الماتىدا كۋالىگى جوق جۇرگىزۋشى قوعامدىق كولىك جۇرگىزگەن

الماتىدا جالعان قۇجاتپەن قوعامدىق كولىكتى باسقارعان جۇرگىزۋشى انىقتالدى

بەلگىلى بولعانىداي ەر ادام 2021 جىلى كولىك قۇرالىن باسقارۋ قۇقىعىنان ايىرىلعان، دەپ حابارلايدى Almaty-akshamy.kz ءىnform.kz-كە سىلتەمە جاساپ.

«الايدا س. ەسىمدى ازامات جالعان جۇرگىزۋشى كۋالىگىن جاساپ، زاڭدى اينالىپ وتپەكشى بولدى. قۇقىق بۇزۋشى № 85-باعىتتاعى قوعامدىق كولىكتى باسقارىپ كەلە جاتىپ، اۆتوۆوكزال ماڭىنداعى ايالدامادا ۇستالدى. ونىڭ جەكە باسىن تەكسەرۋ كەزىندە جالعان قۇجاتتىڭ پايدالانعانى انىقتالدى، سونىمەن قاتار وعان جولاۋشىلاردى تاسىمالداۋعا مۇمكىندىك بەرەتىن ساناتتار شەبەرلىكپەن قوسىلعان. كولىكتى توقتاتقان ساتتە ىشىندە 40-تان استام جولاۋشى بولدى. اۋداندىق پوليسيا باسقارماسىندا جالعان قۇجات جاساۋ دەرەگى بويىنشا سوتقا دەيىنگى تەرگەۋ باستالدى»،- الماتى قالالىق پد اكىمشىلىك پوليسيا باسقارماسى باستىعىنىڭ ورىنباسارى داۋلەت سەيىتقۇلوۆ.

پوليسيا وكىلىنىڭ ايتۋىنشا، جۇرگىزۋشىگە جانە ونىڭ قۇجاتتارىن دۇرىس قاداعالاماعان اۆتوپارك باسشىلىعىنا قاتىستى اكىمشىلىك شارا قولدانىلدى. قوعامدىق كولىك مامانداندىرىلعان ايىپپۇل تۇراعىنا قويىلدى.

ايتا كەتەيىك، الماتىدا 2022 جىلدىڭ 19 شىلدەسى مەن 18 تامىزى ارالىعىندا جول-كولىك وقيعالارىنىڭ جانە ونىڭ زارداپتارىنىڭ اۋىرلىعىن الدىن الۋعا جانە ازايتۋعا باعىتتالعان «ءقاۋىپسىز جول» رەسپۋبليكالىق ايلىعى ءوتىپ جاتىر.