 23 شاقىرىمعا قىسقاردى، سەبەبى ءبىرقاتار كوشەلەر استىنداعى ينجەنەرلىك جەلىلەردى اۋىستىرۋ قاجەتتىگىنە بايلانىستى تىزىمنەن الىندى»، – دەپ حابارلادى باسقارما.
بۇدان بولەك، قالالىق موبيلدىلىك باسقارماسى ماگيسترالدىق جانە راديالدى كوشەلەردى جالعاۋ، سونداي-اق العاباس، شۇعىلا، اقجار، بورالداي، جاس قانات، راحات-مادەنيەت شاعىناۋداندارىندا جاڭا جولدار سالۋ جۇمىستارىن جالعاستىرۋدا.