جامبىل اتىنداعى فيلارمونيا 90 جىلدىعىن حالىقارالىق جوبامەن كەڭ اۋقىمدا اتاپ وتپەك
جامبىل اتىنداعى قازاق مەملەكەتتىك اكادەميالىق فيلارمونياسىندا 90 جىلدىق مەرەيتويعا وراي ءبىر جىلدىڭ ىشىندە 195 كونسەرت وتكەلى وتىر. بۇل تۋرالى وڭىرلىك كوممۋنيكاسيالار قىزمەتىندە وتكەن پرەسس-كونفەرەنسيادا جان-جاقتى ايتىلدى، دەپ حابارلايدى aqshamnews.kz
فيلارمونيانىڭ ديرەكتورى اقان ابدۋالييەۆتىڭ ايتۋىنشا، بۇل مەرەيتوي – ەلىمىزدىڭ ۇلكەن ساز ساحناسىنداعى تاريحي ساباقتاستىقتى عانا كورسەتىپ قويماي، مادەني تۇردە جاڭعىرىپ جاتقانىن دا پاش ەتپەك.
«90 جىلدىق مەرەيتوي — كەز كەلگەن مادەنيەت وشاعىنىڭ ارعى-بەرگى تاريحىنداعى اۋىز تولتىرىپ ايتاتىنداي ۋاقىت. عاسىرعا تاتيتىن تاريحى بار جامبىل اتىنداعى قازاق مەملەكەتتىك اكادەميالىق فيلارمونياسى ۇلتتىق مۋزىكا مەن مادەنيەتتىڭ دامۋىنا ولشەۋسىز ۇلەس قوسىپ كەلە جاتقان قازاق ونەرىنىڭ التىن قازىعى ىسپەتتى. مەرەيتويدىڭ اياسىندا وتەتىن كونسەرتتەر، ءارتۇرلى ءىس-شارالار قالانىڭ مادەني ومىرىندەگى تىڭ جاڭالىق بولادى دەپ ۇمىتتەنەمىز»، – دەدى اقان ابدۋالييەۆ.
جىل باسىنان بەرى فيلارمونيا بالالار ۇيىندە، قارتتار ورتالىعى مەن ەرەكشە بالالارعا ارنالعان باسقا دا مەكەمەلەردە قايىرىمدىلىق ماقساتىنداعى وسىنداي بىرنەشە كونسەرت وتكىزىپ ۇلگەرىپتى.
ۇرپاق ساباقتاستىعى جوباسىنىڭ اياسىندا قاڭتار ايىنان بەرى قالاداعى مۋزىكالىق وقۋ ورىندارىنىڭ ستۋدەنتتەرىمەن، وقۋشىلارىمەن بىرلەسىپ كونسەرت تە وتكىزىپ جاتىر. جۇرگەنوۆ اتىنداعى ونەر اكادەمياسىنىڭ ستۋدەنتتەرى مەن و. تاڭسىقبايەۆ اتىنداعى ساندىك جانە قولدانبالى ونەر كوللەدجىنىڭ ستۋدەنتتەرى قاتىسقان «فيلارمونيا – جاس سۋرەتشىلەردىڭ كوزىمەن» دەپ اتالاتىن كوركەم پلەنەر سونىڭ ءبىرى.
- فيلارمونيا مەن ب. بايقاداموۆ اتىنداعى حور كاپەللاسىنىڭ 90 جىلدىعى مەن نۇرعيسا تىلەندييەۆتىڭ 100 جىلدىعىنان سۋرەتشىلەر دە قالىس قالمادى. ولاردىڭ قولىنان شىققان كارتينالار فيلارمونيانىڭ تۋرا كىرەبەرىسىنە قويىلدى.
- ب. بايقاداموۆ اتىنداعى حور كاپەللاسى ۇيىمداستىرعان «گۇل الماتى. Flower City» دەپ اتالعان فەستيۆال-كونسەرت ەرەكشە وقيعانىڭ ءبىرى بولدى. فيلارمونيانىڭ 90 جىلدىعى مەن قازاقستان حالقى اسسامبلەياسىنىڭ 30 جىلدىعىندا فەستيۆال العاش رەت بالالار مەن جاسوسپىرىمدەردىڭ حور ۇجىمىنىڭ باسىن قوستى.
- بالالار مەن جاستار جاعى دا نازاردان تىس قالعان جوق. 1 ماۋسىم كۇنى قالادا جاس ارتىستەر قاتىسقان ۇلكەن كونسەرت بولىپ ءوتتى. وقۋشىلاردى اكادەميالىق مۋزىكاعا تارتۋدى كوزدەيتىن مۇنداي تانىمدىق كونسەرتتەردى جىلدىڭ سوڭىنا دەيىن ۇزبەي وتكىزبەك. ءقازىر 2025 جىلعى ءىس-شاراعا مەكتەپتەر مەن اتا-انالار ۇيىمىنان كوپ ءوتىنىش كەلىپ تۇسكەن.
شەتەلدە ءبىلىم الىپ قايتقان قازاقستاندىق جاس انشىلەر XX عاسىرداعى كومپوزيتورلاردىڭ سيمفونيالىق شىعارماسىن ورىندايتىن «XX–25» فەستيۆالى ماۋسىم ايىنداعى ەڭ قىزىقتى ءسات. ت. ابدىراشيەۆ اتىنداعى ق ر مەملەكەتتىك اكادەميالىق وركەسترىنىڭ كوركەمدىك جەتەكشىسى ءارى باس ديريجەرى قانات وماروۆ فەستيۆالدىڭ كونسەپسياسى تۋرالى بىلاي دەيدى:
«فەستيۆال كوپشىلىككە XX عاسىر مەن قازىرگى كەزدەگى كومپوزيتورلاردىڭ سيمفونيالىق شىعارماسىن ۇسىنىپ، وتكەن ءجۇزجىلدىقتاعى كوركەمدىك ىزدەنىستەر مەن يدەيالاردىڭ ءالى دە وزەكتى ەكەنىن اتاپ وتپەك. شەتەلدە وقىپ، سول جاقتا جۇمىس ىستەپ جاتقان قازاقستاندىق جاس مۋزىكانتتاردىڭ وسى ءىس-شاراعا كەلىپ قاتىسقالى وتىرعانى دا ءوز الدىنا ءبىر جاڭالىق. ولار حالىقارالىق ارەنادا تانىلىپ، ەندى ەل ىشىندە ونەر كورسەتىپ، جاس مۋزىكانتتارعا ءتالىم بەرۋ ءۇشىن بىرتىندەپ ەلگە ورالىپ جاتىر»، – دەپ اتاپ ءوتتى قانات وماروۆ.
فەستيۆالدى 6 ماۋسىم كۇنى سكريپكاشى، حالىقارالىق بايقاۋلاردىڭ لاۋرەاتى مەرۋەرت كارمەنوۆا (بەلگيا) اشپاق. ودان كەيىن پيانيستەر بوتاگوز ايعالقايەۆا مەن اليار وتەتىلەۋ ونەر كورسەتەدى. وسىلايشا، 21 ماۋسىمعا دەيىن XX عاسىرداعى سيمفونيالىق شىعارمالاردى قازاقستاندىق ونەرپازدار ەرەكشە ناقىشپەن ورىنداپ شىعاتىن بىرنەشە كونسەرت وتەدى.
اقان ابدۋالييەۆتىڭ ايتۋىنشا، فيلارمونيا جىل سايىن قالا كۇنىنە ارناپ ءارتۇرلى الاڭدا ءۇش كۇندىك كونسەرت وتكىزىپ تۇرادى. مۇنداي ءىس-شارالار الماتىنىڭ مادەني ءومىرىن تۇرلەندىرىپ، قالا تۇرعىندارى دا ونى ەرەكشە ىقىلاسپەن قابىلدايدى.
قىركۇيەك ايىندا وتاندىق جانە شەتەلدىك مۋزىكانتتار كەلىپ قاتىساتىن 90-شى كونسەرت ماۋسىمى باستالادى. قوناقتاردىڭ اراسىندا – ايمان مۇساحودجايەۆا، ءجانيا اۋباكىروۆا، ديريجەر كريستوف مانگۋ (فرانسيا)، كومپوزيتور ريككاردو پياچەنتيني (يتاليا)، ديان چوبانوۆ (بولگاريا) مەن باسقالارى بولماق. بيىل ونەر كورسەتىپ ۇلگەرگەن ارتىستەردىڭ قاتارىندا الەكسەي پۋزاكوۆ (رەسەي)، تاير بەيشەيەۆ (قىرعىزستان)، ايدار تورىبايەۆ (ۋكراينا)، ەرجان قۇلىبايەۆ تا (يسپانيا) بار.
قاراشا ايىندا رەسپۋبليكا سارايىندا فيلارمونيانىڭ 341 ءارتىسى قاتىساتىن ۇلكەن گالا-كونسەرت وتەدى. بۇدان بولەك، ءار ۇجىم مەن فيلارمونيانىڭ سوليستەرىنە ارنالعان 60 مينۋتتىق ۆينيل پلاستينكاسى قويىلىپ، مەكەمەنىڭ تاريحىن باياندايتىن كىتاپتىڭ تۇساۋى كەسىلمەك.
فيلارمونيا ۇلى وتان سوعىسىنداعى جەڭىستىڭ 80 جىلدىعى مەن ءشامشى قالداياقوۆتىڭ 95 جىلدىعىن، كومپوزيتور ءابىلاحات ەسبايەۆتىڭ 100 جىلدىعىن، ەۆگەنيي برۋسيلوۆسكيي مەن اقىن تۇمانباي مولداعالييەۆتىڭ 120 جىلدىعىن دا ەسكەرۋسىز قالدىرعان جوق. ولارعا دا كونسەرت ارناماق.
«وسىلايشا، فيلارمونيانىڭ 2025 جىلعى كونسەرتتەرى قازاقستاننىڭ مادەني ومىرىنە تىڭ جاڭالىق الىپ كەلگەلى وتىر. كورنەكتى قايراتكەرلەردىڭ مەرەيتويىمەن شەكتەلىپ قالماي، ولاردى تاريحتان ءتالىم الۋ ءۇشىن جەڭىستىڭ 80 جىلدىعىنا دا ارناپ وتىر. وسىنداي فەستيۆالدار، بالالاردىڭ ونەرى مەن كاسىبي مامانداردىڭ كونسەرتى ارقىلى فيلارمونيا ونەر مەن مادەنيەتتىڭ دامۋىنا وزىنشە ۇلەس قوسا بەرمەك»، – دەپ اياقتادى ءوز ءسوزىن اقان ابدۋالييەۆ.
الماتىلىقتار مەن قالانىڭ تالعامپاز قوناقتارىن مەرەيتويعا ارنالعان وسىنداي ايتۋلى ءىس-شاراعا كەلىپ قاتىسۋعا شاقىردى.