الماتىدا كۇزەن تون «ساتىپ»، الاياقتىقپەن بايىعان جاس كەلىنشەك ۇستالدى

ونىڭ وسىعان ۇقساس باسقا دا قىلمىستارعا قاتىسى بار-جوعى تەكسەرىلۋدە.

الماتىدا جاس كەلىنشەك كۇزەن تون "ساتىپ"، الاياقتىقپەن بايىعان، دەپ حابارلايدى Almaty-akshamy.kz Polisia.kz-كە سىلتەمە جاساپ.

ناۋرىزباي اۋداندىق پوليسيا باسقارماسىنىڭ اقپاراتىنا سايكەس، 22 جاستاعى د. ەسىمدى جاس كەلىنشەككە قاتىستى ق ر قك-نىڭ 190-بابى 3ء-بولىمىنىڭ 4-تارماعى (الاياقتىق) بويىنشا قىلمىستىق ءىس قوزعالدى.

«قىلمىستىق ءىستىڭ ءمان-جايى بەلگىلى بولعانداي، جاس كەلىنشەك الەۋمەتتىك جەلىدە تەرى ونىمدەرىنەن جاسالعان بۇيىمداردى ساتۋ ءۇشىن پاراقشا اشىپ، تۇتىنۋشىلاردان تونداردى جەتكىزۋ ءۇشىن الدىن الا اقشا العان. الايدا اقشانى العاننان كەيىن ول بەلگىسىز باعىتتا جاسىرىنعان. ال تۇتىنۋشىلار اقشاسىز جانە تونسىز قالدى. قازىرگى ۋاقىتتا تەرگەۋ وسىعان ۇقساس ءۇش قىلمىستىق ەپيزودتى دالەلدەدى»، – دەدى ناۋرىزباي اۋداندىق پوليسيا باسقارماسىنىڭ باستىعى ديدار احانوۆ.

پوليسەيلەر الاياق كەلىنشەكتىڭ ىس-ارەكەتىنەن زارداپ شەككەندەردىڭ ءالى دە كوپ بولۋى مۇمكىن ەكەنىنە سەنىمدى. سوندىقتان ونىڭ وسىعان ۇقساس باسقا دا قىلمىستارعا قاتىسى بار-جوعى تەكسەرىلۋدە.