الماتىدا كرەششەنيە مەرەكەسىنە بايلانىستى سۋعا تۇسۋگە بولاتىن ورىنداردىڭ ءتىزىمى جاريالاندى

2026 جىلعى 18–19 قاڭتار كۇندەرى الماتى قالاسىندا كرەششەنيە مەرەكەسىنە ارنالعان ءداستۇرلى سۋعا ءتۇسۋ راسىمدەرى وتەدى. قاۋىپسىزدىكتى قامتاماسىز ەتۋ ماقساتىندا قالا اۋماعىندا ارنايى جابدىقتالعان 10 رەسمي ورىن بەلگىلەندى. بۇل تۋرالى وڭىرلىك كوممۋنيكاسيالار قىزمەتىندە وتكەن بريفينگتە الماتى قالاسى توتەنشە جاعدايلار دەپارتامەنتى مەن پراۆوسلاۆ شىركەۋىنىڭ وكىلدەرى مالىمدەدى، دەپ حابارلايدى aqshamnews.kz

جاۋاپتى قىزمەتتەردىڭ حابارلاۋىنشا، بارلىق الاڭدار ءتيىستى مەكەمەلەرمەن كەلىسىلىپ، ءدىني ءراسىمدى ءقاۋىپسىز جاعدايدا وتكىزۋگە تولىق دايىندالعان.

«كرەششەنيەدە شومىلۋ – ەڭ الدىمەن رۋحاني ءداستۇر. وعان ءار ادام سانالى تۇردە قاتىسىپ، ءوز دەنساۋلىعىنا جاۋاپكەرشىلىكپەن قاراپ، بەلگىلەنگەن قاۋىپسىزدىك تالاپتارىن قاتاڭ ساقتاۋى ءتيىس»، – دەدى پراۆوسلاۆ شىركەۋىنىڭ وكىلى الەكساندر سۋۆوروۆ.

بيىل شومىلۋ راسىمدەرى قالانىڭ بارلىق اۋدانىنداعى پراۆوسلاۆ شىركەۋلەرى اۋماعىندا ۇيىمداستىرىلادى. ءار ورىن ءۇشىن ناقتى كۇندەر مەن جۇمىس ۋاقىتى بەلگىلەنگەن.

شومىلۋعا ارنالعان رەسمي ورىندار ءتىزىمى:

1. كرەستوۆوزدۆيجەنسكيي شىركەۋى – قاراسۋ شاعىناۋدانى، ۆىسوكوۆولتنايا كوش.، 37ب
   (18 قاڭتار 11:00–15:00؛ 19 قاڭتار 00:00–22:00)

2. حريستوس عيباداتحاناسىنىڭ پريحودى – رايىمبەك داڭع.، 493
   (18 قاڭتار 12:00-دەن 19 قاڭتار 22:00-گە دەيىن)

3. نيكولاي سوبورى – بايتۇرسىنوۆ كوش.، 56/5
   (18 قاڭتار 11:00–16:00؛ 19 قاڭتار 11:00–18:00)

4. ۋسپەنسكيي شىركەۋى (پەرۆومايسكيي كەنتى) – قۇداباي ۇلى كوش.، 86
   (19 قاڭتار 09:30–23:00)

5. پاراسكيەۆا شىركەۋى – جانسۇگىروۆ كوش.، 500ۆ
   (18 قاڭتار 22:00-دەن 19 قاڭتار 22:00-گە دەيىن)

6. يۆەر-سەرافيم ايەلدەر عيباداتحاناسى – حاميدي كوش.، 30
   (18 قاڭتار 10:30-دان 19 قاڭتار 23:00-گە دەيىن)

7. بلاگوۆەششەنسكيي شىركەۋى – الاتاۋ شاعىناۋدانى، يبراگيموۆ كوش.، 13
   (18 قاڭتار 23:30-دان 19 قاڭتار 23:00-گە دەيىن)

8. قازان يكوناسى شىركەۋى – حاليۋللين كوش.، 45ا
   (18 قاڭتار 10:30-دان 19 قاڭتار 16:00-گە دەيىن)

9. روجدەستۆو پريحودى – اقجار شاعىناۋدانى، ەگىنسۋ كوش.، 1ب
   (18–19 قاڭتار 12:00–20:00)

10. پوكروۆ-ۆسەحسۆيات شىركەۋى – يۋنىح پيونەروۆ كوش.، 85
    (19 قاڭتار 11:30–19:00)

الماتى قالاسى توتەنشە جاعدايلار دەپارتامەنتى باسقارماسىنىڭ باستىعى دەنيس يارسيەۆتىڭ ايتۋىنشا، بارلىق ءراسىم وتەتىن ورىنداردا قۇتقارۋ جانە مەديسينالىق قىزمەتتەر تاۋلىك بويى كەزەكشىلىك ەتەدى.

«ازاماتتاردىڭ قاۋىپسىزدىگىن قامتاماسىز ەتۋ ءۇشىن توتەنشە جاعدايلار دەپارتامەنتى، پوليسيا دەپارتامەنتى، رەسپۋبليكالىق جەدەل-قۇتقارۋ جاساعى، قالالىق قۇتقارۋ قىزمەتى، اپاتتار مەديسيناسى ورتالىعى مەن دارىگەرلەر جۇمىلدىرىلدى. بارلىق شومىلۋ ورىندارى الدىن الا تەكسەرىلىپ، تولىق دايىندىقتان ءوتتى»، – دەدى ول.

تجد وكىلدەرى تەك رەسمي تۇردە بەلگىلەنگەن ورىنداردا عانا شومىلۋعا رۇقسات ەتىلەتىنىن ەسكەرتەدى. جاعالاۋى تايعاق، مۇزى تۇراقسىز جانە سۋ اعىسى قاتتى بولعاندىقتان، باسقا سۋ ايدىندارىندا، سونىڭ ىشىندە توعانداردا، ۇلكەن جانە كىشى الماتى وزەندەرىندە شومىلۋعا قاتاڭ تىيىم سالىنادى.

قاۋىپسىزدىك ماقساتىندا ازاماتتارعا مىنا تالاپتاردى ساقتاۋ ۇسىنىلادى:

• تەك ارنايى بەلگىلەنگەن ورىنداردا شومىلۋ؛

• ماس كۇيدە سۋعا تۇسپەۋ؛

• مۇز ۇستىندەگى ويىق ماڭىندا ءبىر مەزەتتە 3 ادامنان ارتىق تۇرماۋ؛

• شومىلۋ الدىندا دەنەنى قىزدىرۋ ءۇشىن جەڭىل جاتتىعۋ جاساۋ؛

• قۇتقارۋشىلار مەن مەديسينا قىزمەتكەرلەرىنىڭ باقىلاۋىندا شومىلۋ؛

• شومىلعاننان كەيىن قۇرعاق كيىم كيىپ، جىلى شاي ءىشۋ.

ۇيىمداستىرۋشىلار الماتىلىقتاردى كرەششەنيە مەرەكەسىندەگى راسىمدەرگە جاۋاپكەرشىلىكپەن قاراپ، اۋا رايى مەن جەكە دەنساۋلىعىن ەسكەرۋگە شاقىرادى.