ۇستالعان قىلمىستىق توپتىڭ 27-جاستاعى ەكى مۇشەسى بۇرىن سوتتالعان تۇركىستان وبلىسىنىڭ تۋمالارى بولىپ شىقتى دەپ حابارلايدى almaty-akshamy.kz الماتى قالاسى پوليسيا دەپارتامەنتىنىڭ باسپا ءسوز قىزمەتىنە سىلتەمە جاساپ.
سوت الدى تەرگەۋ امالدارى بارىسىندا بەلگىلى بولعانداي كۇدىكتى ازاماتتار جاڭا جىل مەرەكەسى قارساڭىندا ينديا ەلىنىڭ ازاماتىن توناپ، لوتو كلۋبقا قاراقشىلىق شابۋىل جاساعان. ەكى جاعدايدا دا ولار تراۆماتيكالىق تاپانشا پايدالانعان. شەتەل ازاماتىنىڭ ۇيالى تەلەفونىمەن ءبىراز سوماداعى اقشاسىن تارتىپ السا، لوتو كلۋب كاسساسىنان 2 ميلليون تەڭگە كولەمىندە قارجىنى قولدى ەتكەن. قاراقشىلىق شابۋىل كەزىندە اتالعان مەكەمەنىڭ كۇزەتشىسى جارالانعان،-دەپ مالىمدەدى الماتى قالاسى پوليسيا دەپارتامەنتىنىڭ كريمينالدىق پوليسيا باسقارماسىنىڭ باستىعى پوليسيا پودپولكوۆنيگى قۋاتبەك ناۋاتوۆ.
ونىڭ ايتۋىنشا، اتالعان اۋىر قىلمىستاردى اشۋ ءۇشىن ارنايى جەدەل تەرگەۋ توبى قۇرىلىپ، ناتيجەسىندە جەدەل ۋاكىلدەر كۇدىكتىلەردى نۇر-سۇلتان قالاسىندا قولعا تۇسىرگەن.
كەيىنىرەك بەلگىلى بولعانداي كۇدىكتىلەر بۇعان دەيىن الماتى وبلىسى، قاراساي اۋدانى اۋماعىندا ورنالاسقان لوتو كلۋبقا دا شابۋىل جاساعاندىقتارى انىقتالادى. قازىرگى تاڭدا، ۇستالعان ەكەۋدىڭ وزگە دە قىلمىستارعا قاتىستىلىعى انىقتالۋدا،-دەپ اتاپ كورسەتتى قۋاتبەك ناۋاتوۆ