الماتىدا «اۆرورا كۋبوگى» جانە «كوشپەندىلەر دالاسى» اتتى بارلىق يت تۇقىمدارى قاتىساتىن ەكى كورمە ءوتىپ جاتىر. ءىس-شارانى «اۆرورا» كينولوگيالىق كلۋبى ۇيىمداستىرىپ وتىر.
حالىقارالىق كورمەگە قازاقستان، وزبەكستان، قىرعىزستان جانە رەسەيدەن بارلىعى 500-دەن استام يت قاتىسۋدا. ەلۋدەن استام يت تۇقىمى قازاقستان چەمپيونى جانە حالىقارالىق اسەمدىك چەمپيونى اتاقتارىن ساراپقا سالادى. وعان نيدەرلاند، سلوۆاكيا، گرەكيا جانە قىتايدان كەلگەن حالىقارالىق ساراپشىلار تورەلىك ەتەدى.
- الماتى قالاسىندا ۇلتتىق كورمە، حالىقارالىق كورمە جانە مونوتۇقىمدى تازىعا ارنالعان ارنايى كورمە ءوتىپ جاتىر. مونوتۇقىمدى كورمەگە 30-دان استام تازى قاتىسىپ وتىر. بۇل تاريحي وقيعا. سەبەبى تازىنى الەمدىك دەڭگەيدە مويىنداعانعا دەيىن ءبىزدىڭ يتتەرىمىز مويىندالماعان توپتىڭ ىشىندە ونەر كورسەتەتىن. بۇگىن وزىنە ۇقساس مويىندالعا يتتەردىڭ اراسىندا سايىسقا تۇسەدى. تورەشىلەر يتتەردىڭ، ونىڭ ىشىندە تازىنىڭ دا بويىن، بيىكتىگىن، ءجۇنى مەن قۇيرىعىن، سۇيەكتەرىنىڭ دۇرىس بولۋىن، تىستەرىن جانە مىنەزىن تەكسەرەدى. جەڭىمپاز بولعان ءيتتى باقىلاۋعا الىپ، ونىڭ گەنەتيكاسىن ساقتاۋعا جۇمىس ىستەيمىز، - دەدى قازاقستان كينولوگتار وداعىنىڭ پرەزيدەنتى باۋىرجان سەرىكقالي
ايتا كەتكەن ءجون، بيىل 3 قىركۇيەكتە حالىقارالىق كينولوگيالىق فەدەراسيا (FCI) قازاق تازىسىن رەسمي تۇردە ادەپكى تانۋ تۋرالى شەشىم شىعارىپ، قازاقستانعا وسى تۇقىم ستاندارتىنىڭ يەسى مارتەبەسىن بەردى. بۇل جەتىستىككە ق ر پرەزيدەنتى ءىس باسقارماسىنىڭ قامقورلىعىمەن قازاقستان كينولوگتارى وداعىنىڭ قاجىرلى ەڭبەگىنىڭ جانە كۇش-جىگەرىنىڭ، سونداي-اق بىرەگەي تۇقىمدى ساقتاۋعا، دامىتۋعا جانە تانىمال ەتۋگە وراسان زور ۇلەس قوسقان كوپتەگەن كينولوگتاردىڭ، سەلەكسيونەرلەردىڭ، يتبەگىلەر مەن اۋەسقوي ازاماتتاردىڭ ارقاسىندا قول جەتكىزىلدى. 
يتتەر كورمەسى قارساڭىندا «اۆرورا» كينولوگيالىق كلۋبى Marwin شىعارماشىلىق الەمىنىڭ قولداۋىمەن 6-15 جاس ارالىعىنداعى بالالار قاتىسقان «كوشپەندى جانە يت» سۋرەتشىلەر بايقاۋىن وتكىزدى. قاتىسۋشىلاردىڭ بارلىق تۋىندىلارى 28 جانە 29 قىركۇيەكتەگى كورمەدە جۇرتشىلىق نازارىنا ۇسىنىلىپ، جەڭىمپازدار يتتەر كورمەسىنىڭ اشىلۋى قارساڭىندا ماراپاتتالدى.